Lemkei mi kwong’o 26:1-32
26 Jupoko i ungu mi jukur dhugang’ kumae: kud i kind wot Kora, Mecelemia ma wod Kore m’i kind nyikway Asaf.
2 Mecelemia ubino kud awiya ma co ma e: Zekaria ma kayu, Yediael m’ulubo ng’eye, Zebadia mir adek, Yathniel mir ang’wen,
3 Elam mir abic, Yehohanan mir abusiel man Elieho-enai mir abiro.
4 Obed-edom ubino kud awiya ma co ma e: Cemaya ma kayu, Yehozabad mir ario, Yoa mir adek, Sakar mir ang’wen, Nethanel mir abic,
5 Amiel mir abusiel, Isakar mir abiro, man Peulethai mir abora; kum Mungu upoko mugisa i wiye.
6 Man wode ma Cemaya unyolo awiya ma co ma gibino jutela mi thepacu migi, pilembe gibino dhanu ma jurukara man ma giromo.
7 Wot Cemaya ubino Othni, Refael, Obed, man Elzabad; man umego pare Elihu giku Semakia de gibino dhanu ma giromo.
8 Gin ceke gibino wot Obed-edom; gin, wotgi man umego migi gibino dhanu ma giromo man ma gitie ku copo mi timo tic, dhanu pier abusiel wi ario mi ot pa Obed-edom.
9 Mecelemia ubino kud awiya ma co man umego pare, gibino dhanu apar abora ma giromo.
10 Hosa m’i kind nyikway Merari ubino kud awiya ma co. Cimri ubino jatelwic, kum kadok nwang’u ebino ngo kayu de, re won ukethe ni jatelwic;
11 Hilkia mir ario, Thebalia mir adek, Zekaria mir ang’wen. Wot Hosa man umego pare ceke gibino gin apar adek.
12 I kind ungu mi jukur dhugang’ maeni, jutelwic gibino ku tic migi calu umeggi kara gitim i ot pa Yehova.
13 Pieno, gigoyo gagi pi ning’eyo dhugang’ ma tung’ tung’ ma ng’atuman bikuro, nik’ebed ng’atu ma nok kadi ma dit mi thepacu migi.
14 Gagi ugam upodho iwi Celemia pi dhugang’ ma yo nyangu. Gigoyo gagi pi Zekaria ma wode ma jamii juk ma riek, gagi upodho i wiye pi dhugang’ ma yo malu.
15 Gagi upodho iwi Obed-edom pi kuro dhugang’ ma yo piny, man wote ke juketho gikur wi dero.
16 Gagi upodho iwi Cupim giku Hosa pi nikuro dhugang’ ma yo reto, ceng’ini ku dhugang’ ma julwong’o Caleketh i kum yo m’uidho malu, unguman mi kur i kum ungu wagi.
17 Yo nyangu Julawi ubino abusiel; yo malu gibino ang’wen kubang’ nindo man yo piny gibino ang’wen kubang’ nindo; i dhu dero gibino ario ario;
18 i pond ot yo reto gibino ang’wen i kum gengi ma dit, man ario i kum pond ot.
19 Maeni ubino ungu mi jukur dhugang’ m’i kind nyikway Kora man nyikway Merari.
20 I kind Julawi lundo, Ahiya ubed uneno wi kakanpiny mi ot pa Mungu mandha man wi kakanpiny mi piny ma judwoko leng’.*
21 I kind wot Ladan, niwacu wot nyikway Ladan ma Jagercon ubino Yehieli; ebino acel m’i kind jutelwic mi thepacu mi ju pa Ladan,
22 man wot Yehieli ubino Zetham gikud umin ma Yoel. Gibed gineno wi kakanpiny mi ot pa Yehova.
23 I kind Juamram, Juizhar, Juhebron, man Juuziel,
24 Cebuel ma wod Gercom ma wod Musa ubino jatelwic m’ubed uneno wi dero.
25 Umego pare ma gi nyikway Eliezer, ubino Rehabia m’unyolo Yecaya, m’unyolo Yoram, m’unyolo Zikri, man m’unyolo Celomoth.
26 Celomoth maeni man umego pare gibed gineno wi kakanpiny ceke mi piny ma judwoko leng’; piny m’Ubimo Daudi, judongo mi thepacu, judongo mi dhanu elufu ku mi dhanu dak, man ma jutelwic mir udul askari gigam gidwoko leng’.
27 Gidwoko piny moko ma giyaku i lwiny udoko leng’ pi nigwoko ot pa Yehova;
28 man bende piny ceke ma Samwel ma janenlembe, Saul ma wod Kic, Abner ma wod Ner, man Yoab ma wod Zeruya gidwoko leng’. Piny moko ci ma ng’atu moko udwoko leng’ jubed jumiyo i bang’ Celomith man umego pare kara gigwokgi.
29 I kind Juizhar, juketho Kenania man wote nitimo tic ma tung’ tung’ m’uweko tic mi ot pa Mungu kara gibed judongo man jupoklembe i Israel.
30 I kind Juhebron, Hacabia man umego pare gibino dhanu elufu acel ku dak abiro (1 700) ma giromo; gibed gitelo wi Juisrael i ng’om ma yo reto mi kulo Yordan i tic pa Yehova ceke man tic p’ubimo.
31 I kind Juhebron, Yerija ubino jatelwic migi nimakere ku kite ma jukiewo ko thekwaru migi. I oro mi pier ang’wende mi camuker pa Daudi, jutimo sayusac man junwang’u dhanu ma jurukara man ma giromo i kindgi i Yazer i ng’om mi Gilead.
32 Man wend umego pare ubino elufu ario ku dak abiro (2 700), gibino dhanu ma giromo man jutelwic mi thepacu. Pieno, Ubimo Daudi ukethogi gitel wi suru pa Ruben, suru pa Gad, man wi nusu mi suru pa Manase i lembe ceke m’uneno Mungu mandha man ubimo.
Korolembe mi There
^ Kunoke “piny ma juthiero.”