Barua ni Jurumi 9:1-33
9 Abeyero lemandha i Kristu, acwayu ndra ngo; pidocwiny para ma tipo ma leng’ ubetelo wiye de ubenyutho
2 nia atie ku can ma dit man litho i adundena saa ceke.
3 Nwang’u acopo maru akoyara gira ku Kristu calu ng’atu ma julamu, wek kara akony umego para, niwacu juthuwa
4 ma gitie Juisrael. Mungu ung’iyogi kara gidok nyithindho pare, enyutho igi dwong’ pare, etimo kugi lembariba, emiyo igi Cik ku lembang’ola man emiyo igi rwom mi timo ire.
5 Gitie nyikwayu pa kwaruwa man nikadhu kud i bang’gi re ma Kristu unyolere ku kum pa dhanu. Wek Mungu m’ubimo wi piny ceke unwang’ yung rondo ku rondo. Amen.
6 Ento eno nyutho ngo nia lembang’ola pa Mungu upodho. Kum tie ngo dhanu ceke ma gi nyikway Israel re ma gitie Juisrael mandha.
7 Bende, tie ngo nia gi nyikway Abraham ci, nia dong’ gin ceke gitie awiya pare ma dhe, pilembe Mungu uwacu ni Abraham kumae: “Gin ma jubilwong’o nia kodhi peri biai kud i bang’ Isak.”
8 Eno nyutho nia awiya ma Abraham unyolo ku kum gitie ngo awiya mandha pa Mungu, ento awiya m’enyolo ni kum lembang’ola re ma gitie nyikwaye* mandha.
9 Kum Mungu ugam ung’olo kumae: “Abidwogo oro ma cen de unyoni man Sara binyolo nyathin ma nico.”
10 Lembe uwotho bende kumeno kinde ma Rebeka unwang’u ic mir awiya ma rut ku kwaruwa ma Isak,
11 kum i wang’ ma fodi ginyoliri ngo man ma fodi gitimo ngo lembe ma ber kadi ma rac, Mungu unyutho nia lembakeca pare bicungo ngo iwi tic mi dhanu, ento iwi ng’atu m’eng’iyo man m’elwong’o.
12 Pieno, Mungu uyero ni Rebeka kumae: “Jadit bitimo ni nyathin.”
13 Tap calu ma Lembagora uyero kumae: “Amaru Yakobo, ento adagu Esau.”
14 Nyo wayero nia Mungu tie won gondiri? Nyanok de ngo!
15 Kum Mungu uyero ni Musa kumae: “Kisa binega i kum ng’atu moko ci ma kisa binega i kume, man ngisi de binega i kum ng’atu moko ci ma ngisi binega i kume.”
16 Pieno, ng’iyong’ic pa Mungu cungo ngo iwi yeny pa ng’atini kunoke iwi kero m’ebetimo,* ento iwi kisa pa Mungu.
17 Kum Mungu uyero ni Farao i Lembagora kumae: “Aweki ibedo kwo dhu pi thelembe ma e: kara ni kumi anyuth tego para man kara juyung nyinga i ng’om zoo.”
18 Pieno, kisa nego Mungu i kum ng’atu moko ci m’emaru kisa nege i kume. Ento ng’atu ma wiye tek, eweko cwinye dok nwang’.
19 Ng’atu moko m’i kindwu copo penja kumae: “Pirang’o Mungu ubenwang’u kosa asu i iwa? Kum ng’a ma copo jai kum yeny ma iye yenyo?”
20 Ento in ma i dhanu ma dhanu e, ng’a miyo iri twero mi loko lembe i dhu Mungu? Nyo agulu romo yero ni ng’atu m’ucwiye nia, “Pirang’o icwiya kumeni?”
21 Nyo jacwii agulu umbe ku twero mi cwiyo kud ulobo ma rom agulu ario: Acel ma jutiyo ko i tic mi yung,* ma kucelo ke ma jutiyo ko i tic mi yung ungo?*
22 Dong’ ka Mungu umito enyuth ng’eicwiny pare man eketh tego pare ung’eyere, man eciro ku mwonyolembe hai agulu mi kwinyo* ma nwang’u uromo ku nyoth, nyo embe ku twerone?
23 Dong’ kan etimo kumeno pi ninyutho dwong’ pare ma yawe mbe ni agulu mi kisa* m’elar eyiko pi nimiyo igi dwong’,
24 niwacu wan m’elwong’owa ku kind Juyahudi kende ngo, ento ku kind thek mange bende, dong’ wabiyero ang’o?
25 Tap calu m’elar eyero i buku pa Hoseya kumae: “Ju ma gi dhanu para ngo abilwong’ogi ‘dhanu para,’ man dhaku ma jumaru ngo abilwong’e ‘nyaramara’;
26 man i kaka m’abed ayero igi kumae: ‘Wutie dhanu para ngo’, kakeca abilwong’ogi ‘wot Mungu ma kwo.’”
27 M’umedo maeno, Isaya uwak kumae pi nyithindho mir Israel: “Kadok nwang’u wend nyithindho mir Israel ve kwiyo mi dhu nam, dhanu ma nok m’i kindgi* re ma biboth.
28 Kum Yehova bikelo pokolembe iwi ng’om, man ebiketho pokolembene bitimere pio pio.”
29 Bende, tap calu ma Isaya ular uyero kumae: “Ka nwang’u Yehova mir udul uweko ngo iwa nyikwayu,* nwang’u wadoko calu Sodoma man nwang’u wabedo calu Gomora.”
30 Dong’ waromo yero ang’o pi dhanu mi thek mange? Kadok nwang’u gibino sayu ngo bedopwe de, jukwanugi ni weg bedopwe ni kum yiyoyic ma ginyutho.
31 Ento nyithindho mir Israel, kadok nwang’u gibino sayu nilubo cik mi bedopwe de, re gituc ungo nikwo nimakere ku cikne.
32 Pirang’o? Pilembe gibino sayu nia jukwan gi ni weg bedopwe ni kum tic migi, ento ungo ni kum yiyoyic. E gikier iwi “kidi ma kierojo”;
33 tap calu ma Lembagora uyero kumae: “Nen! Abeketho ng’atu moko i Sayuni ma bibedo calu kidi ma kierojo man cana ma timojo rac,* ento ng’atu m’uyiye lewic binege ngo.”
Korolembe mi There
^ I dhu Jugiriki: “kodhine.”
^ I dhu Jugiriki: “en e pa ng’atu m’ubeyenyo kadi pa ng’atu m’uberingo de ngo.”
^ Kunoke “i lembe ma segi.”
^ Kunoke “ma jutiyo ko nja.”
^ Kunoke “dhanu ma ginyayu ng’eicwiny i iye.”
^ Kunoke “dhanu ma kisa unege i kumgi.”
^ I dhu Jugiriki: “donge.”
^ I dhu Jugiriki: “kodhi.”
^ Kunoke “cana ma redhojo.”
