Jupoklembe 6:1-40
6 Ento Juisrael gitimo kendo gin ma rac i wang’ Yehova, e Yehova umiyogi i cing’ Jumidian pi oro abiro.
2 Jumidian gisendo Juisrael lee. Lembe mi Jumidian uketho Juisrael giyiko igi kapondo* i gudi, i oding’om, man kaka ma tundo tek i iye.
3 Tek Juisrael gipidho piny, Jumidian, Juamalek, man dhanu ma yo nyangu gibin gitugo lwiny i wigi.
4 Gibed gibin gigonjo i kum Juisrael, man ginyotho cam m’ucek i ng’ombe nitundo i Gaza, giweko ngo cam moko nyanok de ni Juisrael; kadok urombo, kadi thwon dhiang’, kadi kana.
5 Kum gibed gibino ku lim migi man hema migi wel ma lee dit calu bonyo, man wendgi ku wend ngamia de copo kwanere ngo; gimondo i ng’ombe man ginyothe.
6 Pieno Jumidian giketho Juisrael udoko jucan ma ngolo ngolo; e Juisrael gigam gikwayu Yehova ukonygi.
7 Kinde ma Juisrael gikwayu Yehova ulargi kud i cing’ Jumidian,
8 Yehova ugam uoro jabila moko i bang’ Juisrael m’uwacu igi kumae: “Yehova Mungu mir Israel uyero kumae: ‘Awodhowu kud i Misiri, kud i ng’om ma nwang’u wubino ng’eca i iye.
9 Pieno abodhowu kud i cing’ Jumisiri man kud i cing’ jusend mwu ceke, man ariemogi cen kud i weng’wu, e amiyo ng’om migi iwu.
10 Man awacu iwu kumae: “An a Yehova Mungu mwu. Wucikuru ngo nilworo mungu mi Juamor ma wubebedo i ng’om migi.” Ento wuwora ngo.’”*
11 I ng’eye malaika pa Yehova ubino man ewok ebedo i the yen ma dit m’ubino i Ofra; ebino yen pa Yoac ma Jaabiezer. Nwang’u wode ma Gideon ubefwodo nganu i vur mi biyo pigulok kara Jumidian kud unen.
12 E malaika pa Yehova uwok ire man eyero kumae: “Yehova ni kudi, in m’i jaramony ma tek.”
13 Gideon ulund udwoko ire kumae: “Tim ira kisa, rwoth para; tekene Yehova ni kudwa, pirang’o ke lembe maeni zoo uwok i wiwa? Tic pare ma wang’u ijo ni kani, ma kwaruwa gikoro pire iwa kinde ma giyero nia, ‘nyo Yehova ngo re m’uwodhowa kud i ng’om mi Misiri?’ Ento kawoni Yehova uwenjowa man emiyowa i cing’ Jumidian.”
14 E Yehova uneno bang’e man eyero ire kumae: “Cidh ku tego m’itie ko, man ibibodho Juisrael kud i cing’ Jumidian. Nyo tie an ungo m’abeori?”
15 Gideon udwoko ire kumae: “Tim ira kisa Yehova. Acopo bodho Israel nenedi? Nen! jufwa* gi nok magwei i suru pa Manase, man an de a nok nisagu zoo i ot pa vwa.”
16 Ento Yehova uyero ire kumae: “Abibedo karacelo kudi, e ibigoyo Jumidian ve ibegoyo ng’atu acel.”
17 I ng’eye Gideon uyero ire kumae: “Tek anwang’u bero i weng’i, tim ira giranyutha moko kara ang’ey nia in re m’ibeweco kuda.
18 Akweyi, kud icidh ku keni nitundo m’abidwogo ku giramiya para man abikethe i weng’i.” E edwoko ire kumae: “Abibedo keni nitundo m’ibidwogo.”
19 Gideon ugam ucidho man etedo nyathi diel, egamu bende mogo efa* acel etedo ko mukathi ma thobi mbe i iye. Eketho ring’one i kithunga man cweje ke i agulu mi tedo; e eterogi woko i bang’e man ewok emiyogi ire i the yen ma dit.
20 E malaika pa Mungu mandha uwacu ire kumae: “Ting’ ring’o ku mukathi ma thobi mbe i iye man ikethgi iwi cana ma dit ma ca, konj cwe bende.” E etimo kumeno.
21 I ng’eye malaika pa Yehova urieyo uluth m’ubino i cinge man emulo kum ring’o ku mukathi ma thobi mbe i iye ku dhog uluthne, e mac uwok hew kud i canane man uwang’u ring’o ku mukathi ma thobi mbe i iye bende. Malaika pa Yehova ugam urwinyo kud i wang’e.
22 E Gideon unyang’ nia eca ubino malaika pa Yehova.
Man Gideon uyero ndhu ndhu kumae: “Can i wiya, Ubimo ma Malu ngbir Yehova, kum aneno malaika pa Yehova wang’ ku wang’!”
23 Ento Yehova uwacu ire kumae: “Bed ma cwinyi kwiyo. Lworo kud unegi; ibitho ngo.”
24 Gideon ugam ugiero pemlam kakeca ni Yehova, man julwong’o nyinge Yehova-calom* nitundo tin. Fodi etie asu i Ofra mi Juabiezer.
25 I diewor maeca Yehova uyero ire kumae: “Ting’ thwon dhiang’ pa wuru, thwon dhiang’ne mir ario ma oro pare abiro, man rwomb pemlam ma wuru ugiero ni Baal cen, ng’ond mbegi mi thier* ma n’i ng’ete bende.
26 I ng’ey m’igiero pemlam ni Yehova Mungu peri i kaka ma tek maeni ku kidi m’irodo aroda, ting’ thwon dhiang’ mir ario man ithiere ni lam m’awang’a iwi nyithi dund yen mi mbegi mi thier* m’ing’ondo.”
27 E Gideon uting’o jumaco apar m’i kind jutic pare man etimo tap calu ma Yehova uyero ire. Ento elworo dhanu mi ot pa won ku dhanu mir adhura lee mandha uketho etime ngo ku dieceng’, pieno etime ku diewor.
28 Urwonde kinde ma dhanu mir adhurane giai pir kugweno, gineno nia jurwombo pemlam pa Baal, jung’ondo mbegi mi thier* m’ubino i ng’ete de, man juthiero thwon dhiang’ mir ario iwi pemlam ma jugiero.
29 E gipenjiri i kindgi kumae: “Ng’a m’utimo gin maeni?” I ng’ey ma gisayu lembe, giyero kumae: “Gideon ma wod Yoac re m’utimo gin maeni.”
30 Pieno dhanu mir adhurane giwacu ni Yoac kumae: “Wodh wodi woko kara etho, kum erwombo pemlam pa Baal man eng’ondo mbegi mi thier* ma n’i ng’ete.”
31 Yoac ulund uyero ni dhanu ceke m’ubino loko dhoggi kude kumae: “Nyo wun re ma wucikuru nicero bang’ Baali? Nyo wun re ma wucikuru nibodhe? Ng’atu m’ubecero bang’ Baal jucikiri ninege cen kugweno maeni. Kan etie mungu, ecer bang’e gire calu ma ng’atu moko urwombo pemlam pare.”
32 E niai cing’ nica ecaku lwong’o Gideon nia Yerubaal*, kum ewacu kumae: “Wuwek Baal ucer bang’e gire, pilembe ng’atu moko urwombo pemlam pare.”
33 Jumidian ceke ku Juamalek man dhanu ma yo nyangu gidikiri karacelo, gikadhu loka* i poga* mi Yezreel man gigonjo keca.
34 Tipo pa Yehova ugam ubino iwi* Gideon man ekudho agwara, e Juabiezer gicokiri i ng’eye.
35 Eoro jukwenda gicidh gilwong’ dhanu ceke mi suru pa Manase man gin de gicokiri i ng’eye. Eoro bende jukwenda i suru pa Acer, pa Zabulon, man pa Nafthali; gin bende gibin girombo kude.
36 E Gideon uyero ni Mungu mandha kumae: “Tek ibebodho Israel nikadhu kud i bang’a tap calu m’ing’olo,
37 nen, abepedho adila urombo i lela mi fwodo cam. Tek thoi ung’ier i kum adilane kende ento ng’om m’i ng’ete ceke uthwo kaw, e andha abing’eyo nia ibibodho Israel nikadhu kud i bang’a tap calu m’ing’olo.”
38 Man etimere de kumeno. Kinde m’eai urwonde pir kugweno, emino adila urombone man pii mi thoi m’ebiyo kud i adilane upong’o tabu ma dit mi timo foc.*
39 Gideon ulund uyero ni Mungu mandha kumae: “Ng’eicwiny peri kud uop i kuma, ento kewek akweyi kendo wang’ acel kende. Kewek apim kendo wang’ acel kende kud adila urombo. Ka copere, wek adila urombo kende m’uthwo kaw, ento thoi ung’ier iwi ng’om m’i ng’ete zoo.”
40 E Mungu utimo kumeno i diewor maeca; adila urombo kende m’uthwo, ento thoi ung’ier iwi ng’om m’i ng’ete ceke.
Korolembe mi There
^ Kunoke nyo “kakanpiny ma juyiko i the ng’om.”
^ I dhu Juebrania: “wuwinjo ngo dwanda.”
^ I dhu Juebrania: “elufu para.”
^ Kago litre 22. Nen Thenge ma jumedo B14.
^ Thelembene tie “Yehova en e kwiyocwiny.”
^ Nen Thelembe mi wec.
^ Nen Thelembe mi wec.
^ Nen Thelembe mi wec.
^ Nen Thelembe mi wec.
^ Thelembene tie “Wuwek Baal ucer bang’e i wang’ cik.”
^ Kunoke “gikadhu kulo.”
^ Kunoke “pambu mi poga.”
^ I dhu Juebrania: “uumo.”
^ Kunoke “feth.”
