Lemkei mi kwong’o 28:1-21
28 I ng’eye, Daudi ulwong’o judongo ma wijo mir Israel ceke i Yeruzalem: elwong’o judongo ma wijo mi suru, judongo mir ungu ma gitimo tic p’ubimo, judongo mi dhanu elufu ku mi dhanu dak, judongo ma neno wi piny p’ubimo ceke, wi lim pare man wi wote, ku judongo mi kal man dhanu ceke ma tek man ma giromo.
2 E Ubimo Daudi uai ucungo man ewacu kumae:
“Wukewuwinja, umego para man dhanu para. Agam ayenyo kud adundena ceke nia agier ot kara ubed ni kayom ni sanduku mi lembariba pa Yehova, man kara ubed ni dul m’i the tiend Mungu mwa, e ayiko gin ceke m’ukwayere pi giedone.
3 Ento Mungu mandha uwacu ira kumae: ‘Ibigiero ngo ot pi nyinga, kum in i dhanu mi lwiny, man icwiro rimo.’
4 Re kud i kind juruot pa vwa ceke, Yehova Mungu mir Israel ung’iyo an kara adok ubimo iwi Israel pi nja. Kum eng’iyo Yuda ubed jatelwic, man kud i suru pa Yuda eng’iyo ot pa vwa, kud i kind wot vwa ke eng’iyo an kara eketha ni ubimo iwi Israel ceke.
5 Man kud i kind wota ceke, kum Yehova umiyo ira awiya ma co dupa, eng’iyo woda ma Suleman re m’ubed iwi komker pa Yehova kara ecam ker iwi Israel.
6 “Eyero ira kumae: ‘Wodi ma Suleman re ma bigiero ot para man lela para, kum en re m’ang’iye kara ebed woda man abidoko won.
7 Abiketho ker pare bicungo nging’ nging’ pi nja, tek ekeco niworo lembang’ola para man telowic para mi pokolembe calu m’ebetimo kawoni.’
8 Pieno, abeyero i wang’ Israel ceke, ma en e cokiri pa Yehova, man i ith Mungu mwa kumae: Wusay ning’eyo lembang’ola pa Yehova Mungu mwu ceke man wuworgi cuu mandha, kara wucam ng’om ma ber maeni man wuweke ni giralaga ma nja ni wotwu i ng’eywu.
9 “In i woda ma Suleman ke, ponj ning’eyo Mungu pa wuru man tim ire kud adunde ma zoo* man ku pidoic* ma tie ayika; kum Yehova yenyo i adunde ceke, man eneno pidoic ceke m’upondo. Tek iyenye, ebiweko inwang’e; ento tek iweke, ebiwenji pi nja.
10 Kenen, Yehova ung’iyi kara igier ot ma bibedo ni hekalu. Dong’ cwinyi bed tek man cak tic.”
11 I ng’eye, Daudi umiyo ni wode ma Suleman ayi* mi giedo mi pond ot, ku mi ode, mi kusika ma jukanu piny i igi, mi kusika ma yo malu, mi kusika ma yor i iye, man mi ot ma jutimo adunya i iye.
12 Emiyo ire ayi mi giedo mi piny ceke ma tipo unyutho ire pi lela mi ot pa Yehova, pi kusika mi camu ceke m’i ng’ete, pi kakanpiny mi ot pa Mungu mandha, man pi kakanpiny mi piny ma judwoko leng’.*
13 Emiyo bende telowic pir ungu mi julam man mi Julawi, pi tic ceke ma jutimo i ot pa Yehova, man pir ajeni ceke ma jutiyo ko i ot pa Yehova.
14 Enyutho bende pek mi mola ma kwar, niwacu mola ma kwar pir ajeni ceke ma jubitimo ko tic ma tung’ tung’, pek mir ajeni ceke mi mola ma tar, man pek mir ajeni ceke ma jubitimo ko tic ma tung’ tung’.
15 Bende, enyutho pek mi tiend thala mi mola ma kwar, man mi thala mi mola ma kwar m’i wigi, pek mi tiend thala ma tung’ tung’ ku thala m’i wigi, man pek mi tiend thala mi mola ma tar nimakere ku kite ma jubitiyo ko ku tiend thalaman man thala m’i wigi.
16 Enyutho bende pek mi mola ma kwar pi meza mi mukathi ma jurodo iwi wadi,* pi mezaneman, man bende pek mi mola ma tar pi meza mi mola ma tar,
17 pi kanya, pi tabu, pir agulu mi mola ma kwar m’alili, man pek mi nyithi tabu mi mola ma kwar pi nyathi tabuneman, man bende pek mi nyithi tabu mi mola ma tar pi nyathi tabuneman.
18 Bende, enyutho pek mi mola ma kwar ma julilo ku mac ma jubitiyo ko pi pemlam mir udok ma ng’wice ng’ar man pir ayi mi magali, niwacu jukerubi mi mola ma kwar ma giyaru vombgi man ma giumo wi sanduku mi lembariba pa Yehova.
19 Daudi uwacu kumae: “Cing’ Yehova ubino i wiya man emiyo ira rieko m’akiewo ko jamkum ayi mi giedo maeni ceke.”
20 I ng’eye, Daudi uyero ni wode ma Suleman kumae: “Cwinyi bed tek man bed tek, cak bende tic. Lworo kud unegi kadi ndiri de kud ung’oy i ii, kum Yehova Mungu ma en e Mungu para, ni karacelo kudi. Ebiweki ngo kadi ebiwenji de ngo, ento ebibedo kudi nitundo ma tic ceke m’uneno ot pa Yehova bithum.
21 Ungu mi julam man mi Julawi ma gibitimo tic ceke mi ot pa Mungu mandha gini eni. Itie ku jutic ma gi jubodho man ma gitie ayika nitimo kwond tic moko ci; itie bende ku judongo ma wijo man dhanu ceke ma gibilubo telowic peri zoo.”
Korolembe mi There
^ Kunoke “wodh adundeni ceke.”
^ Kunoke “ng’eyong’ec.” Nen Thelembe mi wec iwi “Ng’eyong’ec.”
^ Kunoke “pla.”
^ Kunoke “piny ma juthiero.”
^ Niwacu mukathi m’anyutha.
