Lemkei mi kwong’o 23:1-32
23 Kinde ma Daudi utii man edhingo ajiki mi kwo pare,* eketho Suleman ma wode ni ubimo iwi Israel.
2 Egam elwong’o judongo ma wijo mir Israel ceke, julam man Julawi.
3 Jukwanu Julawi ma gibino ku oro pier adek nidok yo malu, jukwanugi acel acel; gibino dhanu elufu pier adek wi abora (38 000).
4 I kindgi, dhanu elufu pier ario wi ang’wen (24 000) gibino junen wi tic mi ot pa Yehova, man dhanu elufu abusiel (6 000) gibino judongo man jupoklembe,
5 dhanu elufu ang’wen (4 000) gibino jukur dhugang’, man dhanu elufu ang’wen (4 000) mange gibed gipaku Yehova ku jamgoyo wer ma Daudi uwacu pigi kumae: “Ayikogi pi nimiyo pak.”
6 I ng’eye, Daudi upokogi ungu ungu calku wot Lawi: Gercon, Kohath, man Merari.
7 Ju pa Gercon ubino Ladan man Cimei.
8 Wot Ladan ubino Yehiel ma jatelwic, Zetham, man Yoel; ceke gin adek.
9 Wot Cimei ubino Celomoth, Haziel, man Haran; ceke gin adek. Ju maeno re ma gibino jutelwic mi thepacu pa Ladan.
10 Wot Cimei ubino Yahath, Zina, Yeuc, man Beria. Juang’wen maeni gibino wot Cimei.
11 Yahath ubino jatelwic man Ziza ubino mir arionde. Ento calu Yeuc giku Beria gibino kud awiya ma co dupa ngo, jukwanugi i thepacu acel man gibino ku tic acel.
12 Wot Kohath ubino Amram, Izhar, Hebron, man Uziel, ceke gin ang’wen.
13 Wot Amram ubino Arun giku Musa. Ento Arun man wote jukethogi segi kara saa ceke gibed gidwok Kamaleng’ m’usagu udok leng’, gibed githier lam i wang’ Yehova, gitim ire, man gimii mugisa i nyinge saa ceke.
14 Ento jukwanu wot Musa ma dhanu pa Mungu mandha i kind suru mi Julawi.
15 Wot Musa ubino Gercom man Eliezer.
16 I kind nyikway* Gercom, Cebuel ubino jatelwic.
17 I kind nyikway* Eliezer, Rehabia ubino jatelwic. Eliezer ubino mbe kud awiya ma co mange, ento wot Rehabia gibino dupa dit.
18 I kind nyikway Izhar, Celomith ubino jatelwic.
19 Wot Hebron ubino Yeria ma jatelwic, Amaria mir arionde, Yahaziel mir adege, man Yekameam mir ang’wende.
20 Wot Uziel ubino Mika ma jatelwic man Iscia mir arionde.
21 Wot Merari ubino Mahli giku Muci. Wot Mahli ubino Eleazar giku Kic.
22 Eleazar utho m’enyolo ngo awiya ma co, ento enyolo awiya ma nyir kende. E wot Kic ma gi wedi* migi gigamu jumanyirne igi ni mon.
23 Wot Muci ubino Mahli, Eder, man Yeremoth, ceke gin adek.
24 Ju maeno ceke gibino wot Lawi ma jukiewo nying’gi calku thepacu migi man calku jutelwic mi thepacu migi. Jukwanu Julawi ma niai i oro pier ario nidok yo malu man jurieyo nying’gi pi nitimo tic i ot pa Yehova.
25 Kum Daudi uyero kumae: “Yehova Mungu mir Israel umiyo yom ni dhanu pare, man ebibedo i Yeruzalem rondo ku rondo.
26 Julawi de dong’ gibibeyeyo ngo hema mi thier kadi jamtic moko ci ma jutimo ko tic i iye.”
27 Pieno re ma nimakere ku telowic ma tokcen ma Daudi umiyo, jukwanu Julawi ma niai i oro pier ario niidho malu.
28 Tic migi ubino nikonyo wot Arun ku tic mi ot pa Yehova, man nineno wi tic mi lela, wi kusika ma jucamu i iye, nidwoko piny ma leng’ ceke udok leng’, man nineno wi tic moko ci m’ukwayu jutim i ot pa Mungu mandha.
29 Gibed gikonyo niyiko mukathi ma jurodo iwi wadi, mogo ma yom pi girathiera mi nying cam, mukathi m’apada ma thobi mbe i iye, mukathi ma jutedo i atangala, mogo ma junyobo ku mo, man gibed gineno wi jam pimo piny ceke mi pimo kadhiri mi piny man dongo mi piny.
30 Gibed gicungo nja ku kugweno pi nifoyo Yehova man pi nipake, gibed gitimo bende kumeno dhu uthieno.
31 Gibed gikonyo saa ceke ma jubethiero lam m’awang’a ni Yehova i ceng’ Sabatu, i por pa dwi, man i nindo mi foc. Wendgi ubino calku ma cik uketho pigi, gibed gitimo kumeno nja i wang’ Yehova.
32 Gibed gitimo bende tic ma jumiyo igi pi hema mi rombo, pi kabedo ma leng’, man gibed gikonyo umego migi ma gi wot Arun i tic mi ot pa Yehova.
Korolembe mi There
^ I dhu Juebrania: “etii man nindo pare dupa.”
^ I dhu Juebrania: “wot.” I dhu Juebrania wec ma nia “wod” copo nyutho “wod,” “nyakwar,” kunoke “nyikway.”
^ I dhu Juebrania: “wot.”
^ I dhu Juebrania: “umego.”