Jupoklembe 5:1-31
5 I nindo maeca, Debora karacelo ku Barak ma wod Abinoam giwero wer ma e:
2 “Pilembe jurukara gigonyo yuk wigi i Israel,man pilembe dhanu wodhiri gigi,wupak Yehova!
3 Wuwinji, e wu jubim! Wucik ithwu, wu jutelwic!
Abiwer ni Yehova.
Abiwero wer mi pak* ni Yehova Mungu mir Israel.
4 Yehova, kinde m’iwok kud i Seir,man kinde m’iwotho kud i ng’om mir Edom,ng’om uyengere man polo ukonjere,pii ucorere kud i afuru.
5 Gudi giloy* i wang’ Yehova,kadok Sinai i wang’ Yehova, Mungu mir Israel.
6 I nindo pa Camgar ma wod Anath,i nindo pa Yael, ndaki uthwo;juruwoth gibed giwotho kud i gengi mi poli.
7 Dhanu mi kiaru mir Israel githum,githum nitundo ma an a Debora aai malu,nitundo m’aai malu calu mego i Israel.
8 Ging’iyo mungu ma nyen,e lwiny ubedo nuti i dhugang’.
Jubed juneno ngo kum ban, kadi tong’i kind dhanu elufu pier ang’wen (40 000) i Israel.
9 Adundena ni karacelo ku judong askari mir Israel,ma giwodhiri gigi pi nicidho karacelo ku dhanu.
Wupak Yehova!
10 Wun ma wuringo ku kana ma nyawura wura,wun ma wubedo iwi thapi ma beco,man wun ma wuwotho i yo,wupar cuu i lembe maeni!
11 Jubed juwinjo dwand ju ma poko pii kaka ma jutwomo pii iye;kuca gibed gikoro pi tic ma pwe pa Yehova,tic ma pwe mi dhanu pare mi kiaru mir Israel.
I ng’eye dhanu pa Yehova giloro piny i dhugang’.
12 Cew, cew, E Debora!
Cew, cew, wer wer!
Ai malu Barak! Ter dhanu m’imaku bor, e in i wod Abinoam!
13 I ng’eye ju m’udong’ giloro piny i bang’ jutela;dhanu pa Yehova gibino piny i bang’a pi nikiedo i dhu ju ma tek.
14 Giai kud i Efraim, gi dhanu ma gikwo i poga;*gibelubo ng’eyi man gin’i kind dhanu peri, E Benjamin.
Judong askari giloro piny niai kud i Makir,man ju ma giyeyo uluth mi jugor nying’* giai kud i Zabulon.
15 Judongo ma wijo mi suru pa Isakar gibino karacelo ku Debora,man calu ma Isakar ubino ku Debora, Barak de kumeno.
Juore ecidho ku tiende i poga.*
Jiji ubino lee i kind ungu pa Ruben.
16 Pirang’o ibedo i the ter ario,m’ibewinjo jukwac gibekudho usegu ni udul lim migi?
Kum jiji ubino lee i kind ungu pa Ruben.
17 Gilead udong’ yo loka kulo Yordan,man Dan ke pirang’o edong’ i bang’ meli pare?
Acer ubedo i dhu nam ma gin m’etimo de mbe,man edong’ i dhu wat pare ma yei nyiko i iye.
18 Dhanu mi suru pa Zabulon giketho kwo migi i ariti nitundo i tho;ju mi suru pa Nafthali bende giketho kwo migi i ariti iwi got.
19 Jubim gibino man gikiedo;jubim mi Kanan gibino i Tanak,ceng’ini ku pii mi Megido man gikiedo.
Ento giyaku ngo mola ma tar nyanok de.
20 Nyikaluku gikiedo niai kud i polo;ku kaka ma gidhokiri kud i iye gikiedo i dhu Sisera.
21 Kulo m’upong’ mi Kicon umologi cen,kulo maeni ma con, kulo mi Kicon m’umol ma tek.
Inyono wi weg tego i the tiendi, E ng’eyong’ec* para.
22 E kana gidido ng’om kud ubong’ tiendgi,kinde ma thwondhgi bepiey ku kwinyo.
23 ‘Wulam Meroz,’ malaika pa Yehova uwacu,‘eyo, wulam ju ma bedo i iye,kum gibino ngo nikonyo Yehova,nikonyo Yehova ku dhanu ma tek.’
24 Yael ma dhaku pa Heber ma Jakenitie jamugisa i kind mon ceke;e jamugisa nisagu mon ceke ma kwo i the hema.
25 Sisera ukwayu pii, emiyo ire cak.
Emiyo ire cak m’umakere i tabu ma leng’ mi timo foc.*
26 Erieyo cinge man eting’o gute* mi hema,eting’o nyondo* mi jutic ku cinge ma yor acwic.
Egoyo Sisera ku nyondo, man eng’enyo wiye,edhidho wiye man eguro gute kadhu plu i thenge.
27 I kind tiend Yael erwombere; epodho man ekwiyo;i kind tiend Yael erwombere man epodho;kaka m’erwombere i iye, keca re m’epodho ma lembe uvoye.
28 Dhaku moko uneno piny kud i wang’ madhirisa,min Sisera ukemo piny kud i wang’ kiyongila m’i wang’ madhirisa man epenjere kumae:‘Pirang’o magali pare ubegalu nidwogo?
Pirang’o woy mi tiend magali pare ubegalu kumeni?’
29 Mon ma riek nisagu i kind mon pare mir awora gidwoko ire lembe;eyo, en gire de ewotho yero yor i iye kumae:
30 ‘M’umbe jiji gibepoko gin ma giyaku,nyaku* acel, jumanyir* ario ni askariman,bongu ma rangine jebo ma juyaku ni Sisera, bongu ma rangine jebo ma juyaku,bongu acel ma juruko kume, bongu ma rangine jebo, bongu ario ma juruko kumgipi niruko ng’ut weg ayeki.’
31 E Yehova, dong’ wek judegi peri ceke ginyothiri,ento wek ju m’umeri gibed calu ceng’ kinde m’ebewok i dwong’ pare.”
E ng’om uyom* pi oro pier ang’wen.
Korolembe mi There
^ Kunoke “Abigoyo mizik.”
^ Kunoke nyo “giyengiri.”
^ Kunoke “pambu mi poga.”
^ Kunoke nyo “ju ma gitiyo ku jamtic mi jugorcik.”
^ Kunoke “pambu mi poga.”
^ Nen Thelembe mi wec.
^ Kunoke “feth.”
^ Kunoke “loc; pike.”
^ Kunoke “martho.”
^ I dhu Juebrania: “usau nyodo.”
^ I dhu Juebrania: “usau nyodo.”
^ Kunoke “ukwiyo.”
