Ubimo mir ario 19:1-37
19 Kinde m’Ubimo Hezekia uwinjo lembe maeno, ndhu ndhu eyeco bongu pare man eumo kendi mi saki i kume, e ecidho i ot pa Yehova.
2 I ng’eye, eoro Eliakim m’ubino janen wi kal,* Cebna ma jagor, man judongo mi julam ma giumo kendi mi saki, kara gicidh i bang’ jabila Isaya ma wod Amoz.
3 Giwacu ire kumae: “Ubimo Hezekia uyero kumae: ‘Tin utie nindo mi can, mi cac,* man mi lewic; kum watie ve dhaku ma moc ugoyo,* ento tego m’enyol ko nyodone mbe.
4 Saa moko nyo Yehova Mungu peri biwinjo wec pa Rabcake ceke ma rwoth pare m’ubimo mir Asiria uore ebin eroko ko Mungu ma kwo, man nyo Yehova Mungu peri bimiyo matira ire pi wec m’ewinjo. Pieno, rwo pi dong dhanu ma giboth.’”
5 E jutic p’Ubimo Hezekia gicidho i bang’ Isaya,
6 man Isaya uyero igi kumae: “Wuwac ni rwoth mwu kumae: ‘Yehova uyero kumae: “Lworo kud unegi pi wec m’iwinjo, ma gi wec mir acidi ma jutic p’ubimo mir Asiria gicida ko.
7 Nen, aberoyo paru moko i wiye, ebiwinjo rwonglembe moko man ebiloko ebidok i ng’om pare ma dhe; e abiketho jubinege ku palamularu i ng’om pare ma dhe.”’”
8 Saa ma Rabcake uwinjo nia ubimo mir Asiria uweko adhura mi Lakic, eloko edok i bang’e man ewok enwang’u ebekiedo i kum Libna.
9 Ubimo mir Asiria ugam uwinjo jubeyero nia Ubimo Tiraka mir Ethiopia ubino pi nikiedo i dhoge. E eoro jukwenda kendo i bang’ Hezekia, eyero kumae:
10 “Wuwac ni Ubimo Hezekia mi Yuda kumae: ‘Kud iwek Mungu peri m’ibegeno no uwondi ku wec ma nia, “jubimiyo ngo Yeruzalem i cing ubimo mir Asiria.”
11 Nen! idaru winjo lembe ma jubim mir Asiria gitimo i kum ng’om ceke, kite ma ginyotho kogi. Nyo in kendi re m’ibibothi?
12 Nyo mungu mi thek ma kwaru para unyotho gibodho theknegi? Gozan, Haran, Rezef, man dhanu mir Eden ma gibino i Tel-asar gini kani?
13 Ubimo mir Hamath, ubimo mi Arpad, man ubimo mir adhura mi Sefarvaim, mi Hena ku mi Iva gini kani?’”
14 E Hezekia ugamu baruane kud i cing jukwenda man esomogi. I ng’eye, Hezekia ucidho i ot pa Yehova, man epedhogi* i wang’ Yehova.
15 E Hezekia ucaku rwo i bang’ Yehova, eyero kumae: “E Yehova Mungu mir Israel, in m’ijany malu iwi* jukerubi, in kendi m’itie Mungu mandha mi ker ceke m’i ng’om. Icwiyo polo ku ng’om.
16 E Yehova, cik ithi man iwinji! Yab weng’i man inen, E Yehova! Winj wec ma Senakerib uoro jubin juroki ko, in m’i Mungu ma kwo.
17 E Yehova, andha jubim mir Asiria ginyotho thek ku ng’om migi de.
18 Man gibolo mungu migi i mac, pilembe gibino mungu ngo ento gibino tic mi cing dhanu, niwacu yen man kidi. Eno re m’uketho gituc ninyothogi.
19 Ento kawoni, E Yehova Mungu mwa, wakweyi, bodhwa kud i cinge, kara ker ceke m’i ng’om ung’ey nia in kendi m’i Mungu, E Yehova.”
20 E Isaya ma wod Amoz uoro kwenda i bang’ Hezekia kumae: “Yehova Mungu mir Israel uwacu kumae: ‘Awinjo rwo peri m’irwo ko i bang’a pir Ubimo Senakerib mir Asiria.
21 Yehova uyero pire kumae:
“Nyasayuni ma sumba ubeceyi, ebeng’ieri.
Nyayeruzalem ubeyengo wiye m’ebeceyi ko.
22 Iroko ng’a man icido nying’ ng’a?
Iting’o dwendi i kum ng’aman ng’a m’ineno ku weng’i mi ting’iri?
Tie Ng’atu Maleng’ mir Israel!
23 Nikadhu kud i bang’ jukwenda peri, iroko Yehova man iyero kumae:‘Abiidho malu iwi gudi,kaka ma bor mi Lebanonkud udul magali mi lwiny para.
Abing’ondo yend tido ma boco m’i iye, yend jenevriye* ma beco m’i iye.
Abimondo kaka ma bor m’usagu m’i iye, i luline m’ujiyere nisagu.
24 Abitong’o vuj pii man abimadhu pii m’i ng’om mange;abidwono kulo* ceke mi Misiri ku the tienda.’
25 Nyo iwinjo ngo? Akeco lembe maeni niai con.
Ayike* cuu niai con.
Kawoni dong’ abecitime.
Ibidwoko adhura ma tek ni udhuru mir uvuru.
26 Tego mi dhanu mir adhurane bithum;jubinyayu ndiri i igi man jubinyayu lewic i wigi.
Gibidoko calu uboko mi lum man lum ma numu,calu lum ma twi iwi ot ma yamu ma yo nyangu thwoyo.
27 Ento ang’eyo cuu saa m’ibedo i iye piny, ang’eyo bende saa m’iwok man m’idwogo i iye,man saa ma kwinyo benegi i iye i kuma,
28 pilembe adaru winjo pi kwinyo m’ubenegi i kuma man woy m’ibewoy ko.
Pieno abitong’o gol para i umi man abiketho gwang’ para i kind dend dhogi,e abipeyi abidwoki kud i yo m’ibino kud i iye.”
29 “‘Man maeni bibedo iri* ni giranyutha: oro maeni ibicamu cam m’utwii gire; oro m’i ng’eye ke ibicamu nying camne m’ukek man udok ucek; ento i oro mir adege ibicoyo kodhi, ibikaye, man ibipidho podho mir ulok, e ibicamu nyinge.
30 Dong dhanu mi ot pa Yuda ma giboth, niwacu dong ju m’udong’ gibiguro ulaggi bimondo piny man gibicego nyinggi malu.
31 Kum dong dhanu biwok kud i Yeruzalem man ju m’uboth ke biwok kud iwi Got Sayuni. Amora pa Yehova mir udul bitimo maeni.
32 “‘Pieno, Yehova uyero pir ubimo mir Asiria kumae:
“Ebimondo ngo i adhura maenikadi ebikilo ngo nying athero acel de i iye,ebikiedo ngo i kume kadok ku ban acelkadi gang’ ma tek de ebigiero ngo i kume pi nimake.
33 Ebidok kud i gengi m’ebino kud i iye;ebimondo ngo i adhura maeni,” Yehova wacu.
34 “Abicero bang’ adhura maeni man abibodhe pira giraman pi Daudi ma jatic para.”’”
35 E i diewor nica malaika pa Yehova ubino man enego juaskari elufu dak acel pier abora wi abic (185 000) i kagonjo mi Juasiria. Kinde ma dhanu giai pir kugweno, gineno gin ceke givuto ma gin avu.
36 Ubimo Senakerib mir Asiria ugam ucidho man eloko edok i Nineve, e ebedo kuca.
37 Nindo acel, kinde m’erum piny i ot* pa Nisrok ma mungu pare, Adramelek giku Carezer ma gi wote ma buu ginege ku palamularu man giringo i ng’om mi Ararat. E wode ma Esar-hadon udoko ubimo kakare.
Korolembe mi There
^ I dhu Juebrania: “ot.”
^ Kunoke “ayany.”
^ I dhu Juebrania: “kum awiya giwok i dhu usau nyodo.”
^ I dhu Juebrania: “epedhe.”
^ Kunoke nyo “i kind.”
^ Eno tie yen m’uyenyo rombo ku sipre.
^ Kunoke “jang kulo Nil.”
^ Kunoke “ayubo.”
^ Niwacu ni Hezekia.
^ Kunoke “hekalu.”
