Barua mir adek pa Yohana 1:1-14
1 Niai kud i bang’ jadwong’, ni Gayo ma jamer m’amaru akeca.
2 Jamer, aberwo nia lembe ceke umedere niwotho iri miero man kumi de ubed ma leng’, tap calu ma lembe ubewotho iri miero kawoni.
3 Kum anyong’a unega lee mandha kinde m’umego gibino man gituco nia imoko kikiki i kum lemandha, calu ma de andha ibemediri niwotho i lemandha.
4 Gin moko mbe ma nyayu anyong’a i iya* ma sagu niwinjo nia awiya para gibemediri niwotho i lemandha.
5 Jamer, inyutho nia andha imoko i kum Mungu nikadhu kud i lembe m’ibetimo ni umego kadok nwang’u ing’eyogi ngo de.
6 Gituco pi mer peri i wang’ cokiri. Dong’ akweyi, cikgi i woth migi i ayi m’uromo ku Mungu.
7 Kum gibewotho pi nitwong’o nyinge m’umbe nigamu piny moko acel de i bang’ dhanu mi thek.
8 Pieno, wacikara nijolo wadi dhanu ma kumeno kara wadok jutic m’ubetimo karacelo kugi i lemandha.
9 Akiewo lembe moko ni cokiri, ento Diotrefe m’umaru nibedo ng’atu ma kwong’a i kindgi, ubejolo ngo gin moko ci m’uai i bang’wa ku woro.
10 Pi thelembe maeno tek abibino, abiwok tuco wiye pi lembe m’ebetimo, maram ebemewo ko lembe ma reco ku nyingwa. Eno kende de uberomo wang’e ngo, ento ebekwero bende nijolo umego ku woro; man ju m’ubemito nijologi de, ebeii nicerogi man niriemogi cen kud i cokiri.
11 Jamer, kud ilub lapor mi gin ma rac, ento lub lapor mi gin ma ber. Ng’atu m’ubetimo lembe ma ber uai i bang’ Mungu. Ento ng’atu m’ubetimo lembe ma rac uneno Mungu ngo.
12 Umego ceke gibeweco ber pi Demetrio man lemandha de ubetuco pire. I andha, wan bende wabetuco pire, man ing’eyo nia lembatuca ma wabemiyo utie lemandha.
13 Abino ku lembe dupa m’akiew iri, ento abemito ngo amedara nikiewogi iri ku kalamu man vino.
14 Enre atie ku genogen nia wabinen kudi ceng’ini eni man wabiweco wang’ ku wang’.
Kwiyocwiny ubed kudi.
Jurimo ma gini keni gimothi. Cwal moth para ni jurimo ma gini kuno bende, ni ng’atuman ku nyinge.
Korolembe mi There
^ Kunoke nyo “m’aromo dwoko foyofoc pire.”
