Samwel mir ario 1:1-27
1 I ng’ey tho pa Saul, kinde ma Daudi udwogo m’eai eloyo* Juamalek, ebedo i Ziklag pi nindo ario.
2 I nindo mir adege, ng’atu moko utundo m’eai i kagonjo pa Saul ma bongu pare uyec man kud utur i wiye. Kinde m’etundo i bang’ Daudi, erum piny man epodho arieba wang’e i ng’om.
3 Daudi upenje kumae: “Iai kani?” Edwoko kumae: “Aringo kud i kagonjo mir Israel.”
4 Daudi upenje kendo kumae: “Lembe ukadhu nenedi? Akweyi kekor ira.” E edwoko ire kumae: “Dhanu uringo kud i lwiny, man ju dupa gipodho man githo. Kadok Saul ku wode ma Yonathan de githo.”
5 I ng’eye, Daudi upenjo jalawobi maeno m’ukelo ire kwenda kumae: “Ing’eyo nenedi nia Saul giku wode ma Yonathan githo?”
6 E jalawobine udwoko kumae: “Mbwang’ kumeni anwang’ara iwi got Gilboa, man aneno Saul ujengere iwi tong’ pare, e ju ma ringo ku magali man kana gibino ceng’ini i vute.
7 Kinde m’elokere man enena, elwong’a, e ayii nia, ‘anuti!’
8 Epenja nia, ‘in i ng’a?’ Adwoko ire nia, ‘an a Jaamalek.’
9 E eyero kumae: ‘Akweyi, cor ceng’ini i kuma man inega, kum an’i litho ma dit, ento fodi akwo.’*
10 Pieno acoro i vute man anege, pilembe ang’eyo nia ebiboth ungo; kum nwang’u epodho m’etie ku ret ma lee. I ng’eye, ating’o jamker mi wic m’ubino i wiye man mangil m’ubino i cinge, e akelogi eni i bang’ rwoth para.”
11 Daudi ugam umaku bongu pare man eyece; dhanu ceke ma gibino karacelo kude de gitimo kumeno.
12 E gigoyo nduru, giwak man gikwiro cam de nitundo uthieno pi Saul, pi wode ma Yonathan, pi dhanu pa Yehova, man pi ot mir Israel, kum junegogi ku palamularu.
13 Daudi upenjo jalawobi m’ukelo ire lemkwendane kumae: “In i dhanu ma kani?” Edwoko kumae: “An a wod umondo ma Jaamalek.”
14 I ng’eye, Daudi upenje kumae: “Pirang’o lworo unegi ngo niting’o cingi pi ninego ng’atu ma Yehova uwiro?”
15 E Daudi ulwong’o ng’atu acel m’i kind awobi ma ni kude man eyero kumae: “Kadh i kume man inege.” E egoye man enege.
16 Daudi uyero ire kumae: “Rimbi n’i wii giri, pilembe dhogi giri re m’utuco lembe i kumi kinde m’iyero nia, ‘an re m’anego ng’atu ma Yehova uwiro.’”
17 I ng’eye, Daudi uwero wer wak ma e pi Saul giku wode ma Yonathan,
18 man eyero nia ukwayu juponj dhanu mi Yuda ku wer ma julwong’o “Athero.” Man jukiewo werne i buku pa Yacar kumae:
19 “E Israel, leng’o peri uvuto ni avu kaka m’uting’ere.
Aka, jurukara gipodho maa!
20 Kud wukor lembene i Gath;kud wutwong’e i gengi mi Ackelon,maru anyong’a binego anyira mi Jufilisti,maru mutoro binego anyira mi ju ma jutimo ngo yaa i kumgi.
21 Wun wu gudi mi Gilboa,dong’ thoi kud ung’ier i wiwu, kadok koth de kud ucwii i wiwu,kadi podho m’i wiwu de kud uceg giramiya ma leng’,kum jucido ban mi jurukara i wiwu,man ban pa Saul dong’ jubiwiro ngo kendo ku mo.
22 Athero pa Yonathan ubed udok ungo ku ng’eyekud i wang’ rimb avu kadi kud i wang’ miyo mi jurukara,palamularu pa Saul ubed udwogo ngo mananu.
23 Saul giku Yonathan gibino dhanu ma ber* man ma jumaru i kwo migi,man kinde ma githo gipokiri ngo.
Kumgi ubino rep ma sagu kum acur,gibino tek ma sagu umvor.
24 E nyi Israel, wuwag Saulm’ubed uronyowu ku kendi ma kwar ngbo man ma juruko ma ber,m’ubed uketho jamruko mi mola ma kwar iwi kendi mwu.
25 E Israel, jurukara gipodho i lwiny!
Yonathan uvuto ni avu iwi kaka m’uting’ere peri!
26 Can ubenega lee piri umira Yonathan;piri ubino tek akeca i iya.
Mer m’imara ko ubino lee ira nisagu mer ma mon umara ko.
27 Aka, jurukara gipodhoman jamlwiny ginyothiri!”
Korolembe mi There
^ Kunoke “eai enego.”
^ Kunoke “pilembe ng’eyong’ec para zoo fodi n’i iya.”
^ Kunoke “ma nyang’ujo.”
