Samwel mir ario 22:1-51
22 E Daudi uwero wer maeni ni Yehova i nindo ma Yehova ubodhe kud i cing’ jukwor pare ceke man kud i cing’ Saul.
2 Eyero kumae:
“Yehova en e cana para, ot ma tek para man Ng’atu ma bodha.
3 Mungu para en e cana para m’apondo i iye,ban para man tung’* para mi both,* kapondo para ma museme,*karingo para man jalarna; in re m’ibodha kud i cing’ dhanu ma jurop.
4 Abekwayu Yehova m’uromo ku pak,man ebibodha kud i cing’ judegina.
5 Mujanga mi tho ucorere i ng’eta gbur;angongo mi pii mi dhanu ma kony migi mbe unyayu ndiri i iya.
6 Thol mi Liel* udhoka;tho uketho uwic i wang’a.
7 I can para, akwayu Yehova,amedara nilwong’o Mungu para.
E kud i hekalu pare, ewinjo dwanda,man wak para m’akwayu ko kony utundo i ithe.
8 Ng’om ucaku yengere man emiel,kathere mi polo umiel krrman eyengere kun ku kun pilembe junyayu ng’eicwiny i Mungu.
9 Yiro uidho malu kud i odi ume,man mac m’ubegegini uwok kud i dhoge;cugimac m’ubogere uwok kud i iye.
10 Kinde m’ebeloro, elung’o polo piny,man mudho ma col bii ubino i the tiende.
11 Eidho iwi jakerubi man eringo.
Junene ebebino iwi vomb malaika.*
12 Egam eketho mudho ubed ni hema i ng’ete gbur,eumere kud afuru m’upong’ ku pii i iye man ma col bii.
13 Kud i der ma n’i wang’e, cugimac m’ubogere uwotho kilere.
14 E Yehova ucaku mor kud i polo;Ng’atu ma Malu ngbir uketho dwande uwinjere.
15 Ekilo athero man elalu judegi pare;eketho lukoth umil man enyotho wigi.
16 The nam unen terere,kathere mi ng’om uwok kamaleng’ nikum kwinyo pa Yehova,nikum lietho mi yuyo m’uwok kud i odi ume.
17 Erieyo cinge ku malu;emaka man epeya kud i pii ma thuc.
18 Ebodha kud i cing’ jadegina ma tek,kud i cing’ ju m’udaga, ma gibino tek nisaga.
19 Gicokiri i wiya i nindo mi masendi para,ento Yehova utiela.
20 Etera kaka ma tie museme;*ebodha pilembe anyong’a unege i kuma.
21 Yehova umiyo ira sukulia nimakere ku bedopwe para;eculo ira pilembe cinga unyotho ngo lembe moko.*
22 Kum saa ceke awotho i yo pa Yehova,man adubo ngo, niwacu aweko ngo Mungu para.
23 Lembapoka pare ceke n’i wang’a;abilokara cen ungo kud i kum cik pare.
24 Abibedo ma kosa mbe i wiya i wang’e,man abigwokara kara kud apodh i dubo.
25 Dong’ Yehova ucul ira nimakere ku bedopwe para,man pilembe anyotho ngo lembe moko i wang’e.
26 Ni ng’atu m’ugwoko bedoleng’ pare, inyutho bedoleng’;ni ng’atu ma tek ma kosa mbe i wiye, itimo m’umbe kosa;
27 ni ng’atu ma leng’, inyuthiri giri leng’,ento ni ng’atu m’ugondere, itimo ku rieko.*
28 Kum ibodho ju ma gijwigiri,ento weng’i n’i kum jukuhaya, man ijwigogi.
29 Kum in i thala para, E Yehova;tie in i Yehova re m’ilero mudho ma an’i iye.
30 Ku kony peri, acopo cidho i kum udul mi weg ayeki;nikum tego pa Mungu, aromo piey ku wi gang’kidi.
31 Yo pa Mungu mandha tie leng’;lembe pa Yehova tie tetete.
Mungu en e ban ni dhanu ceke ma gibesayu kapondo i bang’e.
32 Kum ng’a ma tie Mungu, tung’ ku Yehova?
Man ng’a ma tie cana, m’uweko Mungu mwa?
33 Mungu mandha en e ot ma tek para ma nging’ nging’,man ebidwoko yo para atira.
34 Edwoko tienda rep calu tiend ruda;eketho acungo kaka m’uting’ere.
35 Eponjo cinga pi lwiny;bota copo gomo atumb athero mi mola.
36 Imiyo ira ban peri mi both,man jwigiri peri doda.
37 Iyabu gengi ma lac kara awoth i iye,tienda* bikier ungo.
38 Abiriemo tok judegina man abinegogi ceke;abiloko ngo ka fodi adarugi ceke ngo.
39 Abidarugi cen man abirungo igi ma dong’ gicopo ai malu kendo ngo;gibipodho i the tienda.
40 Ibimiyo ira tego pi nikiedo lwiny;ibiketho jukwor para gibirwombiri i the tienda.
41 Ibiketho judegina gibiloko kud i wang’a;*abijigo* wi ju ma gidaga.
42 Gibewak nia jukonygi, ento ng’atu moko mbe ma romo larugi;gibewak kadok i bang’ Yehova, ento ebedwoko ngo igi lembe moko.
43 Abirego igi ma yom calu utur mi ng’om;abirungo igi man abinyono igi calu ucodho mi gengi.
44 Ibilara kud i cac mi dhanu para.
Ibigwoka kara abed jatelwic mi thek;dhanu ma nwang’u ang’eyo ngo gibitimo ira.
45 Juwirok gibibino rum i wang’a ma kumgi ubemiel;lembe ma giwinjo pira biketho gibiwora.*
46 Tegocwiny mi juwirok bithum;gibiwok kud i udi ma tek migi ma kumgi ubemiel.
47 Yehova tie kwo! Pak ubed ni Cana para!
Dong’ Mungu para ma tie cana ma bodha unwang’ yung.
48 Mungu mandha culo kwor pira;eketho dhanu doko wor i the loc para;
49 Ebodha kud i cing’ judegina.
Iting’a malu iwi ju ma gibino i kuma;ibodha kud i cing’ jarop.
50 Pieno re m’abidwoko foyofoc iri i kind dhanu mi thek mange, E Yehova,man abipaku* nyingi ku wer.
51 Etimo tic ma dongo pi nibodho* ubimo pare;enyutho mer ma lokere ngo ni ng’atu pare ma juwiro,ni Daudi man ni nyikwaye* pi nja.”
Korolembe mi There
^ Nen Thelembe mi wec.
^ Kunoke “jalarna ma tek.”
^ Kunoke “kaka ma malu.”
^ Kunoke “Ceol,” niwacu liel mi dhanu ceke. Nen Thelembe mi wec.
^ Kunoke “tipo; yamu.”
^ Kunoke “kaka ma lac.”
^ I dhu Juebrania: “cinga leng’.”
^ Kunoke nyo “itimo calu jakasegu.”
^ Kunoke “ufuny tienda.”
^ Kunoke “ibimiyo ira ng’ey judegina.”
^ I dhu Juebrania: “abifungo dhoggi.”
^ I dhu Juebrania: “kinde ma gibiwinjo ku ithgi, gibiwora.”
^ Kunoke “abigoyo mizik.”
^ Kunoke “emiyo aloci ma dongo.”
^ I dhu Juebrania: “kodhine.”
