Samwel mi kwong’o 28:1-25
-
Saul ucidho i ba dhaku ma weco ku tipo dhanu m’utho i En-dor (1-25)
28 I nindo maeno, Jufilisti gicoko dhu udul askari migi pi nikiedo i dhu Juisrael. E Akic uyero ni Daudi kumae: “M’umbe jiji, ing’eyo nia in ku dhanu peri wabicidho karacelo kudwu i lwiny.”
2 Daudi udwoko ni Akic kumae: “Ing’eyo cuu gin ma jatic peri bitimo.” Akic udok uyero ni Daudi kumae: “Pieno re m’abikethi ibed jakur kuma mi nja.”*
3 Nwang’u Samwel utho, man Israel ceke giwage man gikunye i adhura ma thugi i Rama. Man nwang’u Saul ukabu cen dhanu ceke ma giweco ku tipo dhanu man ju ma giewo lembe kud i ng’om Israel.
4 Jufilisti gicokiri man gicidh giketho kagonjo migi i Cunem. E Saul ucoko Juisrael ceke man giketho kagonjo migi i Gilboa.
5 Kinde ma Saul uneno kagonjo mi Jufilisti, lworo umake man adundene ucaku dhongo pio pio mandha.
6 Nwang’u Saul upenjo Yehova wang’ dupa, ento Yehova udwoko ngo ire wang’ lembe; dok ebed i lek kadi kud Urim kadok nikadhu kud i bang’ jubila.
7 Tokcenne Saul uwacu ni jutic pare kumae: “Wunwang’ ira ka dhaku ma weco ku tipo dhanu m’utho, e abicidho i bang’e nicipenje ku lembe.” Jutic pare gidwoko ire kumae: “Nen! dhaku moko ma weco ku tipo dhanu m’utho unuti i En-dor.”
8 Pieno Saul uranjere man ekendo bongu mange, e en ku dhanu pare ario gicidho i bang’ dhakune ku diewor. Saul uyero ire kumae: “Akweyi, kan ecopere, kewec ku tipo dhanu m’utho pi ninyutho ira lembe mi nindo m’ubino, man keth ng’atu moko m’abinyutho iri uwok woko i bang’a.”
9 Ento dhakune udwoko ire kumae: “Ing’eyo cuu gin ma Saul utimo, kite m’ekabu ko cen ju ma weco ku tipo dhanu m’utho man ju ma ewo lembe kud i ng’om mir Israel. Dong’ pirang’o imito maka* i uwic kara junega?”
10 Saul ugam ukwong’o ire ku nying’ Yehova, eyero kumae: “Calu andha Yehova bedo kwo, dubo bibedo mbe i wii nyanok de i lembe maeni!”
11 Dhakune uyero ire kumae: “Imito aketh ng’a m’uwok iri?” E edwoko ire kumae: “Keth Samwel re m’uwok ira.”
12 Kinde ma dhakune uneno “Samwel,”* ekok ku tego pare ceke ewacu ni Saul kumae: “Pirang’o iwonda? Karaman itie Saul!”
13 Ubimo uyero ire kumae: “Lworo kud unegi; yer ira, ineno ng’a?” Dhakune udwoko ni Saul kumae: “Aneno ng’atu moko ma calu mungu ubeidho malu kud i ng’om.”
14 E wang’ acel Saul upenje kumae: “Ayine tie nenedi?” Edwoko kumae: “Tie ng’atu moko m’utii re m’ubeidho malu, man ekendo bongu ma bote mbe.” E Saul unyang’ nia eca tie “Samwel,” man erum piny man epodho arieba wang’e, edong’ asu i ng’om.
15 E “Samwel” uwacu ni Saul kumae: “Pirang’o ibesenda man pirang’o iketho julwong’a?” Saul udwoko kumae: “An’i lembe ma tek mi tuko ngo. Jufilisti gibekiedo i kuma, man Mungu de uweka, dong’ ebedwoko ngo ira wang’ lembe nik’ebed nikadhu kud i bang’ jubila, kadi nikadhu kud i lek; pieno re m’alwong’i kara inyuth ira gin m’ukwayu atim.”
16 “Samwel” uwacu kumae: “Pirang’o ibepenjo an, ma ke dong’ Yehova udaru weki man edoko jadhogi e?
17 Yehova bitimo* lembe m’elar eyero nikadhu kud i bang’a: Yehova biyeco ker cen kud i cingi man ebimiye ni wedu ma Daudi.
18 Calu iworo ngo dwand Yehova man inyotho ngo Juamalek m’unyayu ng’eicwiny ma lake tek i iye, eno re m’uketho Yehova ubetimo gin maeni iri tin.
19 M’umedo maeno, Yehova bimiyo Juisrael ku in de i cing’ Jufilisti, man urwo in ku woti wubinwang’a kuni. Yehova bimiyo bende udul askari mi Juisrael i cing’ Jufilisti.”
20 Kinde ma Saul uwinjo lembe ma “Samwel” uyero, e wang’ acel epodho sii i ng’om man lworo ma dit umake. Man tego moko acel de mbe m’udong’ i kume, pilembe nwang’u ecamu ngo cing’ nica duu man diewor traka.
21 Kinde ma dhakune ubino i bang’ Saul man eneno nia can umondo lee i iye, ewacu ire kumae: “An a jatic peri aworo dwendi, aketho kwo para i ariti* man atimo lembe m’iwacu atim.
22 Dong’ kawoni akweyi, winj lembe ma jatic peri ubeyero. Wek aketh nyathi dund mukathi moko i weng’i icam, kara inwang’ tego moko m’imediri ko ku woth peri.”
23 Re ekwero man ewacu kumae: “Abicamu ngo.” Ento jutic pare man dhakune girere asu. Tokcenne ewinjo dwandgi man eai malu kud i ng’om, ebedo iwi pem.
24 Nwang’u dhakune tie ku nyathi dhiang’ ma fulful i pacu, e ethume* nyapio pio man eting’o mogo enyobo ni kwen, i ng’eye etede ni mukathi ma thobi mbe i iye.
25 Ekethogi i wang’ Saul ku jutic pare, e gicamu. I ng’eye giai man gicidho ku diewor.
Korolembe mi There
^ I dhu Juebrania: “jakur wiya nindo ceke.”
^ Kunoke “imito maku ng’eyong’ec para.”
^ Kunoke “gin moko m’ubino nen ve Samwel.”
^ I dhu Juebrania: “bitimo ire gire.”
^ Kunoke “amaku ng’eyong’ec para i cinga.”
^ Kunoke “ethiere.”