Barua ni Filemon 1:1-25
1 Niai kud i bang’ Paulo ma jutwiyo i kol pi Kristu Yesu man Timoteo m’umegwa, ni Filemon ma jatic wadwa ma wamaru,
2 ni Afia ma nyamegwa, ni Arkipo ma jaaskari wadwa man ni cokiri ma ni yo peri:
3 Bero ma yawe mbe man kwiyocwiny pa Mungu ma Wegwa man pa Rwoth Yesu Kristu ubed kudwu.
4 Abed adwoko foyofoc ni Mungu para saa ceke kinde m’abekwayu piri i rwo para,
5 kum acuku bewinjo pi yiyoyic peri man pi mer m’imaru ko Rwoth Yesu man jumaleng’ ceke.
6 Aberwo nia yiyoyic m’udikowu ku jumange uketh ing’ey piny ceke ma beco ma watie ko nikadhu kud i bang’ Kristu.
7 Kum anyong’a unega lee mandha umira man cwinya ukwiyo kinde m’awinjo pi mer peri, pilembe ni kumi jumaleng’ ginwang’u yomcwiny.
8 Pi thelembe maeno, kadok nwang’u i Kristu atie ku bedagonya ma dit mi ng’olo lembe ma cuu m’umaku itim,
9 ento abekweyi nia mer re m’ucweli, kum an a Paulo atie ng’atu m’utii man pi kawoni jutwiya bende i kol pi Kristu Yesu.
10 Abekweyi pi nyathin para ma Onesimo, m’adoko won kinde ma an’i kol.
11 Naka con kony pare ubino mbe iri, ento kawoni dong’ etie ku kony lee iri man ira bende.
12 Abeore edwog i beng’i, eyo en m’e kacwinya buu.
13 Nwang’u aromo maru acere edong’ i bang’a keni, kara ebed ekonya kakeri saa maeni ma jutwiya i iye i kol pi lembanyong’a.
14 Ento abemito ngo atim lembe moko ma fodi iyiyo ngo, kara kud adiyi adiya nitimo gin ma ber, ento itime ku mito peri giri.
15 Saa moko nyo eno tap re m’utie thelembe m’uketho eringo kud i beng’i pi nindo moko, kara edog edwogi i beng’i dong’ mi magwei
16 calu ng’eca kendo ngo, ento ma sagu ng’eca calu umego ma jamer. Etie jamerna m’amaru dit, ento in ibimare nisagu dok ebed i kum kadi i Rwoth.
17 Dong’ tek andha inena ni jarimbi,* jole i ayi ma ber tap calu ma nwang’u iromo jolo ko an.
18 M’umedo maeno, tek etimi rac kunoke ubekwayu ecul iri piny moko, kwane i wiya.
19 An a Paulo, abegoro ku cinga gira nia abiwok cule, m’umbe nipoyi nia in no zoo itie banja para.
20 Eyo umego, abekwayu ikonya ku lembe maeno i Rwoth; yom cwinya i Kristu.
21 Cwinya tek nia ibitimo lembe m’akwayu, uketho abegoro iri m’ang’eyo ko nia ibitimo kadok nisagu gin m’ayero.
22 Ento abekwayu bende nia iyik ira kaka moko m’abiwok bedo i iye, kum atie ku genogen nia ni kum rwo mwu jubigonya iwu.
23 Epafra ma jakol wada i Kristu Yesu ucwalu iri moth pare;
24 Marko, Aristarko, Dema, man Luka ma gi jutic wada de gimothi.
25 Bero ma yawe mbe pa Rwoth Yesu Kristu ubed kudwu pi pidoic ma ber ma wutie ko.
Korolembe mi There
^ I dhu Jugiriki: “jatic wedu.”
