Samwel mir ario 23:1-39
23 Maeni en e lembe ma tokcen ma Daudi uyero:
“Wec pa Daudi ma wod Yese,en e wec pa ng’atu ma judodo malu,ng’atu ma Mungu pa Yakobo uwiro,jagoy wer ma mit mir Israel.
2 Tipo pa Yehova uweco nikadhu kud i bang’a;lembe pare ubino iwi leba.
3 Mungu mir Israel uweco;Cana mir Israel uwacu ira kumae:
‘Ka ng’atu m’ubimo wi dhanu tie ng’atu m’atira,man ebebimo m’elworo Mungu,
4 e bimobim pare bedo calu der mi kugweno kinde ma ceng’ ucaru piny,calu piny m’uruu m’umbe afuru.
Ebedo calu der i ng’ey kothma ketho lum twii kud i ng’om.’
5 Nyo ot para utie ngo kumeno i wang’ Mungu?
Kum etimo lembariba ma rondo ku rondo kuda,jupangu lembaribane tie ayika man elokere ngo.
Lembaribane tie both para ma ceke man gin ma nyayu anyong’a i iya;nyo pi thelembe maeno ngo re m’eketho emedere?
6 Jubicoro dhanu ma kony migi mbe ceke calu yend ukudho m’udinyo,kum jucopo cokogi ngo ku cing’.
7 Kinde ma ng’atu moko ubemulo kumgi,ukwayu ebed ku jamlwiny mi cuma i cinge man yend tong’,man jucikiri niwang’ugi pet ku mac i kakagi.”
8 Maeni gi nying’ jurumony adek ma gi jurukara pa Daudi: Yoceb-bascebeth ma Jatakemoni. Etie jatelwic mi jurumony adek ma gi jurukara. Nindo acel enego dhanu dak abora ku tong’ pare.
9 M’ulube ubino Eleazar ma wod Dodo ma wod Ahohi; ebino i kind jurumony adek ma gi jurukara ma gicidh giroko Jufilisti giku Daudigi. Jufilisti gigam gicokiri pi nikiedo lwiny kuca, man saa ma dhanu mir Israel giloko ku ng’eygi,
10 ecungo asu i dhu Jufilisti man emedere asu ninegogi, nitundo ma cinge ujony man cinge utal nikum palamularu m’emaku. E cing’ nica Yehova ukelo aloci* ma dit, man Juisrael giloko i tok Eleazar pi niciyaku avu.
11 M’ulube ubino Cama ma wod Age ma Jaharari. Jufilisti gigam gicokiri i Lehi, keca podho moko ubino nuti ma ralang’ bik i iye; man juaskari giringo Jufilisti.
12 Ento Cama ucungo i die podhone man ecero bang’ podhone. Emedere ninego Jufilisti, e Yehova umiyo aloci* ma dit.
13 Dhanu adek m’i kind jutelwic pier adek giloro i bang’ Daudi i saa mi kayucam kinde m’ebedo i oding’om mir Adulam, man nwang’u ungu* moko mi Jufilisti gigonjo i poga* mi Jurefaim.
14 Nwang’u Daudi ubedo i ka ma tek, man Jufilisti giketho kagonjo migi moko ma nok i Bethlehem.
15 I ng’eye, Daudi unyutho ava m’etie ko, ewacu kumae: “Aka, nwang’u akeamadh ndhu pii mi kulo m’atong’a m’i dhugang’ mi Bethlehem!”
16 E jurumony adek ma jurukara gikakiri i kagonjo mi Jufilisti man gitwomo pii kud i kulo m’atong’a ma n’i dhugang’ mi Bethlehem gidwogo ko ni Daudi. Ento ekwero nimadhe man eoye i ng’om ni Yehova.
17 Eyero kumae: “E Yehova, etie lembe ma copere ngo ira nitimo gin maeni! Nyo acikara nimadhu rimb dhanu ma giketho kwo* migi i ariti pi nicitwomo pii maeni?” Pieno, ekwero nimadhe. Eno tie lembe ma jurumony ma gi jurukara adek pa Daudi gitimo.
18 Abicai m’umin Yoab ma wod Zeruya ubino jadit mi jurumony ma gi jurukara adek mange; enego dhanu dak adek ku tong’ pare, man en de pire ung’eyere nia e calu juadek ma kwong’a.
19 Kadok nwang’u pire ung’eyere lee nisagu juadek m’ebino jadit migi de, re etundo ngo ka tiend juadek ma kwong’a.
20 Benaya ma wod Yehoyada ubino ng’atu ma cwinye tek,* man etimo lembe dupa ma dongo i Kabzeel. Enego awiya ma co ario pa Ariel mi Moab, eloro bende i vuj pii ecidh enego umvor i nindo mi pei.
21 Enego bende Jamisiri moko m’udongo lazangara mandha. Nwang’u Jamisirine ubino ku tong’ i cinge, re ecidho i dhoge kud uluth man emayu tong’ pa Jamisirine kud i cinge, e enege ku tong’ parene.
22 Eno tie lembe ma Benaya ma wod Yehoyada utimo, man en de pire ung’eyere nia etie calu jurumony adek ma gi jurukara.
23 Kadok nwang’u pire ung’eyere nisagu dhanu pier adek de, ento etundo ngo ka tiend jurumony adek ma jurukara. Re Daudi ukethe ni jadit mi jukur kume.
24 Asahel m’umin Yoab ubino i kind juaskari pier adek ma e: Elhanan ma wod Dodo mi Bethlehem,
25 Cama ma Jaharod, Elika ma Jaharod,
26 Helez ma Japalthi, Ira ma wod Ikec ma Jatekoa,
27 Abiezer ma Jaanathoth, Mebunai ma Jahuci,
28 Zalmon ma Jaahohi, Maharai ma Janetofa,
29 Heleb ma wod Baana ma Janetofa, Itai ma wod Ribai mi Gibea m’i ng’om mi suru pa Benjamin,
30 Benaya ma Japirathon, Hidai mi poga* mi Gac,
31 Abi-albon mi Beth-araba, Azmaveth mi Bahurim,
32 Eliaba ma Jacalbim, wot Yacen, Yonathan,
33 Cama ma Jaharari, Ahiam ma wod Carar ma Jaharari,
34 Elifelet ma wod Ahasbai ma wod Jamaakath, Eliam ma wod Ahithofel mi Gilo,
35 Hezro ma Jakarmel, Parai mir Arabia,
36 Igal ma wod Nathan mi Zoba, Bani ma Jagad,
37 Zelek ma Jaamon, Naharai ma Jaberoth m’ubino jayey jamlwiny pa Yoab ma wod Zeruya,
38 Ira ma Jaithri, Gareb ma Jaithri,
39 man Uria ma Jahithi; ceke gibino dhanu pier adek wi abiro.
Korolembe mi There
^ Kunoke “both.”
^ Kunoke “both.”
^ Kunoke “pacu mi hema.”
^ Kunoke “pambu mi poga.”
^ Kunoke “ng’eyong’ec.”
^ I dhu Juebrania: “wod ng’atu ma jarukara.”
^ Nen Thelembe mi wec.
