Thangambere 1:1-31
1 Ku kwong’a Mungu ucwiyo polo ku ng’om.
2 Ento ng’om ubino mbe kud ayi man piny moko ubino mbe i wiye; mudho uumo wi pii ma dit, man tipo* pa Mungu uwotho kadhu kun ku kun iwi pii.
3 Man Mungu uwacu kumae: “Dong’ der ubed unuti.” E der ugam uwok.
4 I ng’ey maeno, Mungu uneno nia der utie ber, man Mungu ucaku poko kind der ku mudho.
5 Mungu ulwong’o der nia Dieceng’, mudho ke elwong’o Diewor. E uthieno bedo nuti man kugweno de bedo nuti, ceng’ mi kwong’o.
6 I ng’eye, Mungu uwacu kumae: “Dong’ kor polo* bed unuti i kind pii, kara epok kind pii ku pii.”
7 E Mungu utimo kor polo, epoko ko kind pii ma yo piny i the kor polo ku pii ma yo malu iwi kor polo. Man etimere kumeno.
8 Mungu ulwong’o kor polo nia Polo. E uthieno bedo nuti man kugweno de bedo nuti, ceng’ mir ario.
9 I ng’eye, Mungu uwacu kumae: “Dong’ pii ma n’i the polo ucok dhoggi karacelo, kakar acel, man ng’om m’uthwo uwoki.” Man etimere kumeno.
10 Mungu ulwong’o ng’om m’uthwo nia Ng’om, ento pii m’ucoko dhoggi ke elwong’o Nam. Man Mungu uneno nia e ber.
11 I ng’eye, Mungu uwacu kumae: “Dong’ ng’om utwii lum kud uboko ma cego nying’gi, man kwond yen ma tung’ tung’ ma cego nying’gi, ma cego nying’gi ku kodhi i igi iwi ng’om.” Man etimere kumeno.
12 Man ng’om ucaku twiyo lum kud uboko ma cego nying’gi, man kwond yen ma tung’ tung’ ma cego nying’gi ku kodhi i igi. Man Mungu uneno nia e ber.
13 E uthieno bedo nuti man kugweno de bedo nuti, ceng’ mir adek.
14 I ng’eye, Mungu uwacu kumae: “Dong’ piny ma rienyo der ubed unuti i kor polo pi nipoko kind dieceng’ ku diewor, man gibibedo ni giranyutha pi saa pa koth ku saa pa ceng’, pi nindo man oro.
15 Gibibedo ni piny ma rienyo der i kor polo pi nimiyo der iwi ng’om.” Man etimere kumeno.
16 Man Mungu utimo piny ario ma dongo ma rienyo der; ma dit m’usagune pi nirieny* dieceng’, ma nyanokne ke pi nirieny diewor, man etimo bende nyikaluku.
17 E Mungu ukethogi i kor polo kara gimii der iwi ng’om,
18 girieny* dieceng’ ku diewor man gipok kind der ku mudho. E Mungu uneno nia e ber.
19 E uthieno bedo nuti man kugweno de bedo nuti, ceng’ mir ang’wen.
20 I ng’eye, Mungu uwacu kumae: “Dong’ pii upong’ bik ku giracwiya ma kwo, man giracwiya ma juvombgi giring i kor polo malu iwi ng’om.”
21 Man Mungu ucwiyo giracwiya ma dongo m’i nam, ku giracwiya ceke ma kwo ma wotho man m’upong’ bik i pii ku kwondgi ku kwondgi, man bende giracwiya ceke ma juvombgi ku kwondgi ku kwondgi. E Mungu uneno nia e ber.
22 I ng’ey maeno, Mungu umiyo igi mugisa, ewacu kumae: “Wunyol, wunyay man wupong’ pii mi nam, man dong’ giracwiya ma juvombgi unyay iwi ng’om.”
23 E uthieno bedo nuti man kugweno de bedo nuti, ceng’ mir abic.
24 I ng’eye, Mungu uwacu kumae: “Dong’ ng’om uwodh giracwiya ma kwo ku kwondgi ku kwondgi: lei mi pacu, lei ma mol ku korgi,* man yedi mi lum ku kwondgi ku kwondgi.” Man etimere kumeno.
25 E Mungu ucwiyo yedi ma tung’ tung’ m’i lum ku kwondgi ku kwondgi, man lei m’i pacu ku kwondgi ku kwondgi, man lei ceke ma mol ku korgi* iwi ng’om ku kwondgi ku kwondgi. E Mungu uneno nia e ber.
26 I ng’eye, Mungu uwacu kumae: “Dong’ wacwii dhanu i ayiwa, calku kitwa; man dong’ gibim wi rec m’i nam, wi giracwiya ma juvombgi m’i kor polo, wi lei m’i pacu, wi ng’om zoo, man wi giracwiya ma lak alaka ma wotho iwi ng’om.”
27 E Mungu ucwiyo dhanu i ayine, i ayi Mungu ecwiyo dhanu. Ecwiyogi nico ku dhaku.
28 Bende Mungu umiyo igi mugisa man ewacu igi kumae: “Wunyol, wunyay, wupong’ ng’om man wubim wiye, wubim wi rec m’i nam, wi giracwiya ma juvombgi m’i kor polo man wi giracwiya ceke ma kwo ma wotho iwi ng’om.”
29 I ng’eye, Mungu uwacu kumae: “Amiyo iwu uboko ceke ma cego nying’gi ma n’i wi ng’om zoo man yen ceke ma cego nying’gi ku kodhi i igi, kara gibed iwu ni cemo.
30 Man amiyo lum* ma numu ubed ni cemo ni yedi ceke m’i lum ku giracwiya ceke ma juvombgi m’i kor polo, man piny ceke ma kwo n’i igi ma wotho iwi ng’om.” Man etimere kumeno.
31 I ng’ey maeno, Mungu uneno piny ceke m’ecwiyo man nen! gi ber dit. E uthieno bedo nuti man kugweno de bedo nuti, ceng’ mir abusiel.
Korolembe mi There
^ Kunoke “tego.”
^ Kunoke “apokapiny.”
^ Kunoke “nibimo.”
^ Kunoke “gibim.”
^ Kunoke “ma lak alaka.”
^ Kunoke “ma lak alaka.”
^ Kunoke “uboko.”
