Lembanyutha ni Yohana 7:1-17
7 Yo ng’ei gin maeni, aneno jumalaika ang’wen gicungo i gund ng’om ang’wen, gimaku kikiki yamu ang’wen m’i ng’om, kara yamu moko kud ukot nyanok de iwi ng’om, kadi iwi nam, kadi iwi yen moko ci.
2 Man aneno malaika mange ubeidho ku yo kaka ma ceng’ wok kud i iye* m’emaku ayi* pa Mungu ma kwo; man ekok ku dwande ma tek ni jumalaika ang’wen ma jumiyo igi copo mi nyotho ng’om man nam,
3 ewacu kumae: “Kud wunyoth ng’om, kadi nam, kadi yen nitundo ma wabidaru niketho ayi i terwang’ jumiru pa Mungu mwa.”
4 Man awinjo wend ju ma juketho ayi i kumgine, elufu dak acel pier ang’wen wi ang’wen (144 000) ma juketho ayi i kumgi niai kud i suru ceke mi nyithindho mir Israel:
5 Niai kud i suru pa Yuda juketho ayi i kum dhanu elufu apar ario (12 000),niai kud i suru pa Ruben dhanu elufu apar ario,niai kud i suru pa Gad dhanu elufu apar ario,
6 niai kud i suru pa Acer dhanu elufu apar ario (12 000),niai kud i suru pa Nafthali dhanu elufu apar ario,niai kud i suru pa Manase dhanu elufu apar ario,
7 niai kud i suru pa Simeon dhanu elufu apar ario (12 000),niai kud i suru pa Lawi dhanu elufu apar ario,niai kud i suru pa Isakar dhanu elufu apar ario,
8 niai kud i suru pa Zabulon dhanu elufu apar ario (12 000),niai kud i suru pa Yosefu dhanu elufu apar ario,man niai kud i suru pa Benjamin, juketho ayi i kum dhanu elufu apar ario.
9 Yo ng’ei gin maeni, aneno man nen! Udul ma dit ma ng’atu moko mbe ma copo kwanu m’uai kud i thek ceke, suru, kodhi dhanu man dhok, gicungo i wang’ komker man i wang’ Nyathi rombo ma gikendo kanzu ma tar man gimaku ndhendhe i cing’gi.
10 Man gibekok ku dwandgi ma tek kumae: “Wanwang’u both i bang’ Mungu mwa m’ujany iwi komker man i bang’ Nyathi rombo.”
11 Jumalaika ceke gitieko komker gbur man judongo man giracwiya ang’wen ma kwo, gipodho arieba wang’gi i wang’ komker man giworo Mungu,
12 giyero kumae: “Amen! Wek pak, ku dwong’, ku rieko, ku foyofoc, ku yung, ku tego man kero ubed ni Mungu mwa rondo ku rondo. Amen.”
13 Ng’atu acel m’i kind judongo ugam upenja kumae: “Dhanu maeni ma gikendo kanzu ma tar, gi jukani man giai kani?”
14 E ndhundhu adwoko ire kumae: “Rwoth para, in re m’ing’eyo.” Man eyero ira kumae: “Dhanu maeni gitie ju ma giai kud i masendi ma dit man gilwoko kanzu migi gidwokogi tar de i rimo pa Nyathi rombo.
15 Pi thelembe maeno re ma gin’i wang’ komker pa Mungu man gibetimo ire tic ma leng’ dieceng’ ku diewor i hekalu pare; man Ng’atu m’ubedo iwi komker biguro hema pare i wigi.
16 Kec kadi rieu pii de binegogi kendo ngo, kadok ceng’ kadi lietho ma lake tek de biwang’ugi kendo ngo,
17 pilembe Nyathi rombo ma n’i kind komker bikwayugi man ebitelo wigi i bang’ pii mi kwo m’ubedhenyini. Man Mungu biweyo piwang’ pet kud i wang’gi.”
