Lemkei mi kwong’o 29:1-30
29 Ubimo Daudi ugam uyero ni cokiri ceke kumae: “Suleman ma woda, ma Mungu ung’iyo tie aradu man eng’eyo lembe akeca ngo,* ento tic utie dit m’ukwayu jutim, kum etie hekalu* pa dhanu ngo ento pa Yehova Mungu.
2 Atimo tego para ceke pi niyikara pi ot pa Mungu para; ayiko mola ma kwar pi tic m’ukwayu mola ma kwar, mola ma tar pi tic m’ukwayu mola ma tar, mola pi tic m’ukwayu mola, cuma pi tic m’ukwayu cuma, yen pi tic m’ukwayu yen, kidi oniks man kidi ma jubitelo ku simenti, kidi ma tar, kwond kidi ma pigi tek ceke, man kidi ma tek ma julwong’o alabasta i kadhiri ma lee dit.
3 M’umedo maeno, nikum mer m’amaru ko ot pa Mungu para, ating’o bende mola ma kwar man mola ma tar kud i kum lonyo para gira man abemiyogi pi ot pa Mungu para, m’uweko piny ceke m’ayiko pi ot ma leng’ maeni.
4 Bende mola ma kwar mir Ofir talanto* elufu adek (3 000), man mola ma tar ma julilo ku mac talanto elufu abiro (7 000) pi niumo kor kusika ma tung’ tung’,*
5 mola ma kwar pi tic m’ukwayu mola ma kwar, mola ma tar pi tic m’ukwayu mola ma tar, man pi tic ceke ma jubodho gibitimo. Dong’ ng’a ma giwodhiri pi nimiyo giramiya ni Yehova tini?”
6 E judongo ma wijo mi thepacu, judongo ma wijo mi suru mir Israel, judongo mi dhanu elufu man mi dhanu dak, man jutel wi tic p’ubimo gigam giwodhiri.
7 Man gimiyo mola ma kwar talanto elufu abic (5 000), darik* elufu apar (10 000), mola ma tar talanto elufu apar, mola talanto elufu apar abora (18 000), man cuma talanto elufu dak acel (100 000) pi tic mi ot pa Mungu mandha.
8 Ng’atu moko ci m’ubino ku kidi ma pigi tek uterogi i kakanpiny mi ot pa Yehova, ma Yehiel ma Jagercon re m’ubino neno wiye.
9 Dhanu gibino kud anyong’a nimiyo giramiya maeno ma ku berocwinygi, pilembe gimiyo giramiya ku berocwinygi ni Yehova kud adundegi ceke, man Daudi m’ubimo bende ubino kud anyong’a lee.
10 I ng’eye, Daudi upaku Yehova i wang’ cokiri ceke. Ewacu kumae: “Pak ubed iri pi rondo ku rondo,* E Yehova Mungu pa Israel ma wegwa.
11 E Yehova, dwong’, tego, leng’o, riang’ini, man yung utie peri, kum gin moko ci i polo man iwi ng’om utie peri. Ker utie peri, E Yehova. In kendi re m’itie Ng’atu m’udodere ni wic iwi piny ceke.
12 Lonyo ku dwong’ uai i beng’i, man ibimo wi piny ceke, copo ku tego n’i cingi, man cingi tie ku copo mi dodo malu man mi miyo tego ni dhanu ceke.
13 Man kawoni, E Mungu mwa, wabefoyi man wabepaku nyingi ma leng’.
14 “Enre, an a ng’a man dhanu para en e ang’o ma nia wamii ko giramiya ma ku berocwiny ma rukeni e? Kum gin ceke uai i beng’i, man wamiyo iri gin m’uai de i cingi.
15 Kum i weng’i wan umondo man jurubedo, tap calu ma kwaruwa ceke gibino. Kum nindo mwa gi calu tipopiny man genogen umbe igi.
16 E Yehova Mungu mwa, lonyo maeni ceke ma wacoko dhoge kara wagier ko iri ot pi niyungo nyingi ma leng’, uai kud i cingi in man gin ceke gi peri.
17 E Mungu para, ang’eyo cuu nia ing’iyo i adunde man nia anyong’a negi ka ng’atini ubegwoko bedocu* pare. Amiyo iri ku berocwinya piny maeni ceke kud adundena m’atira,* man anyong’a ubenega lee nineno nia dhanu peri ma gitie kakeni gimiyo iri giramiya ma ku berocwinygi.
18 E Yehova, Mungu p’Abraham, Mungu pa Isak, man Mungu pa Israel ma kwaruwa, keth pidoic man paru maeni ubed i adunde dhanu peri rondo ku rondo, man keth adundegi ubed i beng’i.
19 Mii adunde ma zoo* ni Suleman ma woda, kara ewor lembang’ola peri, poyowic peri, ku telowic peri, man kara etim lembe maeni ceke man egier bende hekalu* m’ayiko piny pire.”
20 I ng’eye, Daudi uwacu ni cokiri ceke kumae: “Kawoni wupak Yehova Mungu mwu.” E cokiri ceke gipaku Yehova Mungu pa kwarugi man girum i ng’om, gipodho arieba wang’gi i wang’ Yehova man i wang’ ubimo.
21 Urwonde gimediri nithiero lam ni Yehova man nithiero bende lam m’awang’a ni Yehova. Githiero nyithi thwoni dhieng’ elufu acel (1 000), nyogi rombe elufu acel, man nyithi nyogi rombe elufu acel, ku girathiera mi pigulok. Githiero lam ma wende lee dit pi Israel ceke.
22 Gicamu man gimadhu i wang’ Yehova cing’ nica kud anyong’a ma dit, man wang’ mir arionde giketho Suleman ma wod Daudi ni ubimo, man giwire i wang’ Yehova ni jatelwic, giwiro bende Zadok ni jalam.
23 Suleman ugam ujany iwi komker pa Yehova calu ubimo kaka Daudi ma won. Lembe ubino miero ire man Juisrael ceke gibino wor ire.
24 Judongo ma wijo ceke, jurumony ma jurukara, man bende wot Ubimo Daudi ceke gijwigiri gigi ni Suleman m’ubimo.
25 Yehova ugam udodo Suleman lee dit i wang’ Israel ceke man emiyo ire dwong’ mi ker m’ubimo moko mbe mir Israel ubino ko yor i wang’e.
26 Daudi ma wod Yese ubimo iwi Israel ceke,
27 man ecamu ker iwi Israel pi oro pier ang’wen. I Hebron ecamu ker pi oro abiro, man i Yeruzalem ke ecamu ker pi oro pier adek wi adek.
28 Man etho m’ekwo ma ber nitundo i tiyo, m’epong’ ku nindo, lonyo, man dwong’; e Suleman ma wode udoko ubimo kakare.
29 Ento kpawa p’Ubimo Daudi niai i acaki nitundo i ajiki, jukiewogi i kind lembe pa Samwel ma janenlembe, pa Nathan ma jabila, man pa Gad ma jaewlembe.
30 Gikoro pi camuker pare ceke, tego pare, man pi lembe ceke m’utimere i saa nica m’umulo kume, kum Israel, man kum ker ceke m’udhoke tingili.
Korolembe mi There
^ Kunoke “ng’ete cok.”
^ Kunoke “ot ma tek; kal.”
^ Talanto acel ubino kilo 34,2. Nen Thenge ma jumedo B14.
^ I dhu Juebrania: “kor udine.”
^ Darik ubino sente mi tongolo mi mola ma kwar mi Jupersi. Nen Thenge ma jumedo B14.
^ Kunoke “niai rondo ku rondo nitundo rondo ku rondo.”
^ Kunoke “bedo m’atira.”
^ Kunoke “m’abombi mbe i iye.”
^ Kunoke “m’uwodhere ceke.”
^ Kunoke “ot ma tek; kal.”
