Ai 28:1-43
28 “Lwong’ Arun m’umeru karacelo ku wote kud i kind Juisrael kara ebed ira jalam: Arun karacelo ku Nadab man Abihu, Eleazar man Ithamar ma gi wot Arun.
2 Yik kendi ma leng’ ni Arun m’umeru, pi dwong’ man leng’o.
3 Ibiweco ku dhanu ceke ma jubodho,* ju m’apong’o ku tipo mi rieko, man gibiyiko kendi p’Arun pi dwoke leng’, kara ebed ira jalam.
4 “Maeni kendi ma gibiyiko: jamkor, efodh, koti ma bote mbe, kanzu m’uriedo karekare, jamboyo wic ma segi, man thondh pier; gibiyiko kendi ma leng’ maeno ni Arun m’umeru ku wote, kara ebed ira jalam.
5 Jutic ma jubodhone gibitiyo ku mola ma kwar, wuzi mi ble,* thol mi rangi m’uluga, wuzi ma kwar ngbo, man bongu ma nwang’* ma leng’.
6 “Gibiyiko efodh ku mola ma kwar, ku wuzi mi ble,* ku thol mi rangi m’uluga, ku wuzi ma kwar ngbo, ku bongu ma nwang’ ma leng’ mi wuzi m’awiya, man gibiketho dheyo i kumgi.
7 Ebibedo ku dund bongu ario mi goke ma judiko karacelo pi nithubo dhoge m’i wang’e ku m’i ng’eye.
8 Thondh pier m’acwiya ma jutwiyo i kum efodh pi nimake ebed kakare ucikere nibedo mi piny ma rom: mi mola ma kwar, mi wuzi mi ble,* mi thol mi rangi m’uluga, mi wuzi ma kwar ngbo, man mi bongu ma nwang’ ma leng’ mi wuzi m’awiya.
9 “Ibigamu kidi ario ma nyinge oniks* man ibing’iko nying’ wot Israel i kumgi,
10 nying’ abusiel iwi kidine acel, man nying’ abusiel m’udong’ iwi kidine ma kucelo, niai i ma kayu nitundo i ma cogo.
11 Jabodho ma ng’iko kidi bing’iko nying’ wot Israel iwi kidi arione, calu ma jung’iko ko kum jamketho ayi.* I ng’eye ibiketho jumwongi i jamgwok mi mola ma kwar.
12 Ibiketho kidi arione iwi dund bongu mi gok efodh ni kidi mi poy pi wot Israel, man Arun biyeyo nying’gi i wang’ Yehova iwi dund bongu ario mi goke kara ebed ni poy.
13 Ibiyiko jamgwokne mi mola ma kwar
14 man nyoro ario mi mola ma kwar m’alili ma juwiyo calu thol, man ibitwiyo nyoro ma calu tholnegi i kum jamgwok.
15 “Ibiketho jabodho ma ruko kum kendi biyiko jamkor mi pokolembe. Ebiyike calu efodh ku mola ma kwar, ku wuzi mi ble,* ku thol mi rangi m’uluga, ku wuzi ma kwar ngbo, man ku bongu ma nwang’ ma leng’ mi wuzi m’awiya.
16 Ka jubane ni ario, ng’ete ang’wen zoo ucikere nibedo rom rom; borne lac cing’ acel,* man lac wang’e de lac cing’ acel.
17 Ibiketho kidi i kum jamkorne, man ebibedo leni ang’wen. Leni mi kwong’o tie ku kidi ma nying’gi rubi, thopaz, man emerod.*
18 Leni mir arionde utie ku kidi ma nying’gi thurkwaz, safir, man yaspi.*
19 Leni mir adege utie ku kidi ma nying’gi lecem, agath, man amethiste.*
20 Leni mir ang’wende utie ku kidi ma nying’gi krizolith, oniks, man jad.* Jucikiri nimwonogi i jamgwok mi mola ma kwar.
21 Kidine gibibedo calku nying’ wot Israel apar ario. Jubing’iko kidiman calu ma jung’iko ko kum jamketho ayi, man nying’man bicungo kaka suru acel m’i kind suru apar ario.
22 “Ibiyiko nyoro mi mola ma kwar m’alili ma jukiedo calu thol pi jamkorne.
23 Ibiyiko lagith ario mi mola ma kwar pi jamkor man ibimwono lagith arione i kum jamkor i gunde ario.
24 Ibiroyo thol ario mi mola ma kwar i lagith arione i gund jamkor.
25 Ibiroyo dhu thol arione i jamgwok ario man ibitwiyogi iwi dund bongu mi gok efodh yor i wang’e.
26 Ibiyiko lagith ario mi mola ma kwar man ibikethogi i gund jamkorne ario yor i iye i thenge m’uloko i bang’ efodh.
27 Ibiyiko lagith ario mange mi mola ma kwar yor i wang’ efodh, yor i the dund bongu ario mi goke yo piny, ceng’ini ku kaka ma juthube i iye, yor iwi thondh pier m’acwiya mir efodh.
28 Jubitwiyo jamkor kara ebed kakare ku thol mi ble,* jubitwiyo lagithne i kume i kum lagith mir efodh. Eno biketho jamkorne bibedo kakare i kum efodh yor iwi thondh pier m’acwiya.
29 “Arun ucikere niyeyo nying’ wot Israel iwi jamkor mi pokolembe iwi adundene kinde m’ebemondo i Kamaleng’, kara ebed ni poy saa ceke i wang’ Yehova.
30 Ibiketho Urim ku Thumim* i jamkor mi pokolembe, man gicikiri nibedo iwi adunde Arun kinde m’ebemondo i wang’ Yehova, man Arun ucikere niyeyo jampokolembe mi Juisrael iwi adundene i wang’ Yehova saa ceke.
31 “Ibiyiko koti ma bote mbe mir efodh ma en zoo e mi wuzi mi ble.*
32 Ebibedo ku ng’ute i dierene. Jacwii kendi bikwoyo dhu ng’utene tingili. Ebibedo calu ng’ut koti mi cuma kara kud eyeci.
33 Ibiyiko ayi nying yend ulemo ku wuzi mi ble,* ku thol mi rangi m’uluga, man ku wuzi ma kwar ngbo i dhu tiende tingili, man ibiwotho ketho ngara mi mola ma kwar i kindgi.
34 Ibiketho ngara mi mola ma kwar kud ayi nying ulemo biwotho lubiri aluba; ngara acel mi mola ma kwar, man ayi nying ulemo de acel i dhu tiend koti ma bote mbe tingili.
35 Arun ucikere nikende pi nitimo tic, man dwand ngarane ucikere niwinjere kinde m’ebemondo i kabedo ma leng’ i wang’ Yehova man kinde m’ebewok woko, kara kud etho.
36 “Ibiyiko ban m’uriang’ini mi mola ma kwar m’alili man ibing’iko kume calu ma jung’iko ko kum jamketho ayi kumae: ‘Leng’o en e pa Yehova.’
37 Ibitwiye i kum jamboyo wic ma segi ku thol mi ble;* ebibedo i terwang’ i kum jamboyo wic ma segi.
38 Ebibedo i terwang’ Arun, man Arun biyeyo kier kinde ma ng’atu moko udubo i kum piny ma leng’ ma Juisrael gidwoko leng’ kinde ma githierogi ni giramiya ma leng’. Ebibedo saa ceke i terwang’e, kara ginwang’ bero i wang’ Yehova.
39 “Ibicwiyo kanzu mi bongu ma nwang’ ma leng’ m’uriedo karekare man jamboyo wic ma segi mi bongu ma nwang’ ma leng’, man ibicwiyo bende thondh pier.
40 “Ibiyiko bende kanzu, thondh pier, man jamboyo wic ni wot Arun pi dwong’ man leng’o.
41 Ibironyo umeru m’Arun man wote karacelo kude, ibiwirogi, ibikethogi ni julam,* man ibidwokogi leng’ kara gibed ira ni julam.
42 Yik igi bende pali* mi bongu ma nwang’ pi niumo muneru migi. Ebimaku niai i pier nitundo i bamb.
43 Arun ku wote gicikiri nikendogi kinde ma gibemondo i hema mi rombo kunoke kinde ma gibecoro i kum pemlam pi nitimo tic i kabedo ma leng’, kara dubo kud ubed i wigi man kud githo. Eno tie cik ma nja pire man pi nyikwaye* yor i ng’eye.
Korolembe mi There
^ I dhu Juebrania: “m’adundegi riek.”
^ Kunoke “wuzi mi blu.”
^ Kunoke “bongu mi lin.”
^ Kunoke “wuzi mi blu.”
^ Kunoke “wuzi mi blu.”
^ Nen Thelembe mi wec iwi “Kidi ma pigi tek.”
^ Kunoke “kace.”
^ Kunoke “wuzi mi blu.”
^ Niwacu santimetre ma romo 22,2. Nen Thenge ma jumedo B14.
^ Nen Thelembe mi wec iwi “Kidi ma pigi tek.”
^ Nen Thelembe mi wec iwi “Kidi ma pigi tek.”
^ Nen Thelembe mi wec iwi “Kidi ma pigi tek.”
^ Nen Thelembe mi wec iwi “Kidi ma pigi tek.”
^ Kunoke “thol mi ble.”
^ Nen Thelembe mi wec.
^ Kunoke “wuzi mi blu.”
^ Kunoke “wuzi mi blu.”
^ Kunoke “thol mi blu.”
^ I dhu Juebrania: “man ibipong’o cing’gi.”
^ Kunoke “bongu m’i wadi.”
^ I dhu Juebrania: “kodhine.”
