Lembanyutha ni Yohana 6:1-17
-
Nyathi rombo ualu ayi abusiel ma kwong’a (1-17)
6 Man aneno kinde ma Nyathi rombo ualu ayi acel m’i kind ayi abiro, e awinjo acel m’i kind giracwiya ma kwo ang’wen uwacu ku dwal ma ve dwand morpolo kumae: “Bin!”
2 E aneno man nen! Kana ma tar man ng’atu m’ubedo i wiye umaku athero i cinge, jumiyo ire jamkermiwic man ewok pi niloyo, man pi nidaru aloci pare.
3 Kinde m’ealu ayi mir ario, awinjo giracwiya ma kwo mir ario uwacu kumae: “Bin!”
4 E kana mange ugam uwok, e kwar ngbo, man jumiyo copo ni ng’atu m’ubedo i wiye m’ekab ko kwiyocwiny cen kud i ng’om, kara dhanu ginegiri i kindgi, man jumiyo ire bende palamularu ma dit.
5 Kinde m’ealu ayi mir adek, awinjo giracwiya ma kwo mir adek uwacu kumae: “Bin!” E aneno man nen! Kana ma col man ng’atu m’ubedo i wiye umaku mukero* i cinge.
6 E awinjo gin moko ma ve dwal uwok kud i kind giracwiya ma kwo ang’wen uwacu kumae: “Kilo acel mi nganu utie denari* acel, man kilo adek mi nganu ma tung’* utie denari acel; man kud wunyoth moj oliv kadi pigulok.”
7 Kinde m’ealu ayine mir ang’wen, awinjo dwand giracwiya ma kwo mir ang’wen uwacu kumae: “Bin!”
8 E aneno man nen! Kana ma foo, man ng’atu m’ubedo i wiye nyinge tie Tho. Man Kabuli* ubino lubo ng’eye ceng’ini ceng’ini. Man jumiyo igi copo iwi thenge mir ang’wende mi ng’om kara gineg dhanu ku palamularu ma bor, ku ndru, ku thong’om man ku yedi ma kwiny m’i lum.
9 Kinde m’ealu ayine mir abic, aneno i the pemlam ng’eyong’ec* mi ju ma junego pi lembe pa Mungu man pi lembatuca ma gimiyo.
10 Gikok ku dwandgi ma tek giwacu kumae: “Ubimo ma Malu ngbir, in m’i leng’ man andha, ibiceriri nitundo awene nipoko lembe man niculo kwor pi rimbwa iwi dhanu ma gibedo i ng’omi?”
11 E jumiyo kanzu ma tar ni ng’atuman m’i kindgi man juyero igi nia gikegikur kendo nyanok nitundo ma wel mi jumiru wagi man mir umego migi ma jubecinego calu gin urom ko.
12 Man aneno kinde m’ealu ayi mir abusiel, digidi ma dit uyengo piny, ceng’ udoko col calu saki ma juyiko ku yuk diel, man dwi zoo udoko calu rimo,
13 man nyikaluku mi polo ugam upodho i ng’om, tap calu ma yamu ma tek oyo ko nying ulam ma fodi ucek ungo kud iwi tiende.
14 Polo ugam udolere calu kithabu m’adola ma jubedolo, man gudi ceke ku cula ceke giweko kakagi.
15 E jubim mi ng’om ku jego ma dongo, ku judong askari, ku julonyo, ku dhanu ma tek, ku dhanu ceke ma gitie ng’eca man dhanu ma gitie agonya gipondo i oding’om man i kind cana mi gudi.
16 Man gibemediri niyero ni gudi man ni cana kumae: “Wupodh i wiwa man wukanwa kud i wang’ Ng’atu m’ubedo iwi komker man ni kwinyo pa Nyathi rombo,
17 kum ceng’ ma dit mi ng’eicwiny migi udaru romo, man ng’a ma copo cungo?”
Korolembe mi There
^ Kunoke “kilo.”
^ Denari ubino sente mi tongolo mi mola ma tar mi Juroma ma jubed juculo ko ng’atini pi tic mi nindo acel.
^ Eno tie kit nganu ma julwong’o ku Français nia orge.
^ Kunoke “Hadeya,” niwacu liel mi dhanu ceke. Nen Thelembe mi wec.
^ Copere nia wec maeno ubenyutho rimb ju ma jukonjo ceng’ini ku pemlam. Nen Thelembe mi wec.
