Jupoklembe 12:1-15
12 I ng’eye, dhanu mir Efraim gicokiri karacelo gikadhu loka i Zafon* man giyero ni Yeftha kumae: “Pirang’o ilwong’owa ngo nia wacidh wakudwu kinde m’ikadhu loka pi nikiedo i dhu Juamoni? Wabiwang’u ot peri ku in de i iye.”
2 Ento Yeftha udwoko igi kumae: “Wakiedo lwiny ma tek karacelo ku dhanu para i dhu Juamon. Alwong’owu wubin wukonya, ento wubodha ngo kud i cing’gi.
3 Kinde m’aneno nia wucopo bodha ngo, e ang’iyo niketho kwo para* i ariti man nicikiedo i dhu Juamon, man Yehova umiyogi i cinga. Dong’ pirang’o tin wubino kiedo i dhoga?”
4 E Yeftha ucoko jumaco ceke mi Gilead, man gikiedo i dhu Efraim; dhanu mi Gilead giloyo dhanu mir Efraim ma nwang’u gilar giwacu kumae: “Wun wu Jugilead ma wubekwo i ng’om mi suru pa Efraim man pa Manase, wutie de ju m’upiey kud i ng’om mi suru pa Efraim.”
5 E dhanu mi Gilead gikadhu i wang’ dhanu mir Efraim man gicidh gimaku kaka ma kulo Yordan mwomere i iye; ka ng’atu moko mir Efraim ubemito ringo, eyero kumae: “Wek akadh lokaca”; e dhanu mi Gilead penje kumae: “Itie Jaefraimi?” Kan edwoko nia, “ungo!”
6 E giyero ire kumae: “Dong’ keyer nia Ciboleth.” Ento ewacu nia, “Siboleth,” kum ecopo yero ngo wecne cuu. Gilund gimake man ginege kaka ma kulo Yordan mwomere i iye. E i saa maeca junego Juefraim elufu pier ang’wen wi ario (42 000).
7 Yeftha ubedo japoklembe i Israel pi oro abusiel, i ng’eye Yeftha ma Jagilead utho man jukunye i adhura pagi i Gilead.
8 I ng’ey Yeftha, Ibzan mi Bethlehem re m’udoko japoklembe i Israel.
9 Ebino kud awiya ma co pier adek man jumanyir pier adek. Eoro jumanyir pare gicidh gigiero co mange ma wedi migi ngo, man ekelo mon ma ka mange pier adek ni wote. Ebedo japoklembe mir Israel pi oro abiro.
10 E Ibzan utho man jukunye i Bethlehem.
11 I ng’ey Ibzan, Elon ma Jazabulon re m’udoko japoklembe i Israel; epoko lembe i Israel pi oro apar.
12 I ng’eye, Elon ma Jazabulon utho man jukunye i Ajalon i ng’om mi suru pa Zabulon.
13 I ng’ey Elon, Abdon ma wod Hilel ma Japirathon re m’udoko japoklembe i Israel.
14 Ebino ku wote pier ang’wen man nyikwaye pier adek ma gibed giringo ku kana pier abiro. Epoko lembe i Israel pi oro abora.
15 E Abdon ma wod Hilel ma Japirathon utho man jukunye i Pirathon i ng’om mi suru pa Efraim iwi got mi Juamalek.
