Samwel mi kwong’o 1:1-28
1 Nwang’u ng’atu moko ubino nuti i Ramathaim-zofim* i ng’om gudi pa Efraim, ma nyinge ubino Elkana. Ebino wod Yeroham ma wod Elihu, ma wod Thohu ma wod Zuf ma Jaefraim.
2 Ebino ku mon ario; nying’ dhakune acel ubino Ana, ma kucelo ke Penina. Penina ubino kud awiya, ento Ana ubino mbe kud awiya.
3 Kubang’ oro, Elkana ubed uai kud i adhura pare man ecidho i Cilo pi nitimo thier* man nithiero lam ni Yehova Mungu mir udul. Kuca re ma wot Eli ario, niwacu Hofni giku Fineas gibed gitimo calu julam ni Yehova.
4 Nindo moko kinde ma Elkana ubethiero lam, emiyo theng girathierane moko ni dhaku pare ma Penina, man ni awiya pa Penina ma co ku ma nyir ceke.
5 Re ni Ana emiyo thenge ma cuu m’usagu zoo, pilembe egam emare lee; ento Yehova umiyo ngo awiya* ni Ana.
6 M’umedo maeno, nyeke ubed unyware saa ceke pi ninyayu can i iye, pilembe Yehova umiyo ngo ire awiya.
7 Ebed etimo kumeno kubang’ oro; ka Ana ubeidho i ot pa Yehova ci, nyeke ubed unyware lee mandha uketho ebed ewak man ecamu de ngo.
8 Ento Elkana ma cware uyero ire kumae: “Ana, iwagu ang’o? Pirang’o ibecamu ngo, man pirang’o itie ku can lee kumeno?* Nyo an a ber ungo iri nisagu awiya ma co apari?”
9 I ng’ey ma gidaru nicamu man nimadhu i Cilo kuca, Ana ugam uai malu. I saa maeno, nwang’u Eli ma jalam ubedo iwi kom i ng’et dhugola mir hekalu* pa Yehova.
10 Ana ubino ku can lee dit i cwinye,* e ecaku rwo i bang’ Yehova man ewak lee dit akeca.
11 Man etimo lembang’ola ku kwong’ kumae: “E Yehova Mungu mir udul, kenen kite m’abesendara ko e; tekene ipoy pira an a jatic peri man wii wil ungo i kum jatic peri, man imiyo nyathin ma nico ni jatic peri, e abimiye iri Yehova i nindo mi kwo pare zoo, man riedi bimulo ngo wiye.”
12 Kinde m’eberwo pi saa ma lee i wang’ Yehova, Eli ubino neno dhoge.
13 Nwang’u Ana ubeweco i adundene, dend dhoge re m’ubino goyere, ento dwande ubino winjere ngo. Pieno Eli uparu nia emer amera.
14 E Eli uyero ire kumae: “Ibimediri ku mero peri no nitundo awene? Wek nimadhu pigulok.”
15 Ana udwoko ire kumae: “Ungo rwoth para! An a dhaku ma can ubenego adundene lee; amadhu ngo pigulok kadi kit kong’o moko ci, ento abekoro lembe m’i cwinya* ni Yehova.
16 Kud inen jatic peri ni dhaku ma kony pare mbe, kum ang’abacwiny man can para ma dit re m’uketho aweco nitundo kawoni.”
17 Eli ulund udwoko kumae: “Cidh ma cwinyi kwiyo, dong’ Mungu mir Israel umii iri gin m’ikwayu i bang’e.”
18 E Ana uwacu kumae: “Wek jatic peri unwang’ bero i weng’i.” Pieno dhakune ucidho, ecamu man can uthum kud i wang’e.
19 Urwonde giai pir kugweno man girum i wang’ Yehova, i ng’eye gidok i pacu migi i Rama. Elkana utimo ribiri ku Ana ma dhaku pare, man Yehova upoy pire.
20 E i kind oro acel* Ana unwang’u ic man enyolo nyathin ma nico; ecaku nyinge Samwel* pilembe eyero kumae: “Akwaye i bang’ Yehova.”
21 I ng’ey kare, Elkana uidho i Cilo ku juruot pare ceke pi nithiero lam ma kubang’ oro ni Yehova man pi nimiyo girathiera ma ku kwong’.
22 Ento Ana uidho ngo, kum eyero ni cware kumae: “Tek nyathin bikwiro cak ci, abitere i wang’ Yehova, man niai saa maeca ebibedo kuca.”
23 E Elkana ma cware uyero ire kumae: “Tim gin m’ubedo ber i weng’i. Bed i pacu nitundo ikwir nyathinne. Dong’ Yehova utim lembe m’iyero.” Pieno dhakune ubedo i pacu, eketho wode udhoth nitundo m’ekwire ku cak.
24 Saa ma nyathinne ukwiro cak ci, Ana uidho kude malu i Cilo; ecidho ku thwon dhiang’ mi oro adek, mogo efa* acel man pigulok agulu acel ma dit. Egam ecidho i ot pa Yehova i Cilo karacelo ku nyathinne.
25 E juthumo thwon dhiang’ man jutero nyathinne i bang’ Eli.
26 Ana ugam uwacu kumae: “Tim ira kisa rwoth para! Tek andha ibedo kwo rwoth para, an re m’atie dhaku ma nindo moko ugam ucungo i ng’eti kakeni pi nirwo i bang’ Yehova.
27 Agam arwo kara anwang’ nyathin maeni, e Yehova umiyo ira gin m’akwayu i bang’e.
28 An lundo kawoni abemiye* ni Yehova. I nindo mi kwo pare zoo ebibedo pa Yehova.”
E erum* keca i wang’ Yehova.
Korolembe mi There
^ Kunoke “i Rama, ma en e nyakwar Zuf.”
^ Kunoke “nirum piny; nirwo; niworo.”
^ I dhu Juebrania: “utwiyo dhug usau nyodo pare.”
^ Kunoke “pirang’o ibewinjiri rac i adundeni?”
^ Niwacu hema.
^ Kunoke “ng’eyong’ec pare ubino kec.”
^ I dhu Juebrania: “abekonjo ng’eyong’ec para.” Nen Thelembe mi wec.
^ Kunoke nyo “i saa m’ukwayere.”
^ Thelembene tie “nying’ Mungu.”
^ Kago litre 22. Nen Thenge ma jumedo B14.
^ I dhu Juebrania: “abemiye ni banja.”
^ Copere eno tie Elkana.