Samwel mi kwong’o 2:1-36
2 E Ana urwo kumae:
“Anyong’a ubenego adundena pi Yehova;tegona umedere nikum Yehova.*
Ayabu dhoga ma lac i kum judegi para,kum anyong’a ubenega pi tic peri mi both.
2 Ng’atu moko mbe ma leng’ calu Yehova,ng’atu moko mbe ma calu in,man cana moko mbe ma calu Mungu mwa.
3 Wuwek niweco ku ting’iri;wec mi kuhaya acel de kud uwok kud i dhogwu,kum Yehova tie Mungu m’ung’eyo lembe ceke,man eporo cuu timo ceke mi dhanu.
4 Athero mi weg tego utur,ento ju ma ng’ic* ginwang’u tego.
5 Ju ma naka gicamu ma ber gicikiri nisayu tic kara ginwang’ cam,*ento ju ma kec ubed unego dong’ kec ubenegogi ngo.
Dhaku m’ubino jamugumba unyolo awiya abiro,ento dhaku m’ubino kud awiya ma co dupa udong’ kende.*
6 Yehova nego man eketho jubedo kwo;*etero piny i Liel,* man eting’o malu ku kuca.
7 Yehova nyayu can, man elonyojo;ejwigo, man edodo malu.
8 Eting’o ju ma ka kitgi mbe kud i utur;eting’o jucan malu kud iwi udhuru mi vuru,*kara eketh gibed karacelo ku judongo ma wijo,man emiyo igi kabedo mi yung.
Kathere mi ng’om gi pa Yehova,man eketho ng’om ma cego cam i wigi.
9 Egwoko dagutielo mi ju m’ugwoko bedoleng’ migi ire,ento jubimiyo dhu ju ma reco i mudho,kum en e nikum tego ngo ma ng’atini loyo.
10 Yehova bing’enyo i ju ma gibekiedo i dhoge* nziki nziki;ebiketho polo bimor i wigi pi ninyutho ng’eicwiny pare i kumgi.
Yehova bipoko lembe nitundo i ajiki mi ng’om,ebimiyo tego* ni ubimo pareman ebimiyo tego ni ng’atu pare ma juwiro.”
11 E Elkana ugam udok i pacu pare i Rama, ento wode udoko jatic pa* Yehova i the telowic pa Eli ma jalam.
12 Ento wot Eli gibino dhanu ma reco; gibed giworo Yehova de ngo.
13 Gibed gitimo kumae i kum gin ma dhanu ucikiri nimiyo ni julam: ka ng’atu moko ubino thiero lam, jatic pa jalam bino ku kanya ma lake adek i cinge saa ma ring’o ubetwak,
14 man eroyo kanyane i agulu, i aole, i aziza, kunoke i agulu ma cinge acel. Jalam ubed uting’o ire gin moko ci ma kanyane ucobo. Gibed gitimo kumeno i kum Juisrael ceke ma gicidho i Cilo.
15 Bende, ma fodi ng’atu m’ubethiero lam uketho ngo juwang’u miyo, jatic pa jalam ubed ubino man eyero ni ng’atune kumae: “Mii ring’o ma juromo vulo avula ni jalam. Kum ebigamu ngo ring’o m’ateda kud i beng’i, ento ring’o ma numu kende.”
16 Ka ng’atune uyero ni jaticne kumae: “Kewek jular juwang’ miyo, ka dong’ i ng’eye iting’ gin moko ci m’iyenyo,”* eyero kumae: “Ungo, miye kawoni, kan ungo abiting’e ku kero!”
17 E dubo mi juticne udoko dit akeca i wang’ Yehova, kum dhanune gibed giworo ngo girathiera ma jubethiero ni Yehova.
18 Nwang’u Samwel ubino timo i wang’ Yehova kinde ma fodi e jalawobi, man ebed ekendo* efodh* mi bongu ma nwang’.*
19 Bende, min ubed uyiko ire nyathi koti ma bote mbe, man ekele ire kubang’ oro saa ma ka gibino ku cware pi nithiero lam ma kubang’ oro.
20 E Eli umiyo mugisa ni Elkana giku dhaku pare man ewacu kumae: “Yehova umii iri nyathin nikadhu kud i bang’ dhaku maeni kaka nyathin ma wumiyo ni Yehova.” E gigam gidok i pacu.
21 E Yehova uneno kisa i kum Ana, pieno enwang’u ic man enyolo awiya ma co mange adek ku jumanyir ario. E jalawobi Samwel umedere nidongo i wang’ Yehova.
22 Nwang’u Eli utii lee akeca, ento ewinjo lembe ceke ma wote gibino timo i kum Juisrael ceke, man ayi ma gibed givuto ko ku jumamon ma gibetimo i dhugola mi hema mi rombo.
23 Ebed eyero igi kumae: “Pirang’o wubemeduru nitimo lembe ma kumeno? Kum gin m’abewinjo dhanu ceke ubeyero piwu tie rac.
24 Ungo, wota, lembe m’abewinjo jubedwoko piwu m’ubewotho i kind dhanu pa Yehova tie ber ungo.
25 Tek ng’atu moko udubo i kum dhanu wadi, ng’atu mange romo kwayu Yehova pire;* ento tek ng’atini udubo i kum Yehova, ng’a ma romo rwo pire?” Ento gikwero niwinjo weggi, kum Yehova ukeco ninegogi.
26 I saa maeno jalawobi Samwel umedere nidongo man ninwang’u bero i wang’ Yehova kud i wang’ dhanu de.
27 Dhanu pa Mungu moko ubino i bang’ Eli man uyero ire kumae: “Yehova uyero kumae: ‘Nyo agam anyuthara ngo kamaleng’ ni ot pa kwaru, kinde ma gibino i ng’eca i Misiri i ot pa Farao?
28 Man ang’iyo kwaru kud i kind suru ceke mir Israel kara ebed jalam para man eidh i dhu pemlam para pi nithiero lam,* pi niwang’u udok ma ng’wice ng’ar, man nikendo efodh* i wang’a; amiyo bende girathiera ceke ma Juisrael* githiero ku mac ni ot pa kwaru.
29 Pirang’o wubecayu* lam para man girathiera para m’ang’olo juthier i ot para? Pirang’o ibemediri niyungo woti nisagu an, ma wubecwey ko ku ng’et piny ma beco mi girathiera ceke mi dhanu para Israeli?
30 “‘Eno re m’uketho Yehova Mungu mir Israel ubeyero kumae: “Andha nwang’u ayero nia ot peri man ot pa kwaru bitimo ira saa ceke.” Ento kawoni Yehova uwacu kumae: “Thelembene dong’ ujik magwei, kum abiyungo ju ma gibeyunga, ento ju m’ubecaya abinenogi ni gin moko ngo.”
31 Nen! nindo ubebino m’abikabu tego peri* man tego m’i ot pa wuru cen, ma dong’ ng’atu moko mbe m’i ot peri ma bikwo nitundo i tiyo.
32 Kinde ma lembe ceke ubewotho ma ber i Israel, ibilund neno jakwor peri i ot para, man ng’atu moko mbe ma bikwo kendo nitundo i tiyo i ot peri.
33 Ng’atu acel m’i ot peri m’abiweko utim iwi pemlam para biketho weng’i bitho man ebing’abu cwinyi,* ento wend dhanu ma dupa m’i ot peri bitho ku palamularu mi dhanu.
34 Bende, lembe ma bitimere i kum woti ario ma Hofni giku Fineas bibedo lanyuth iri: gin ario ceke gibitho ceng’ acel.
35 I ng’eye abing’iyo ira jalam mandha. Ebitimo calku lembe m’adundena yenyo;* abigiero ire ot* ma bigalu man saa ceke ebibedo jalam ni ng’atu m’awiro.
36 Ng’atu moko ci m’udong’ i ot peri bibino man ebirumo conge i wang’e pi ninwang’u sente man lungu mukathi moko, ebiyero kumae: “Ka copere kemii ira tic moko mi bedo jalam, kara anwang’ lungu mukathi moko m’aromo camu.”’”
Korolembe mi There
^ I dhu Juebrania: “tunga udodere malu.” Nen Thelembe mi wec iwi Tung’.
^ Kunoke “ju ma gikier.”
^ I dhu Juebrania: “mukathi.”
^ I dhu Juebrania: “uthwo.”
^ Kunoke “emiyo kwo.”
^ Kunoke “Ceol,” niwacu liel mi dhanu ceke. Nen Thelembe mi wec.
^ Kunoke nyo “udhuru susu.”
^ Kunoke nyo “jubinyayu lworo i ju ma gibepiemiri ku Yehova.”
^ I dhu Juebrania: “ebidodo tung’.” Nen Thelembe mi wec iwi “Tung’.”
^ Kunoke “ubino timo ni.”
^ Kunoke “ma ng’eyong’ec peri thukini i kume.”
^ I dhu Juebrania: “eronyere ku.”
^ Kunoke “bongu mi lin.”
^ Nen Thelembe mi wec.
^ Kunoke nyo “Mungu bipoko lembe pire.”
^ Kunoke nyo “niketho yiro mi lam uidh malu.”
^ Nen Thelembe mi wec.
^ I dhu Juebrania: “nyithindho mir Israel.”
^ I dhu Juebrania: “wubesambu.”
^ I dhu Juebrania: “boti.”
^ Kunoke “ebidaru tego mi ng’eyong’ec peri.”
^ Kunoke “ma n’i adundena man i ng’eyong’ec para.”
^ Niwacu julam bibeai kud i ot pare.