Barua mir ario ni Jukorintho 10:1-18
10 Kawoni an a Paulo, abekwayuwu ku molcwiny man bero pa Kristu, an m’a dhanu ma yoo kinde man’i kindwu, ento ayero iwu lembe thwolo thwolo kinde m’ambe kudwu.
2 Abekwayuwu nia ju ma gibeparu nia wabewotho ku kum gilar gilok nen migi, kara saa m’abitundo kuno kud awok ajukgi ku juk ma kwiny.
3 Kum kadok wabewotho calu dhanu mange, wabekiedo ngo lwiny i kum.
4 Pilembe jamlwiny ma wakiedo ko gi mi kum ungo, ento Mungu udwokogi tek pi niredho piny ceke m’ucungo ma tek.
5 Kum waberedho paru ceke ku gin ceke m’udhunjo i dhu ng’eyong’ec pa Mungu, man wabedwoko paru ceke ng’eca kara gibed wor ni Kristu;
6 man watie ayika nimiyo matira ni ng’atu m’utimo gin moko ci m’uturo cik, ka waneno nia woro mwu uromo kakare.
7 Wubeneno piny nimakere kud ayi ma ginen ko yo woko. Tek ng’atu moko uyiyo andhandha yor i iye nia etie pa Kristu, ek’epar i lembe ma e kendo: Wan de wa pa Kristu, tap calu en.
8 Lewic binega ngo kadok nwang’u ubekwayu nia akelulara kadhiri moko pi dito ma Rwoth umiyo ira mi gierowu agiera, ento mi nyothowu anyotha re ngo.
9 Abemito ngo wuwok wunwang’ nia ve abemito nyayu ndiri i iwu nikadhu kud i barua para.
10 Kum jubeyero kumae: “Barua pare gi pek man gitie ku tego i igi, ento ka en gire etuc keni kabang’e de mbe, wec pare de gi ng’ic.”
11 Dhanu ma gibeweco kumeno ging’ey nia gin ma wabekiewo i barua mwa utie tap gin ma wabitimo kinde ma wabitundo kuno.
12 Kum wang’ap ungo niyero nia watie rom ku dhanu moko ma gidodiri gigi man waporara ngo kugi. Kum kinde ma gibepimiri nimakere ku gin ma de gibeparu gin gigi nia utie cuu, eno nyutho nia gi jukusegu.
13 Kadok kumeno de, wabelulara ngo nikadhu kieu mi therithwar mwa, ento wabelulara i therithwar ma Mungu miyo iwa ma wun bende wun’i iye.
14 I andha, wabekadhu ngo kieu mi therithwar mwa calu ve nia nwang’u etundo ngo i beng’wu, kum wan re ma wabino ma kwong’a nirweyo lembanyong’a iwi Kristu nitundo i beng’wu.
15 Wabeyungara ngo pi tic ma ng’atu mange utimo en i ng’ey kieu mi therithwar ma jumiyo iwa, ento wageno nia kinde ma yiyoyic mwu ubemedere nidongo, tic ma watimo de bimedere i wang’e i therithwar mwa. Pieno wabitimo nisagu,
16 kara wacidh warwey lembanyong’a i ng’om ma bor nikadhu kaka ma wun’i iye, e wabiyungara ngo pi tic ma ng’atu mange udaru timo i therithwar pare.
17 “Ento ng’atu m’uyungere, wek eyungere pi Yehova.”
18 Kum Yehova jolo ngo ng’atu m’ubedodere gire, ento ejolo ng’atu m’eng’iyo nia ejol.
