Lembe mi Julawi 13:1-59
13 Yehova umedere niweco i bang’ Musa gikud Arun, ewacu kumae:
2 “Tek piny moko ukwot i dendkum ng’atu moko, nik’ebed nyunyu kunoke kume urwodho man edoko ni dhobu* i dend kume, jucikiri nitere i bang’ Arun ma jalam kunoke i bang’ ng’atu acel m’i kind wote ma gi julam.
3 Jalam bing’iyo wang’ rem ma n’i dend kumene. Tek yukkum ma n’i wang’ rembe udoko ma tar man wang’ rembe ubenen nia emwony nisagu dendkum, nwang’u etie dhobu. Jalam bing’iye man ebing’olo nia ng’atune cido.
4 Ento tek dendkum ng’atu m’urwodhone udoko ma tar man ebenen nia emwony nisagu dend kume mange, man yukkume udoko ma tar, e jalam bikoyo ng’atu ma tie ku rembe kende pi nindo abiro.
5 I ng’eye, jalam bing’iyo ng’atune i nindo mir abirone, man tek ubenen nia rembe ujik man enyay ungo i dend kume, jalam bikoyo ng’atune kende pi nindo mange abiro.
6 “Jalam bidong’iye kendo i nindo mir abirone; tek wang’ rembe uthwo man enyay ungo i dend kume, jalamne bing’olo nia e leng’, ebino kende kende nyunyu. E ng’atune bilwoko kendi pare man ebidoko leng’.
7 Ento tek nyunyune* unyay andha i dend kume i ng’ey m’enyuthere i wang’ jalam kara ung’ol nia etie leng’, ebidonyuthere kendo* i wang’ jalam.
8 Jalam bing’iye, man tek nyunyune unyay i dend kume, e jalamne bing’olo nia ecido. Eno tie dhobu.
9 “Tek twoyo mi dhobu umaku ng’atu moko, jucikiri nitere i bang’ jalam,
10 man jalam biwong’iye. Tek piny ma tar ukwot i dend kume man eloko yuk kume udoko ma tar, man dhu ka m’ukwotne utuc,
11 etie dhobu ma galu lee i dendkum; e jalam bing’olo nia ng’atune cido. Kud ekoye kakende, pilembe ecido.
12 Tek dhobune unyay i kume zoo man eumo kum ng’atune niai i wiye nitundo i tiende, kaka moko ci ma jalam copo neno,
13 man tek jalam ung’iye man eneno nia dhobu uromo dend kume zoo, e ebing’olo nia ng’atu ma dhobu umakune tie leng’.* Calu ma dhobune zoo udoko ma tar, etie leng’.
14 Ento tek rem moko ma dhoge tuc uwok i kum ng’atune, ebibedo m’ecido.
15 Tek jalam uneno dhu rem m’utucne, ebing’olo nia ng’atune cido. Rem ma dhoge tucne tie piny m’ucido. Eno tie dhobu.
16 Ento tek rem ma dhoge tucne udoko kendo ma tar, e ebibino i bang’ jalam.
17 Jalam biwong’iyo ng’atune, man tek eneno rembe udoko ma tar, e jalam bing’olo nia ng’atu ma rem n’i kumene utie leng’. E leng’.
18 “Tek vur ukwodo kum ng’atini man ekey,
19 ento piny ma tar ukwot kaka vurne kunoke piny ma nyangberu ngberu urwodho kakare, ecikere nicinyuthere ni jalam.
20 Jalam bing’iye, man tek ubenen nia emwony nisagu dendkum man yuk kume udoko ma tar, e jalam bing’olo nia ecido. Eno tie twoyo mi dhobu m’umoc kaka vur.
21 Ento tek jalam ung’iye man eneno nia yukkum ma tar umbe i wang’e man nia emwony ungo nisagu dendkum, bende tek ubenen nia ekwor, e jalam bikoye kakende pi nindo abiro.
22 Man tek ubenen kamaleng’ nia enyay i dend kume, e jalam bing’olo nia ecido. Etie tho.
23 Ento tek piny m’urwodhone ujik kakar acel kende man enyay ungo, etie kende kende akwoda kwoda ma vur re m’unyayu; jalam bing’olo nia ng’atune leng’.
24 “Kunoke tek ng’atu moko tie ku poyomac i kume man wang’ poyo m’ukey cuu cuu ngone urwodho nyangberu ngberu kunoke nyatar tar,
25 e jalam bing’iye. Tek yukkum ma n’i ka m’urwodhone udoko ma tar man ubenen nia emwony nisagu dendkum, eno tie dhobu re m’umoc kaka poyone, man jalam bing’olo nia ng’atune cido. Eno tie twoyo mi dhobu.
26 Ento tek jalam ung’iye man eneno nia yukkum ma tar umbe i wang’ ka m’urwodhone, man emwony ungo nisagu dendkum, e jalam bikoyo ng’atune kende pi nindo abiro.
27 Jalam bing’iyo ng’atune i nindo mir abiro, man tek ubenen kamaleng’ nia elal i dend kume, e jalam bing’olo nia ng’atune cido. Eno tie twoyo mi dhobu.
28 Ento tek piny m’urwodhone ujik kakar acel kende man enyay ungo i dend kume man ekwor, etie kende kende poyo re m’ukwot, e jalam bing’olo nia ng’atune leng’, pilembe tie poyo re m’ukwot.
29 “Tek rem upodho i kum ng’atu ma nico kunoke ma dhaku, i wiye kunoke i tike,
30 e jalam bing’iyo wang’ rembe. Tek ubenen nia emwony nisagu dendkum man yukkum ma n’i wang’e ubogere man e nyatar tar, e jalam bing’olo nia ng’atune ucido; eno tie tho m’i the yukwic kunoke m’i the yirtik. Etie dhobu mi wic kunoke mi tik.
31 Ento tek jalam uneno nia rembe ubenen nia emwony ungo nisagu dendkum man yukkum ma col umbe i wang’e, jalam ucikere nikoyo ng’atu ma rem n’i kumene kende pi nindo abiro.
32 Jalam bing’iyo rembe i nindo mir abirone, man tek kaka ma rembe n’i iye unyay ungo man yukkum m’ubogere utwii ngo i wang’e, man tek kaka ma rembe n’i iye ubenen nia umwony ungo nisagu dendkum,
33 jucikiri ninyaru wiye kunoke yir tike, ento jubinyaru ngo kaka ma rembe n’i iye. I ng’eye, jalam bikoyo ng’atu ma rem n’i kumene kende pi nindo abiro.
34 “Jalam bidong’iyo kaka ma rem n’i iyene kendo i nindo mir abirone, man tek rem m’i the yuk wiye man m’i the yir tike ulal ungo i dendkumne man ubenen nia emwony ungo nisagu dendkum, e jalam bing’olo nia ng’atune leng’; ng’atune ucikere nilwoko kendi pare man ebidoko leng’.
35 Ento tek ubenen kamaleng’ nia rembe ulal i dend kume i ng’ey m’edwokere leng’,
36 jalam bing’iyo ng’atune, man tek rembe ulal i dend kume, jalam bisendere ngo niyenyo yukkum m’ubogere; ng’atu maeno ucido.
37 Ento tek eng’iye man enwang’u nia rembe ulal ungo man yukkum ma col utwii i iye, nwang’u rembe ukey. Ng’atune utie leng’, man jalam bing’olo nia etie leng’.
38 “Tek piny urwodho i dendkum ng’atu moko ma nico kunoke ma dhaku man tek piny m’urwodhone ma tar,
39 jalam bing’iyogi. Tek piny m’urwodho i kumene ukwor ma tar, nwang’u gwenyo ma timojo rac ungo re m’upodho i kume. Ng’atu maeno tie leng’.
40 “Tek yuk wi ng’atu moko ma nico ulwer man wiye wang’, ng’atune tie leng’.
41 Tek yuk wiyene lwer yor i terwang’e man keca re m’uwang’, nwang’u e leng’.
42 Ento ka rem ma nyangberu ngberu upodho kaka m’uwang’ i die wiye kunoke i terwang’e, eno tie dhobu re m’upodho i die wiye kunoke i terwang’e.
43 Jalam bing’iyo ng’atune; tek kaka ma rembe ukwodo i die wiye m’uwang’ kunoke i terwang’ene utie nyangberu ngberu man ebenen calu dhobu i dend kume,
44 e nwang’u etie won dhobu. Ecido, man jalam ucikere ning’olo nia ecido nikum twoyo ma n’i die wiye.
45 Jubiyeco kendi pa won dhobu m’utie ku twoyone, ebiweko yuk wiye zakara, ecikere niumo yir m’i dhu ume man nikok kumae: ‘Acido yo, acido yo!’
46 Ebibedo m’ecido i nindo ceke m’etie ku twoyone. Calu ecido, ebibedo kakende. Kabedo pare bibedo woko i ng’ey kagonjo.
47 “Tek twoyo mi dhobu umaku bongu, dok ebed bongu mi yuk urombo kadi bongu ma nwang’,*
48 dok ebed i wuzi mi bongu m’acwiya kadi ke thol m’akieda mi bongu ma nwang’ kunoke mi yuk urombo, kunoke adila kadi gin moko ci ma juyiko kud adila,
49 tek tho m’umaku bongu, adila, wuzi mi bongu m’acwiya man mi yuk urombo, kunoke piny moko ci ma juyiko kud adila ubenen mi rangi mi ith lum ma nyanumu numu kunoke ma nyakwar kwar, e nwang’u dhobu re m’umake; man jucikiri nitere i bang’ jalam.
50 Jalam bing’iyo thoje, man ecikere nikoyo piny ma thoje n’i kume kakende pi nindo abiro.
51 Kinde m’ebeng’iyo thoje i nindo mir abirone man eneno nia enyay i bongune, i wuzi mi bongu m’acwiya, i thol m’akieda kadi i adila (kadok nwang’u adilane jutiyo ko pi lembang’o de), nwang’u thoje tie dhobu ma rac dit, man etie piny m’ucido.
52 Ecikere niwang’u bongune, nik’ebed wuzi mi bongu m’acwiya kunoke thol m’akieda mi yuk urombo, kunoke mi bongu ma nwang’ kadi ke piny moko ci ma juyiko kud adila ma thoje unwang’ere i iye; kum etie dhobu ma rac dit. Jucikiri niwang’e i mac.
53 “Ento tek jalam ung’iye man thoje unyay ungo i bongune, kadi i wuzi mi bongu m’acwiya, kunoke i thol m’akieda, kadi i piny moko ci ma juyiko kud adila,
54 e jalam bing’olo nia julwok piny ma tho n’i kumene, man ebikoye kakende pi nindo mange abiro.
55 Jalam bilund ng’iyo piny ma tho n’i iyene i ng’ey ma julwoke mii. Tek ayi piny m’umakene ulokere ngo, kadok thoje unyay ungo i kume de, nwang’u ecido. Icikiri niwang’e ku mac pilembe dhobu udaru came, dok ebed yor i iye kunoke yo woko.
56 “Ento tek jalam ung’iye man i ng’ey ma julwoke mii enwang’u ka ma thoje n’i iye ukwor, ebiyece cen kud i kum kendine kunoke kud i kum adila, kadi wuzi mi bongu m’acwiya kunoke thol m’akieda.
57 Enre tek edog emoc kendo i kum theng bongune mange kadi i kum wuzi mi bongu m’acwiya kunoke i kum thol m’akieda, kadi i kum piny moko ci ma juyiko kud adila, eno nwang’u ebenyay; e jucikiri niwang’u piny moko ci ma thoje umaku ku mac.
58 Ento tek thoje urwinyo kud i kum bongu kadi i kum wuzi mi bongu m’acwiya kunoke thol m’akieda kadi piny moko ci ma juyiko kud adila m’ilwoko, icikiri nilwoke kendo wang’ mir arionde, man ebidoko leng’.
59 “Eni tie cik mi twoyo mi dhobu m’umaku bongu mi yuk urombo kadi bongu ma nwang’, kunoke kum wuzi mi bongu m’acwiya kadi thol m’akieda, kunoke piny moko ci ma juyiko kud adila, pi ning’olo nia etie leng’ kunoke ecido.”
Korolembe mi There
^ Wec mi dhu Juebrania ma juloko nia “dhobu” kunoke “joi” utie ku thelembe dupa, m’uketho i iye twoyo ma tung’ tung’ mi dendkum ma dak adaka. Eketho i iye bende kit tho moko ma junwang’u i kum kendi man udi.
^ Kunoke “rembe.”
^ Kunoke “wang’ mir arionde.”
^ Kunoke “copo dagu ngo twoyo.”
^ Kunoke “bongu mi lin.”
