Lembe mi Julawi 14:1-57
14 Yehova umedere niweco i bang’ Musa, ewacu kumae:
2 “Maeni tie cik pi won dhobu i nindo ma jubiyiyo dwokirileng’ pare, i saa m’ukwayu jutere i bang’ jalam.
3 Jalam biwok woko i ng’ey kagonjo pi ning’iyo ng’atune. Tek dhobu parene ukey,
4 jalam bing’olo ire nia ekel piny ma e pi dwokirileng’ pare: winyo ario ma kwo ma leng’, yend tido, wuzi ma kwar ngbo, man hizop.
5 Jalam bing’olo nia juneg winyone acel i agulu mir ulobo iwi pii m’ubemol.
6 Ento ecikere niting’o winyone ma kwo karacelo ku yend tido, wuzi ma kwar ngbo, man hizop, e eroygi karacelo i rimb winyo ma junego iwi pii m’ubemol.
7 E i ng’eye, ebikire wang’ abiro i kum ng’atu m’ubedwokere leng’ nikum dhobu man ebing’olo nia e leng’, man ebiweko winyo ma kwone uringi i lum.
8 “Ng’atu m’ubedwokere leng’ne ucikere nilwoko kendi pare, nilielo yuk kume ceke man nijom, e ebidoko leng’. I ng’ey maeno, ecopo dwogo i kagonjo, ento ebibedo ngo i hema pare pi nindo abiro.
9 I nindo mir abirone, ecikere nilielo yuk wiye ceke, yir tike man bind wang’e. I ng’ey m’elielo yir mi kume ceke, ebilwoko kendi pare man ebijom; e ebidoko leng’.
10 “I nindo mir aborane, ebigamu nyithi nyogi rombe ario ma mulima mbe i kumgi, nyathi vong urombo acel ma oro pare ukadhu ngo acel ma mulima mbe i kume, thenge adek wi apar mir efa* mi mogo ma yom ma jujebo ku mo ni girathiera mi nying cam, man mo log* acel;
11 man jalam m’ung’olo nia ng’atune tie leng’ bikelo ng’atu m’ubedwokere leng’ne, karacelo ku girathieranegi i wang’ Yehova i dhu kamondo mi hema mi rombo.
12 Jalam bigamu nyathi nyog urombone acel man ebithiere ni girathiera mi kier karacelo ku mo log acel, man ebilekogi kun ku kun ni girathiera m’aleka i wang’ Yehova.
13 I ng’eye, ebithumo nyathi nyog urombone kaka ma jubed juthumo iye lam mi dubo man lam m’awang’a i kabedo ma leng’, pilembe calu lam mi dubo, girathiera mi kier de tie pa jalam. Etie piny ma leng’ m’usagu.
14 “I ng’eye, jalam bigamu kum rimo mi girathiera mi kierne, man ebikethe i the ith ma yor acwic pa ng’atu m’ubedwokere leng’ne, iwi nyig cinge ma dit ma yor acwic, man iwi nyig tiende ma dit ma yor acwic.
15 Jalam bigamu kum mo moko m’i logne man ebikonje i die cinge ma yor acam.
16 Jalam biroyo nyig cinge ma yor acwic i mo ma n’i die cinge ma yor acam, man ebikiro kum moje moko ku nyig cinge wang’ abiro i wang’ Yehova.
17 I ng’eye, jalam biketho kum mo m’udong’ i die cinge i the ith ma yor acwic pa ng’atu m’ubedwokere leng’ne, iwi nyig cinge ma dit ma yor acwic, man iwi nyig tiende ma dit ma yor acwic iwi rimo mi girathiera mi kier.
18 Jalam biketho mo m’udong’ i die cinge iwi ng’atu m’ubedwokere leng’ne, man ebitimo adunya pire i wang’ Yehova.
19 “Jalam bithiero lam mi dubo man ebitimo adunya pi ng’atu m’ubedwokere leng’ nikum cilo pare, i ng’eye ebithumo lam m’awang’a.
20 Jalam bidothiero lam m’awang’ane ku girathiera mi nying cam iwi pemlam, man ebitimo adunya pi ng’atune, e ebidoko leng’.
21 “Ento tek ng’atune jacan man jamcinge nok, ebigamu nyathi nyog urombo acel ni girathiera mi kier pi girathiera m’aleka, kara jutim ko adunya pire, karacelo kud apaje mir efa* mi mogo ma yom ma jujebo ku mo ni girathiera mi nying cam, mo log acel,
22 man akuru ario mi lum kunoke nyithindh akuru ario mi pacu, nimakere ku jamcinge. Acel bibedo pi lam mi dubo, ma kucelo ke pi lam m’awang’a.
23 I nindo mir aborane, ebiterogi i bang’ jalam i dhu kamondo mi hema mi rombo i wang’ Yehova kara dwokirileng’ pare uyiyere.
24 “Jalam bigamu nyathi nyog urombo mi girathiera mi kier ku mo log acel, man jalam bilekogi kun ku kun ni girathiera m’aleka i wang’ Yehova.
25 I ng’eye, jalam bithumo nyathi nyog urombo mi girathiera mi kier man ebigamu kum rimb girathiera mi kierne moko ebiketho i the ith ma yor acwic pa ng’atu m’ubedwokere leng’ne, iwi nyig cinge ma dit ma yor acwic, man iwi nyig tiende ma dit ma yor acwic.
26 Jalam bikonjo kum moje moko i die cinge gire ma yor acam,
27 man ebitono ku nyig cinge ma yor acwic kum mo moko ma n’i die cinge ma yor acamne wang’ abiro i wang’ Yehova.
28 Man jalam biketho kum mo ma n’i die cinge i the ith ma yor acwic pa ng’atu m’ubedwokere leng’ne, iwi nyig cinge ma dit ma yor acwic, man iwi nyig tiende ma dit ma yor acwic kaka ma rom m’eketho iye rimo mi girathiera mi kier.
29 I ng’eye, jalam biketho mo m’udong’ i die cinge iwi ng’atu m’ubedwokere leng’ne, pi nitimo adunya pire i wang’ Yehova.
30 “Ebithiero akuru acel mi lum kunoke nyathin akuru acel mi pacu, nimakere ku jamcinge,
31 acel m’ecopo nwang’u pi lam mi dubo, ma kucelo ke pi lam m’awang’a karacelo ku girathiera mi nying cam; man jalam bitimo adunya pi ng’atu m’ubedwokere leng’ne i wang’ Yehova.
32 “Eno utie cik pi ng’atu ma dhobu umaku ma re jamcinge mbe i nindo ma juyiyo dwokirileng’ pare.”
33 I ng’eye, Yehova uyero ni Musa gikud Arun kumae:
34 “Saa ma wubimondo i ng’om mi Kanan m’abecimiyo iwu ni aba, man tek aketho twoyo mi dhobu umaku ot moko m’i ng’om mwu,
35 e won ode ucikere nibino i bang’ jalam man niyero ire kumae: ‘Kit tho moko umaku ot para.’
36 Jalam bing’olo nia juwodh piny ceke kud i ode i wang’ nibino ng’iyo thoje, kara kud ebin eng’ol nia piny ceke ma n’i ode ucido; i ng’ey maeno, jalam bimondo i ode pi ning’iye cuu.
37 Ebing’iyo kaka ma thoje umaku, man tek tho m’umaku kor ode utie mi rangi mi ith lum ma nyanumu numu kunoke ma nyakwar kwar, man tek ubenen nia emwony nisagu kor ot,
38 jalam biwok kud i dhugola mi ode man ebikoyo ode kakende pi nindo abiro.
39 “I ng’eye, jalam bidwogo i nindo mir abirone man ebing’iye cuu. Tek thoje unyay i kor ode,
40 jalam bing’olo nia juwodh kidi ma tho umakune cen man jubaye woko i ng’ey adhura kaka m’ucido.
41 I ng’eye, ebiketho jugob i ode cuu mandha man ulobo ma jugobone jubioyo woko i ng’ey adhura kaka m’ucido.
42 Jubidoroyo kidi mange kaka kidi ma juwodho, man ebitiyo kud ulobo mange pi nifiyo kor ode.
43 “Tek asu thoje udwogo man ucaku kendo i ode i ng’ey ma nwang’u juwodho kidi, jugobo i ode man jufiyo kore kendo,
44 e jalam bimondo i ode man ebing’iye. Tek thoje unyay i iye, nwang’u dhobu ma rac dit re ma n’i ode. Ode cido.
45 Ebiketho jubirwombo ode, man ebiketho juyey kidine, yende, man ulobone ceke juter woko i ng’ey adhura kaka m’ucido.
46 Ento ng’atu moko ci ma bimondo i ode i kind nindo ma jukoye kakende bibedo m’ecido nitundo uthieno;
47 ng’atu moko ci m’uvuto i ode ucikere nilwoko kendi pare, man ng’atu moko ci m’ucamu i ode ucikere nilwoko kendi pare.
48 “Ento tek jalam ubino man eneno nia thoje unyay ungo i ode i ng’ey ma jufiyo kore kendo, e jalam bing’olo nia ode leng’, pilembe thoje thum.
49 Pi nidwoko ode leng’ nikum cilo,* ebigamu winyo ario, yend tido, wuzi ma kwar ngbo, man hizop.
50 Ebinego winyone acel i agulu mir ulobo iwi pii m’ubemol.
51 I ng’eye, ebigamu yend tido, hizop, wuzi ma kwar ngbo, ku winyone ma kwo man ebiroyogi i rimb winyo ma junego man i pii m’ubemol, e ebikire wang’ abiro yor i bang’ ode.
52 Man ebidwoko ode leng’ nikum cilo* ku rimb winyo, pii m’ubemol, winyo ma kwo, yend tido, hizop, man wuzi ma kwar ngbo.
53 I ng’eye, ebiweko winyo ma kwone woko i ng’ey adhura uringi i lum man ebitimo adunya pi ode, e ode bidoko leng’.
54 “Eno tie cik pi kwond dhobu ceke, rem m’i the yukwic kunoke m’i the yirtik,
55 dhobu mi kendi kadi ke mi ot,
56 man pi piny ma kwot akwota i kum, nyunyu, man piny ma rwodho arwodha i kumjo,
57 pi ning’eyo ka nyo piny moko cido kunoke e leng’. Eno tie cik pi dhobu.”
Korolembe mi There
^ Thenge adek wi apaje mir efa ubino litre 6,6. Nen Thenge ma jumedo B14.
^ Log acel ubino litre 0,31. Nen Thenge ma jumedo B14.
^ Apaje mir efa ubino litre 2,2. Nen Thenge ma jumedo B14.
^ I dhu Juebrania: “nikum dubo.”
^ I dhu Juebrania: “nikum dubo.”
