Thangambere 2:1-25
2 I ayi maeno re ma Mungu udaru cwic mi polo ku ng’om man piny ceke* ma n’i igi.
2 Man i ceng’ mir abirone nwang’u dong’ Mungu udaru tic m’ebino timo. E i ceng’ mir abiro ecaku yom i kum tic ceke m’ebino timo.
3 Man Mungu umiyo mugisa iwi ceng’ mir abiro man edwoke leng’, kum i ceng’ maeno Mungu uyom i kum tic pare ceke mi cwic m’egam epangu nitimo.
4 Maeni en e kpawa mi polo ku ng’om i rundi ma jugam jucwiyogi i iye, i ceng’ ma Yehova* Mungu ucwiyo ng’om ku polo.
5 Nwang’u fodi yen m’i lum umbe iwi ng’om man uboko de ucaku twii ngo, pilembe nwang’u fodi Yehova Mungu uketho ngo koth ucwii iwi ng’om man dhanu de bino mbe pi nifuro ng’ombe.
6 Ento lietho ubed uduny kud i ng’om man ubed ung’iero thoi iwi ng’om zoo.
7 Man Yehova Mungu ucwiyo ng’atu ma nico kud utur mi ng’om man ekudho yuyo mi kwo i odi ume, e nicone udoko dhanu ma kwo.*
8 Bende, Yehova Mungu uyiko podho i Eden yo nyangu, man eketho ng’atu ma nico m’ecwiyo i iye.
9 Pieno, Yehova Mungu uketho kwond yen ceke ma beco pir anena man ma beco pir acama utwii iwi ng’om, man bende yen mi kwo i diere mi podhone ku yen mi ng’eyong’ec mi gin ma ber ku gin ma rac.
10 Kulo moko bino mol niai i Eden pi nikelo pii i podhone, man ku keca epokere ni kulo ang’wen.*
11 Nying’ kulone ma kwong’a utie Picon; en re m’edhoko ng’om ceke mir Havila kaka ma mola ma kwar nwang’ere i iye.
12 Mola ma kwar mi ng’ombe utie ma beco. Udok ma ng’wice ng’ar ma nyinge bedelium man kidi ma pire tek ma nyinge Oniks* de nwang’ere keca.
13 Nying’ kulo mir arionde utie Gihon; en re m’edhoko ng’om ceke mi Kuc.
14 Nying’ kulo mir adege utie Hidekel;* en re m’ebemol ecidho yo nyangu mir Asiria. Man kulo mir ang’wende utie Efrath.
15 E Yehova Mungu uting’o ng’atu ma nico man ekethe i podho mir Eden kara efure man egwoke.
16 Yehova Mungu umiyo bende ni ng’atu ma nicone cik ma e: “Icopo camu nying yen moko ci m’i podho i kadhiri ma ii yenyo.
17 Ento kud icam nying yen mi ng’eyong’ec mi gin ma ber ku gin ma rac, kum i ceng’ m’ibicame i iye ci, ibitho andha.”
18 I ng’eye, Yehova Mungu uwacu kumae: “Etie ber ungo nia ng’atu ma nico ubed kende. Abitimo ire jakony m’uromo kude tap.”
19 Ento nwang’u Yehova Mungu ucwiyo yedi ceke m’i lum ku ng’om, man giracwiya ceke ma juvombgi m’i kor polo, man ecaku terogi i bang’ ng’atune pi nineno ka nyo ebicaku nying’gi nenedi; e nying’ ma ng’atune ulwong’o ko giracwiya ma kwo kubang’e kubang’e ci, nying’ne dong’ de kumeca.
20 Pieno, ng’atune ucaku nying’ lei ceke m’i pacu man nying’ yedi ceke m’i lum ku giracwiya ceke ma juvombgi m’i kor polo; ento ng’atu ma nico eno ubino mbe ku jakony m’uromo kude tap.
21 E Yehova Mungu uketho ng’atu ma nico unindo nindo ma pek, man kinde m’ebenindo, ewodho wel ng’ete acel, i ng’eye eciko ring’kum kakare.
22 Man Yehova Mungu ucwiyo dhaku ku wel ng’et m’ewodho i kum nico, man ekele i bang’ nicone.
23 E ng’atu ma nicone uwacu kumae:
“Eni kan afonwang’u cogo mi cogonaman ring’o mi ring’ kuma.
Jubilwong’e Dhaku,pilembe juwodhe kud i kum nico.”
24 Pi thelembe maeno, nico biweko won ku min man ebimoko i kum dhaku pare, man gibidoko kum acel.
25 Ento nico giku dhaku pare zoo gibedo muneru, re lewic ubino negogi ngo.
Korolembe mi There
^ I dhu Juebrania: “udul migi ceke.”
^ Eni tie kaka ma kwong’a ma nying’ Mungu ma dhe ubenwang’ere i iye, man nying’ne uketho tung’ tung’ i kindgi ku mungu mange ceke. Nen Thenge ma jumedo A4.
^ Kunoke “ng’eyong’ec.” Ku dhu Juebrania wecne tie nefec, ma ka juloke kite m’etie ko thelembene tie “giracwiya ma yuyo.” Nen Thelembe mi wec.
^ I dhu Juebrania: “edoko wic ang’wen.”
^ Nen Thelembe mi wec.
^ Kunoke “Tigre.”
