Ai 15:1-27
15 Saa nica, Musa karacelo ku Juisrael giwero wer ni Yehova kumae:
“Wek awer ni Yehova, kum edodere malu.
Ebolo riuni* ku ng’atu m’uberingo kude i die nam.
2 Yah* en e tego para man kero para, pilembe edoko both para.
En re m’e Mungu para, man abipake; Mungu pa vwa, man abidode.
3 Yehova en e jaramony ma tek. Yehova tie nyinge.
4 Ebolo magali pa Farao kud udul mony pare i die nam,man jurumony pare ma beco gimwony i Nam ma kwar.
5 Pii m’udhetho uumogi; gimwony i the pii ma thuc calu kidi.
6 Cingi ma yor acwic, E Yehova, en e tego ma dit;cingi ma yor acwic, E Yehova, copo turo i jadegi nziki nziki.
7 I dwong’ peri ma dit, icopo redho ju m’ubejai i kumi;ioro kwinyo peri ma lieth, man ewang’ugi ruk calu soka.
8 Nikum yuyo acel m’i umi, pii ucoko dhoggi karacelo;gicungo dii man gicero dhu pii;pii m’udhetho utal i cwiny nam.
9 Jadegi uwacu kumae: ‘Abiriemo tokgi! Abiwok makugi!
Abipoko i jambayeki nitundo abiyeng’!*
Abiwodho palamularu para! Man cinga bidiyogi!’
10 Ikudho yuyo peri, e nam uumogi,gimwony calu cuma ma pek i pii ma lac.
11 E Yehova, ng’a ma calu in i kind mungu?
Ng’a ma calu in, in m’inyuthiri giri nia i leng’ lee?
In m’i Ng’atu m’ukwayu julwor ku wer mi pak, Ng’atu ma timo musana dupa.
12 Irieyo cingi ma yor acwic, man ng’om umwonyogi.
13 I mer peri ma lokere ngo, itelo wi dhanu maeni m’iwaru;i tego peri, ibitelo wigi i kabedo peri ma leng’.
14 Udul dhanu biwinjo pi lembene man kumgi bimiel;ndiri* bimaku dhanu mi Filistia.
15 I rundi maeca, ndiri bimaku rwodhi mir Edom,man kum jutela ma tek mi Moab bimiel.
Kum dhanu ceke mi Kanan bitur.
16 Lworo ku ndiri bimakugi.
Nikum tego mi cingi, gibibedo dii calu kidinitundo ma dhanu peri bikadhu ko, E Yehova,nitundo ma dhanu m’icwiyo bikadhu ko.
17 Ibiterogi man ibipidhogi iwi got mi giralaga peri,i kabedo m’iketho, m’iyiko piri giri kara ibed i iye, E Yehova,kamaleng’ ma cingi uketho, E Yehova.
18 Yehova bibedo ubimo rondo ku rondo.
19 Kinde ma riuni pa Farao ku magali pare mi lwiny, man juring riuni pare gimondo i nam,e Yehova udwogo pii m’i nam i wigi,ento dhanu mir Israel giwotho ku wi ng’om m’uthwo i die nam.”
20 I ng’eye, Miriam ma jabila ma dhaku, ma nyamin Arun uting’o nyathi vul i cinge, man mon ceke gilubo ng’eye ku nyithi vul man ku miel.
21 Man Miriam uwotho gamu dhu wer mi jumaco kumae:
“Wuwer ni Yehova, kum edodere malu.
Ebolo riuni ku ng’atu m’uberingo kude i die nam.”
22 I ng’ey kare, Musa utelo wi Juisrael giai kud i Nam ma kwar man gicidho nitundo i langa mi Cur. Giwotho pi nindo adek i langa, ento ginwang’u ngo pii.
23 Gigam gitundo i Mara,* ento ecopere ngo igi nimadhu pii mi Marane pilembe ebino kec. Eno re m’uketho jucaku nyinge Mara.
24 E dhanu ucaku ng’ur i kum Musa ma gibewacu kumae: “Wabimadhu ang’o?”
25 E Musa uwak i bang’ Yehova man Yehova unyutho ire yen moko. Saa m’ebolo yende i pii, e pige udoko mit.
Mungu umiyo igi telowic keca man eketho igi ukungu mi pokolembe, ekethogi bende i amulaic keca.
26 Ewacu kumae: “Tek iwinjo dwand Yehova Mungu peri cuu mandha, man itimo lembe m’atira i wang’e, tek iketho wii i kum lembe m’eng’olo, man iworo cik pare ceke, e abikelo ngo thong’om moko ci m’agam akelo iwi Jumisiri i wii; kum an a Yehova, abekeyo kumi.”
27 I ng’eye gitundo i Elim, kaka ma kulo apar ario man tiend ngasi pier abiro n’i iye. Pieno gigonjo keca i ng’et pii.
Korolembe mi There
^ Kunoke “kana mi lwiny.”
^ “Yah” utie nying’ ma Yehova i adundo.
^ Kunoke “ng’eyong’ec para biyeng’.”
^ I dhu Juebrania: “moc.”
^ Thelembene tie “Ma kec.”
