Ubimo mir ario 11:1-21
11 Kinde m’Athalia ma min Ahazia uneno nia wode udaru tho, eai malu man enego dhanu ceke ma copo dok camu ker.*
2 Ento Yehoceba ma nyaku p’Ubimo Yehoram ma nyamin Ahazia uting’o Yehoac ma wod Ahazia man ekwale kud i kind wot ubimo ma nwang’u jubecinego, egwoke karacelo ku japidi pare i kusika mi vuto ma yor i iye. Kumeno re ma jukane ni Athalia, e judong’ junege ngo.
3 Jukane karacelo ku japidi pare i ot pa Yehova pi oro abusiel, man saa maeno Athalia ubino bimo iwi ng’ombe.
4 I oro mir abirone, Yehoyada uoro kwenda i bang’ judongo mi juaskari dak ma gikuro kum ubimo* man ma gikuro kal,* man eketho gibino i bang’e i ot pa Yehova. Etimo lembariba kugi man eketho gikwong’o kwong’ i ot pa Yehova, i ng’eye enyutho igi wod ubimo.
5 Eng’olo igi kumae: “Wubitimo lembe ma e: wubipoko i ungu ma bitimo i ceng’ Sabatu ni adek; ungune acel bikuro ot* p’ubimo cuu mandha,
6 ungu mir arionde bibedo i dhugang’ ma julwong’o Kathere, ungu mir adege bibedo i dhugang’ ma n’i ng’ey jukur mi kal. Wubilewuru alawa pi nigwoko hekalu.*
7 Ungu mwu ario ma nwang’u gimbe ku tic i ceng’ Sabatu de gicikiri nikuro kum hekalu pa Yehova cuu mandha pi nigwoko ubimo.
8 Wucikuru nitieko kum ubimo tingili, ng’atuman ku jamlwiny pare i cinge. Ng’atu moko ci m’ubemito kakere kud i kindwu, wucikuru ninege cen. Wubed karacelo kud ubimo kakare ceke m’ebecidho i iye.”*
9 E judongo mi juaskari dak gitimo tap gin ma Yehoyada ma jalam ung’olo. Pieno, ng’atuman ucoko dhanu pare ma gibino ku tic i ceng’ Sabatu karacelo ku ju ma gibino mbe ku tic i ceng’ Sabatu, e gimondo i bang’ Yehoyada ma jalam.
10 E jalam umiyo tong’ ku ban m’ubino p’Ubimo Daudi ni judongo mi juaskari dak. Nwang’u jukanugi i ot pa Yehova.
11 Man jukur mi kal gicidh girieyo i wang’ hekalu, ng’atuman ku jamlwiny pare i cinge. Girieyo niai i ng’et hekalune ma yor acwic nitundo i ng’ete ma yor acam ceng’ini i kum pemlam man i kum hekalu; gitieko ubimo tingili.
12 I ng’eye, Yehoyada uwodho wod ubimo woko man eketho jamker mi wic ku Lembatuca* i wiye, e gikethe ni ubimo man giwire. Gicaku padu cing’gi man giwacu kumae: “Ubimo kwo nja!”
13 Kinde m’Athalia uwinjo dwand dhanu ma giberingo, e ndhu ndhu ebino i bang’ dhanu ma nwang’u gin’i ot pa Yehova.
14 E eneno ubimo ucungo keca i ng’et mbegi calu ma jubed jutimo i saa ma kumeno. Jutelwic man ju ma kudho agwara gibino karacelo kud ubimo, man anyong’a ubino nego dhanu ceke mi ng’ombe man gibino kudho agwara. Athalia ugam uyeco bongu pare man ekok kumae: “Wucamu gamba! Wucamu gamba!”
15 Ento Yehoyada ma jalam ung’olo ni judongo mi dhanu dak, niwacu ju ma jukethogi iwi udul askari, ewacu igi kumae: “Wuwodhe woko kud i kind udul askari; tekene ng’atu moko ulubo ng’eye, wunege cen ku palamularu!” Kum nwang’u jalam ular uyero kumae: “Ukwayu ngo junege i ot pa Yehova.”
16 Pieno gimake man kinde ma gitundo kude kaka ma juroyo riuni* kud i iye i kal* p’ubimo, gigam ginege kakeca.
17 E Yehoyada utimo lembariba i kind Yehova kud ubimo man dhanu, nia gibimediri nibedo dhanu pa Yehova, etimo bende lembariba i kind ubimo ku dhanu.
18 I ng’eye, dhanu ceke mi ng’ombe gibino i ot* pa Baal man girwombo pemlam pare, ging’enyo i ayi gin m’acwiya pare nziki nziki, man ginego Matan ma jalam pa Baal i wang’ pemlam.
I ng’eye, jalam uketho jutelwic pi nineno wi ot pa Yehova.
19 Bende, Yehoyada uting’o judongo mi dhanu dak, jukur kum ubimo,* jukur kal, man dhanu ceke mi ng’ombe pi nilwoko ubimo niai i ot pa Yehova niloro i kal p’ubimo. Gikwanyu yo mi dhugang’ mi jukur mi kal.* Kinde ma gitundo kuca, Yehoac ubedo iwi komker mi jubim.
20 Pieno anyong’a unego dhanu ceke mi ng’ombe man adhura ukwiyo, pilembe junego Athalia ku palamularu i kal* p’ubimo.
21 Yehoac ubino ku oro abiro kinde m’edoko ubimo.
Korolembe mi There
^ I dhu Juebrania: “kodhi mi ker.”
^ I dhu Juebrania: “Jukari.”
^ I dhu Juebrania: “ju ma ringo ng’wec.”
^ Kunoke “kal.”
^ Kunoke nyo “kal.”
^ I dhu Juebrania: “kinde m’ebewok woko man kinde m’ebemondo i ot.”
^ Copere eno ubenyutho kithabu m’adola moko ma Cik pa Mungu n’i iye.
^ Kunoke “kana mi lwiny.”
^ I dhu Juebrania: “ot.”
^ Kunoke “hekalu.”
^ I dhu Juebrania: “Jukari.”
^ I dhu Juebrania: “ot.”
^ Kunoke “ot.”
