Ma Matayo ukiewo 1:1-25
1 Buku mi thekwaru pa Yesu Kristu,* ma wod Daudi, ma wod Abraham:
2 Abraham unyolo Isak;Isak unyolo Yakobo;Yakobo unyolo Yuda man umego pare;
3 Yuda unyolo Perez man Zera ma meggi ubino Thamar;Perez unyolo Hezron;Hezron unyolo Ram;
4 Ram unyolo Aminadab;Aminadab unyolo Nacon;Nacon unyolo Salmon;
5 Salmon unyolo Boaz ma min ubino Rahab;Boaz unyolo Obed ma min ubino Rutha;Obed unyolo Yese;
6 Yese unyolo Daudi m’ubimo.
Daudi unyolo Suleman ma min ular ubino dhaku p’Uria;
7 Suleman unyolo Rehoboam;Rehoboam unyolo Abiya;Abiya unyolo Asa;
8 Asa unyolo Yehocafath;Yehocafath unyolo Yoram;Yoram unyolo Uzia;
9 Uzia unyolo Yotham;Yotham unyolo Ahaz;Ahaz unyolo Hezekia;
10 Hezekia unyolo Manase;Manase unyolo Amon;Amon unyolo Yosia;
11 Yosia unyolo Yekonia man umego pare i nindo ma jutero Juyahudi i Babeli.
12 I ng’ei ma jutero Juyahudi i Babeli, Yekonia unyolo Salatiel;Salatiel unyolo Zerubabel;
13 Zerubabel unyolo Abiud;Abiud unyolo Eliakim;Eliakim unyolo Azor;
14 Azor unyolo Zadok;Zadok unyolo Akim;Akim unyolo Eliud;
15 Eliud unyolo Eleazar;Eleazar unyolo Mathan;Mathan unyolo Yakobo;
16 Yakobo ke unyolo Yosefu ma cwar Maria m’unyolo Yesu, ma julwong’o Kristu.
17 Pieno thekwarune ceke ubedo kumae: Niai i kum Abraham nitundo i kum Daudi, thekwaru ubino apar ang’wen (14); niai i kum Daudi nitundo i nindo ma jutero Juyahudi i Babeli, thekwaru ubino apar ang’wen (14); man niai i nindo ma jutero Juyahudi i Babeli nitundo i kum Kristu, thekwaru ubino apar ang’wen (14).
18 Nyoliri pa Yesu Kristu ubino kumae: Kinde ma Yosefu upenjo dwand Maria ma min Yesu kara enyome, Maria unwang’u ic ni kum tego mi tipo ma leng’* ma nwang’u fodi gigamiri ngo.
19 Ento calu Yosefu ma cware ubino won bedopwe, emito ngo enyay lewic i wiye i wang’ dhanu; pieno eng’iyo nilalu kude gamiri i amung’.
20 Ento i ng’ei m’eparu lembe maeno, nen! Malaika pa Yehova* uwok ire i wang’ lek man uwacu ire kumae: “Yosefu wod Daudi, lworo kud unegi nigamu Maria ma dhaku peri, kum enwang’u ic ni kum tego mi tipo ma leng’.
21 Ebinyolo nyathin ma nico man ibicaku nyinge Yesu,* kum ebibodho dhanu kud i dubo migi.”
22 Gin maeno ceke utimere pi nipong’o lembe ma Yehova ular uyero nikadhu kud i bang’ jabila pare, m’uwacu kumae:
23 “Nen! Nyaku ma sumba* binwang’u ic, man ebinyolo nyathin ma nico, man jubicaku nyinge Emanuel,” ma ka juloke thelembene tie, “Mungu ni kudwa.”
24 Kinde ma Yosefu ucew kud i wang’ nindo, etimo calu ma malaika pa Yehova ung’olo ire, egamu dhaku pare.
25 Re etimo ngo ribiri kude nitundo m’enyolo nyathin ma nico, man Yosefu ucaku nyinge Yesu.
Korolembe mi There
^ Kunoke “Masiya; Ng’atu ma juwiro.”
^ Kunoke “tego pa Mungu.”
^ I Lembagora mi Jugiriki mi Jukristu, nying’ Mungu ma Yehova nwang’ere wang’ dak ario pier adek wi abiro. I verse ma tung’ tung’ mi lok maeni, eni tie wang’ ma kwong’ane.
^ I dhu Juebrania nying’ maeno tie Yecuwa kunoke Yocuwa, ma thelembene tie “Yehova en e both.”
^ Kunoke “ma fodi ung’eyo co ngo.”
