Jupoklembe 13:1-25
13 Juisrael gitimo lembe ma rac kendo i wang’ Yehova, e Yehova umiyogi i cing’ Jufilisti pi oro pier ang’wen.
2 I saa maeno, nwang’u ng’atu moko ma nyinge Manoa ubedo nuti i Zora, i suru pa Dan. Dhaku pare ubino jamugumba man ebino mbe ku nyathin.
3 Nindo moko malaika pa Yehova uwok ni dhakune man ewacu ire kumae: “Nen, in i jamugumba man imbe ku nyathin. Ento ibigamu ii man ibinyolo nyathin ma nico.
4 Dong’ bed ku weng’i, kud imadh pigulok kadi kit kong’o moko ci, man kud icam gin moko ci m’ucido.
5 Nen! ibigamu ii man ibinyolo nyathin ma nico. Riedi bimulo wiye ngo, pilembe nyathinne bibedo Janaziri* pa Mungu niai i nyoliri pare,* man ebicaku nibodho Israel kud i cing’ Jufilisti.”
6 E dhakune ucidho i bang’ cware man eyero ire kumae: “Dhanu pa Mungu mandha moko ubino i bang’a; ayi pare ubino calu pa malaika pa Mungu mandha, man ayine wang’u ijo lee mandha. Apenjo ngo kaka m’eai i iye, man nyinge de enyutho ngo ira.
7 Ento ewacu ira kumae: ‘Nen! ibigamu ii man ibinyolo nyathin ma nico. Dong’ kud imadh pigulok kadi kit kong’o moko ci, man kud icam gin moko ci m’ucido, pilembe nyathinne bibedo Janaziri pa Mungu niai i nyoliri pare* nitundo i nindo mi tho pare.’”
8 Manoa ukwayu Yehova man eyero kumae: “Tim ira kisa Yehova. Akweyi, wek dhanu pa Mungu mandha m’iai ioro udwog kendo niponjowa iwi ayi ma wacikara nitungo ko nyathin ma binyolerene.”
9 E Mungu mandha uwinjo Manoa, pieno eoro malaika pa Mungu mandha udwogo kendo i bang’ dhakune kinde m’ebedo i podho; nwang’u cware ma Manoa ubino mbe karacelo kude.
10 Dhakune ringo pio man ecidh eyero ni cware kumae: “Nen! ng’atu m’ubino i bang’a nindo moko ca uwok ira kendo.”
11 E Manoa uai malu man gicidho ku dhaku pare. Ebino i bang’ ng’atune man epenje kumae: “Nyo in re m’itie ng’atu m’uweco i bang’ dhaku para?” Edwoko kumae: “Tie an.”
12 E Manoa uyero kumae: “Dong’ lembe m’iyero utimere kakare! Kit kwo pa nyathinne bibedo nenedi, man ebitimo tij ang’o?”
13 Malaika pa Yehova ulund uyero ni Manoa kumae: “Dhaku peri ucikere nigwokere i kum gin ceke m’anyutho ire.
14 Kud ecam piny moko ci m’uai i kum ulok, kud emadh pigulok kadi kit kong’o moko ci, man kud ecam gin moko ci m’ucido. Ecikere niworo gin ceke m’ang’olo ire.”
15 Manoa udok uyero ni malaika pa Yehova kumae: “Akweyi, kebed nyanok, kara wated iri nyathi diel moko.”
16 Ento malaika pa Yehova uwacu ni Manoa kumae: “Kadok abedo de, abicamu ngo cam peri; ento tek imito imii lam m’awang’a ni Yehova, icopo miyo.” Nwang’u Manoa ung’eyo ngo nia eca tie malaika pa Yehova.
17 E Manoa upenjo malaika pa Yehova kumae: “Nyingi tie ng’a? kara ka lembe m’iyero utimere, wayungi.”
18 Malaika pa Yehova ulund udwoko ire kumae: “Ibepenjo nyinga pirang’o? Nying’ne tie nying’ ma wang’u ijo.”
19 E Manoa uting’o nyathi diel ku girathiera mi nying cam, man ethierogi iwi cana ni Yehova. Man Mungu utimo gin ma wang’u ijo kinde ma Manoa giku dhaku pare gibeneno.
20 Saa ma lebmac ubeidho malu i polo kud iwi pemlam, malaika pa Yehova uidho kud i lebmac m’i wi pemlamne kinde ma Manoa giku dhaku pare gibeneno. E wang’ acel gipodho arieba wang’gi i ng’om.
21 Malaika pa Yehova uwok ungo kendo ni Manoa giku dhaku pare. E Manoa unyang’ nia eca ubino malaika pa Yehova.
22 Manoa ugam uyero ni dhaku pare kumae: “Watho andha, pilembe waneno Mungu.”
23 Ento dhaku pare uwacu ire kumae: “Ka nwang’u Yehova umito enegwa, nwang’u ejolo ngo lam m’awang’a man girathiera mi nying cam kud i cingwa, nwang’u enyutho ngo iwa tho gin maeni ceke, man nwang’u ekoro ngo iwa lembe maeni zoo.”
24 I ng’eye, dhakune unyolo nyathin ma nico man ecaku nyinge Samson; kinde ma nyathinne ubedongo, Yehova umedere nimiyo ire mugisa.
25 I ng’ey kare, tipo pa Yehova ubino i wiye i Mahane-dan, i kind Zora ku Ecthaol.
Korolembe mi There
^ Nen Thelembe mi wec.
^ I dhu Juebrania: “niai kud i ic.”
^ I dhu Juebrania: “niai kud i ic.”
