Barua mir ario ni Jukorintho 6:1-18
6 Calu ma wabetimo karacelo ku Mungu, wabekwayuwu bende nia kud wujol bero ma yawe mbe pa Mungu mi mananu.
2 Kum eyero kumae: “I saa m’uyiyere awinji, man i nindo mi both akonyi.” Nen! Eni tap re m’utie saa m’uyiyere. Nen! Eni re m’utie nindo mi both.
3 Wamito ngo watim gin moko ci ma romo ketho ng’atu moko kier, kara kud juwec rac i kum tic mwa;
4 ento wabenyuthara giwa i lembe ceke nia watie jutic pa Mungu, nikadhu kud i amulaic dupa ma wabeciro, masendi, canpiny man peko;
5 jubefwodowa, jutwiyowa i kol, junyayu yakini i wiwa, wabemulara ku tic ma tek, nindo ubekeng’ i wang’wa ku diewor, man wabekoso cam;
6 nikadhu kud i leng’o, ng’eyong’ec, mwonyolembe hai, bedo ber ku dhanu, tipo ma leng’ man mer m’umbe umbili;
7 nikadhu kud i lemandha ma wabeyero, man tego pa Mungu, nikadhu kud i jamlwiny mi bedopwe ma n’i cing ma yor acwic* kud i cing ma yor acam,*
8 jubeyungowa man jubenyayu lewic i wiwa, jumoko ubecido nyingwa jumange ke ubeyero piwa ber. Jubenenowa ni jundra kun ke wayero lemandha,
9 ve jung’eyowa ngo ma ke jung’eyowa cuu, ve ju m’ubetho* ento nen! Watie kwo, ve ju m’unwang’u matira ento jung’olo ngo tho i wiwa;
10 dhanu paru nia can utie i adundewa ma ke lundo anyong’a re m’ubenegowa saa ceke, giparu nia watie jucan ento wabelonyo dhanu dupa, nia wakoso piny ento watie ku piny ceke.
11 Waweco i beng’wu thwolo thwolo wu Jukorintho, man wayabu adundewa ma lac.
12 Wabeketho ngo mupaka i mer ma wamaru kowu,* ento wun wubeketho mupaka i mer ma wumaru kowa.
13 Pieno aweco i beng’wu calu i bang’ nyithindho para, akwayuwu wutim iwa calu ma wan de watimo iwu: Wuyab adundewu ma lac.*
14 Kud wuriburu karacelo ku ju ma gi juyic ungo. Kum winjiri ma kani m’utie i kind bedopwe ku turocik? Kunoke nyo der giku mudho girombo de?
15 M’umedo maeno, winjiri ma kani m’utie i kind Kristu giku Belial?* Kadi winjiri ma kani m’utie i kind jayic ku jayic ungo?
16 Man winjiri ma kani ma hekalu pa Mungu utie ko kud ayi gin m’acwiya? Kum watie hekalu pa Mungu ma kwo, tap calu ma Mungu uyero kumae: “Abibedo i kindgi, abiwotho i kindgi, abibedo Mungu migi man gibibedo dhanu para.”
17 “‘Ka kumeno, wuwok cen kud i kindgi man wukoyuru giwu,’ Yehova wacu, ‘man kud wumul gin m’ucido’”; “‘e abijolowu.’”
18 “‘Abidoko iwu Wego, man wubidoko wota ku nyiga,’ Yehova ma Jategokpo uwacu.”
Korolembe mi There
^ Copere pi nigoyo.
^ Copere pi nicero bang’jo.
^ Kunoke “ju ma juneno nia giromo ku tho.”
^ Kunoke “wutie ngo arida i iwa.”
^ Kunoke “wuyeburu.”
^ Eai kud i wec moko mi dhu Juebrania ma thelembene tie “ma kony pare mbe.” Keni ebenyutho Sitani.
