Lemkei mir ario 16:1-14
16 I oro mi pier adek wi abusiende mi camuker pa Asa, Baca m’Ubimo mir Israel ubino pi nikiedo i kum Yuda, man ecaku giero* Rama pi nicero ng’atu moko ci kud uwoki, kadi kud umondi i bang’* Asa m’Ubimo mi Yuda.
2 E Asa uwodho mola ma tar ku mola ma kwar kud i kakanpiny mi ot pa Yehova man mi ot* p’ubimo, eorogi ni Ubimo Ben-hadad mi Siria ma nwang’u ubedo i Dameski, ewacu kumae:
3 “Lembariba tie i kindwa wakudi man i kind vwa giku wuru. Aoro iri mola ma tar man mola ma kwar moko eno. Dong’ tur lembariba m’i kindwu wuku Baca m’Ubimo mir Israel cen, kara eloki kud i ng’om para.”
4 Ben-hadad uwinjo ubimo Asa man eoro judongo mir askari pare gicidh gikiedo i kum adhura mir Israel, e girwombo Iyon, Dan, Abel-maim man kakanpiny ceke mir adhura mi Nafthali.
5 Kinde ma Baca uwinjo lembene, e wang’ acel eweko nigiero* Rama man ejigo tije.
6 I ng’eye, Ubimo Asa ucoko dhanu mi Yuda ceke, man giyeyo kidi ku yen ma Baca ubino giero ko Rama, man egiero kugi* Geba man Mizpa.
7 I saa maeno, Hanani ma janenlembe ubino i bang’ Ubimo Asa mi Yuda man ewacu ire kumae: “Calu m’ijengiri iwi ubimo mi Siria ento ijengiri ngo iwi Yehova Mungu peri, eno re m’uketho juaskari p’ubimo mi Siria giboth kud i cingi.
8 Nyo Juethiopia ku Julibya gibino udul askari ma dit akeca ma gitie ku magali man ku juring riuni* ngo? Ento pilembe ijengiri iwi Yehova, emiyogi i cingi.
9 Kum wang’ Yehova uberingo kun ku kun iwi ng’om zoo, kara enyuth tego* pare pi nikonyo ju m’adundegi tie zoo i bang’e.* I lembe maeni, itimo kasegu; niai kawoni, lwiny bicok ungo i kumi.”
10 Ento ng’eicwiny umaku Asa i kum janenlembe man ebole i kol pilembe kwinyo uopo i iye i kume pi lembe maeni. Man i saa maeno, Asa ucaku sendo dhanu mange m’i kind lwak.
11 Jukiewo kpawa pa Asa niai i acaki nitundo i ajikine, i Buku mi Jubim mi Yuda man mir Israel.
12 I oro mi pier adek wi abung’wende mi camuker pa Asa, tho moko umaku tiende man thoje umedere lee mandha; kadok kinde m’ebetwoyo, elokere ngo i bang’ Yehova, ento elokere i bang’ jukeykum.
13 I ng’eye Asa uvuto pi niyom karacelo ku kwaru pare; etho i oro mi pier ang’wen wi acende mi camuker pare.
14 Pieno juyike i liel ma dit m’eroko ire gire i adhura pa Daudi, man jupiele iwi kavuto ma jupong’o ku moj balsam man mo ma segi mi wir ma jujebo ku piny ma tung’ tung’ ma ng’wicgi ng’ar. M’umedo maeno, jukudho mac ma dit mandha pi niyunge.*
Korolembe mi There
^ Kunoke “ecaku dwoke tek; egiere kendo.”
^ Kunoke “kud uai, kadi kud umond i ng’om pa.”
^ Kunoke “kal.”
^ Kunoke “eweko nidwoke tek; nigiere kendo.”
^ Kunoke “edwoko kugi tek; egomo kugi kendo.”
^ Kunoke “kana mi lwiny.”
^ Kunoke “tiel.”
^ Kunoke “ju m’adundegi uwodhiri zoo ire.”
^ Ubenen kamaleng’ nia mac maeni juwang’u ko ngo Asa, ento juwang’u ko piny ma ng’wicgi ng’ar.
