Poy mi Cik 4:1-49
4 “Kawoni wuwinji, E Israel, cik man telowic mi pokolembe m’abeponjo iwu nia wuwor kara wubed kwo man wumondi wumak ng’om ma Yehova Mungu pa kwaruwu ubemiyo iwu.
2 Kud wumed kum lembe m’abeng’olo iwu kadi kud wuwodh kume kara wugwok lembang’ola pa Yehova Mungu mwu m’abeng’olo iwu.
3 “Wuneno ku weng’wu gin ma Yehova timo i lembe pa Baal mi Peor; Yehova Mungu mwu udaru cen kud i kindwu dhanu ceke ma gilubo tok Baal mi Peor.
4 Ento wun ma wumoko kii i kum Yehova Mungu mwu, wun ceke wutie kwo tin eni.
5 Nen! aponjowu ku cik man telowic mi pokolembe tap calu ma Yehova Mungu para ung’olo ira, kara wuworgi i ng’om ma wubimaku.
6 Wucikuru niworogi cuu mandha kum eno binyutho ni dhanu ma biwinjo pi cik maeno ceke nia wu riek man wunyang’ i lembe, e gibiwacu kumae: ‘M’umbe jiji, thek ma dit maeni gi dhanu ma riek man nyang’ i lembe.’
7 Kum thek ma dit ma kani ma mungu pare ni ceng’ini kude calu ma Yehova Mungu mwa ni kudwa saa moko ci ma walwong’e i iye?
8 Man thek ma dit ma kani m’utie ku cik ma pwe man telowic mi pokolembe calu cik maeni zoo m’abeketho i weng’wu tin eni?
9 “Kende kende wubed ku weng’wu man wunen ber* kara kud wuwil ku gin ma weng’wu uneno man kud giwok kud i adundewu i nindo ceke mi kwo mwu. Wucikuru bende niketho wotwu ku nyikweywu ung’eygi.
10 I nindo ma wucungo i wang’ Yehova Mungu mwu i Horeb, Yehova uyero ira kumae: ‘Cok ira dhu dhanu karacelo kara aketh giwinj lembe para kara giponj nilwora i nindo ceke ma gibikwo i iye iwi ng’om man giponj wotgi.’
11 “E wucoro ceng’ini man wucungo i the got man got ubino wang’ ku mac nitundo bir i polo;* mudho bino nuti, afuru man mudho ma bii.
12 Man Yehova caku weco i beng’wu kud i mac. Wuwinjo dwal mi wec ento wuneno ngo ayi moko, dwal kende m’ubino nuti.
13 Man etwong’o iwu lembariba pare m’eng’olo nia wuwor, niwacu Cik apar.* Yor i ng’eye, ekiewogi iwi bankidi ario.
14 I saa maeca, Yehova ung’olo ira nia aponjwu ku cik man telowic mi pokolembe ma wubiworo i ng’om ma wubimondo i iye pi nimaku.
15 “Pieno, wunen ber* kum wuneno ngo ayi moko ci i nindo ma Yehova uweco i beng’wu i Horeb kud i die mac,
16 kara kud wunyothuru ma wuyik ko iwu ayi gin m’acwiya m’ang’ika m’unyutho ayi gin moko ci, nik’ebed ayi pa co kadi pa mon,
17 ayi lei ceke m’i ng’om, kadi ayi winyo moko ci ma ringo i kor polo,
18 ayi piny moko ci ma lak alaka iwi ng’om, kadi ayi rec ceke ma n’i pii i the ng’om.
19 Kinde ma wung’ayu weng’wu i polo man wuneno ceng’ ku dwi man nyikaluku, udul mony ceke m’i polo, kud wuwek juwondwu ya wukul korwu piny igi man wutim igi. Yehova Mungu mwu umiyogi ni dhanu ceke mi the polo zoo.
20 Ento wutie ju ma Yehova uting’o man ewodho kud i ukaa mi loyo cuma kud i Misiri kara wudok dhanu ma pare gire* calu ma wutie tin eni.
21 “Ng’eicwiny umaku Yehova i kuma piwu man ekwong’o nia abikadhu ngo Yordan kadi nimondo i ng’om ma ber ma Yehova Mungu mwu ubemiyo iwu ni giralaga.
22 Kum ubekwayu atho i ng’ombuni, abikadhu ngo Yordan ento wun wubikadhu lokaca man wubimaku ng’om ma ber maeni.
23 Wubed ku weng’wu kara wiwu kud uwil i kum lembariba ma Yehova Mungu mwu utimo kudwu man kud wuyik iwu ayi gin m’acwiya m’ang’ika, ayi gin moko ci ma Yehova Mungu mwu ukwero iwu.
24 Kum Yehova Mungu mwu en e mac ma wang’u piny ruk, Mungu ma mito jutim ire kende.
25 “Tek wubinyolo wotwu man nyikweywu, man wukwo pi nindo ma lee i ng’ombe man wunyothuru ma wuyiko ko ayi gin m’acwiya m’ang’ika mi kite moko ci man wutimo lembe ma rac i wang’ Yehova Mungu mwu pi ninyayu can i iye,
26 abeting’o polo ku ng’om ni jumulembe i kumwu tin nia wubirwinyo kokoro man pio kud i ng’om ma wubekadhu Yordan pi nimaku; wubigalu ngo i iye ento wubithum kpo.
27 Yehova bilalu iwu i kind dhanu man ju ma nok m’i kindwu kende re ma biboth kud i kind thek ma Yehova biterowu i iye.
28 Kuca wubiwok timo ni mungu mi yen man mi kidi ma cing’ dhanu yiko en, mungu ma neno ngo piny, ma winjo ngo lembe, ma camu ngo kadi ma ng’wiyo de ngo piny.
29 “Tek wusayu Yehova Mungu mwu ku kuca, wubinwang’e andha, tek wukwaye kud adundewu ceke man ku ng’eyong’ec* mwu ceke.
30 Tokcenne kinde ma wubinweng’uru ku peko ma lee man lembe maeno ceke utimere i kumwu, e wubilund dwogo i bang’ Yehova Mungu mwu man wubiwinjo dwande.
31 Kum Yehova Mungu mwu tie Mungu ma jakisa, ebiwenjowu ngo, ebinyothowu de ngo man ebiwil ungo ku lembariba m’etimo ku kwong’ ni kwaruwu.
32 “Kawoni wupenji pi rundi ma yang’ con i wang’ rundi mwu, niai i nindo ma Mungu cwiyo iye dhanu i ng’om, wusay niai i gund polo acel nicidho i gunde ma kucelo. Nyo lembe moko ma dit kumeni udaru timere de kadi lembe moko ci ma kumeno udaru winjere de?
33 Nyo dhanu moko mange udaru winjo de dwand Mungu ubeweco niai kud i mac i ayi ma wuwinjo man wumeduru nibedo kwo?
34 Kunoke nyo Mungu udaru pimo de niting’o thek moko ire kud i kind thek mange ku pokolembe,* ku giranyutha, kud udu, ku lwiny, ku cing’ ma tek, ku bot m’arieya, man ku timo ma ng’oyo ndiri calu ma Yehova Mungu mwu utimo piwu i Misiri i weng’wu?
35 Wun giwu junyutho iwu lembe maenogi kara wung’ey nia Yehova tie Mungu mandha, mange mbe m’uweko en.
36 Eketho wuwinjo dwande niai kud i polo pi nitwinyowu, man iwi ng’om eketho wuneno mac pare ma dit man wuwinjo wec pare niai kud i mac.
37 “Calu m’emaru kwaruwu man eng’iyo nyikwaygi* yor i ng’eygi, ewodhowu kud i Misiri i wang’e ku tego pare ma dit.
38 Eriemo thek ma dit man ma tek nisaguwu kud i weng’wu pi niroyowu i ng’om migi man nimiye iwu ni giralaga calu m’etie ko tin.
39 Dong’ wung’ey tin eni man wugwok lembene i adundewu nia Yehova tie Mungu mandha malu i polo man piny iwi ng’om. Mange mbe.
40 Wucikuru niworo cik pare man lembang’ola pare m’abeng’olo iwu tin eni kara lembe woth iwu ma ber man ni wotwu yor i ng’eywu kara wukwo lee i ng’om ma Yehova Mungu mwu ubemiyo iwu.
41 I saa maeca, Musa ukoyo adhura adek i thenge ma yo nyangu mi Yordan,
42 kara tek ng’atu moko unego wadi akakaka ngo, ma nwang’u elar edage de ngo i wang’e, eringi i adhura acel m’i kind maeno kara ebed kwo.
43 Adhurane gini e: Bezer i langa iwi ting’ ting’* pi suru pa Ruben, Ramoth-gilead pi suru pa Gad man Galon i Bacan pi suru pa Manase.
44 Maeni tie Cik ma Musa uketho i wang’ dhanu mir Israel.
45 Eni tie poyowic, cik man telowic mi pokolembe ma Musa umiyo ni Juisrael i ng’ey ma giwok kud i Misiri,
46 i ng’om mi Yordan i poga ma n’i wang’ Beth-peor i ng’om p’ubimo Sihon mi Juamor m’ubed ubedo i Hecbon ma Musa ku Juisrael givoyo i ng’ey ma giwok kud i Misiri.
47 Gimaku ng’om pare ku ng’om p’ubimo Og mi Bacan, jubim ario mi Juamor ma gibino i ng’om ma yo nyangu mi Yordan,
48 niai i Aroer ma n’i dhu Poga mir Arnon* nitundo i kum Got Sayuni, niwacu Hermon,
49 man Araba* ceke i ng’om ma yo nyangu mi Yordan, nicidho bir i Nam mir Araba i the lung’ mi Pisga.
Korolembe mi There
^ Kunoke “wubed ku weng’wu lee mandha i kum ng’eyong’ec mwu.”
^ I dhu Juebrania: “nitundo i cwiny polo.”
^ I dhu Juebrania: “Wec apar.”
^ Kunoke “wubed ku weng’wu lee mandha i kum ng’eyong’ec mwu.”
^ Kunoke “giralaga pare.”
^ Nen Thelembe mi wec.
^ Kunoke “amulaic.”
^ I dhu Juebrania: “kodhi migi.”
^ Kunoke “pambu.”
^ Kunoke “Ndaba mir Arnon.”
^ Niwacu Nam kadu, kunoke Nam m’utho.
