Lemkei mi kwong’o 5:1-26
5 Maeni gi wot Ruben ma kayu pa Israel. Ebino kayu, ento jumiyo twero pare mi bedo kayu ni wot Yozefu ma wod Israel, pilembe egam ecido kavuto pa won; pieno kinde ma jubekwanu dhanu calku thekwaru, jukwane ngo calku twero pare mi bedo kayu.
2 Kadok nwang’u Yuda ubino dwong’ nisagu umego pare ceke man ng’atu ma bibedo jatela biai kud i bang’e de, re jumiyo twero mi bedo kayu ni Yozefu.
3 Wot Ruben ma kayu pa Israel ubino Hanok, Palu, Hezron, man Karmi.
4 Maeni ubino nyikway Yoel: wod Yoel ubino Cemaya m’unyolo Gog, m’unyolo Cimei,
5 m’unyolo Mika, m’unyolo Reaya, m’unyolo Baal,
6 man m’unyolo Beera m’Ubimo Tilgath-pilneser mir Asiria utero i ng’eca; ebino jadit ma wijo mi suru pa Ruben.
7 Man umego pare ma jukwanugi nimakere ku thekwaru mi wedi migi ubino Yeiel ma jatelwic, Zekaria,
8 man Bela ma wod Azaz, ma wod Cema, ma wod Yoel. Nyikway Bela gibed gikwo i Aroer man cil i Nebo man i Baal-meon.
9 Yo nyangu gibed gikwo nitundo i dhu langa mi dhu Kulo Efrath, kum lim migi unyay lee i ng’om Gilead.
10 I rundi pa Saul, gikiedo lwiny i dhu Juhagri man giloyogi, pieno gibedo i hema migi man i ng’om ceke ma yo nyangu mi Gilead.
11 Nyikway Gad gibed gikwo i ng’etgi i ng’om mi Bacan nitundo i Saleka.
12 I Bacan, Yoel ubino jatelwic, Cafam ulubo ng’eye, man Yanai giku Cafath de gibino nuti.
13 Umego migi mi thepacu migi ubino Mikael, Meculam, Ceba, Yorai, Yakan, Zia, man Eber; ceke gin abiro.
14 Ju maeni gibino wot Abihail ma wod Huri, ma wod Yaroa, ma wod Gilead, ma wod Mikael, ma wod Yecicai, ma wod Yado, ma wod Buz.
15 Jatelwic mi thepacu migi ubino Ahi ma wod Abdiel, ma wod Guni.
16 Gibed gikwo i Gilead, i Bacan, man i nyithindh adhura m’i ng’etgi,* man i luba ceke mi Caron nitundo i thum migi.
17 Jukwanugi ceke calku thekwaru migi i rundi p’Ubimo Yotham mi Yuda man i rundi p’Ubimo Yeroboam* mir Israel.
18 Ju mi suru pa Ruben, mi suru pa Gad, man nusu mi suru pa Manase gibino ku jurumony ma jurukara elufu pier ang’wen wi ang’wen ku dak abiro pier abusiel (44 760) i kind juaskari migi ma gimaku ban, palamularu, man athero;* juponjogi bende cuu pi lwiny.
19 Gikiedo lwiny i dhu Juhagri, i dhu Yethur, Nafic, man Nodab.
20 Kinde ma gibino kiedo kugi, Mungu ukonyogi man umiyo Juhagri ku dhanu ceke ma gibino karacelo kugi i cing’gi, kum gikwaye ekonygi; Mungu udwoko wang’ rwo migi pilembe gigene.
21 Giyaku lim migi; limne ubino ngamia elufu pier abic (50 000), rombe elufu dak ario pier abic (250 000), kana elufu ario (2 000) ku dhanu* elufu dak acel (100 000).
22 Dhanu utho lee dit, pilembe Mungu mandha re m’ubino kiedo lwinyne. I ng’eye gibedo i kabedo mi dhanu maeno nitundo i saa ma jucidho i iye i ng’eca.
23 Nyikwayu mi nusu mi suru pa Manase gibed gikwo i ng’om ma niai i Bacan nitundo i Baal-hermon, i Senir, man iwi got Hermon. Wendgi ubino lee dit.
24 Jutela mi thepacu migi ubino: Efer, Ici, Eliel, Azriel, Yeremia, Hodavia, man Yadiel; gibino jurumony ma jurukara, dhanu ma pigi yik, man jutela mi thepacu migi.
25 Ento gigwoko ngo bedoleng’ migi ni Mungu pa kwarugi man gitimo asara ku mungu mi dhanu m’i ng’ombe, ma Mungu unyotho kud i wang’gi.
26 Pieno Mungu mir Israel ucwalu* Ubimo Pul mir Asiria (niwacu Ubimo Tilgath-pilneser mir Asiria) kara uter suru pa Ruben, pa Gad, man nusu mi suru pa Manase i ng’eca; eterogi i Hala, i Habor, i Hara, man i dhu kulo Gozan. Gibedo keca nitundo tin.
Korolembe mi There
^ Kunoke “m’udhokogi.”
^ Niwacu Yeroboam mir ario.
^ I dhu Juebrania: “ma gigomo athero.”
^ Kunoke “ng’eyong’ec mi dhanu.”
^ I dhu Juebrania: “uting’o cwiny.”
