Thangambere 29:1-35
29 I ng’ey lembe maeno, Yakobo umedo ku woth pare man ecidho i ng’om mi dhanu ma yo Nyangu.
2 E ewok eneno pii m’atong’a moko i lum man udul rombe adek ma tung’ tung’ uvuto ceng’ini i ng’ete keca, pilembe jukwac gibed giketho udul lim bemadhu pii m’atong’a maeca. Man kidi ma dit uumo dhu pige.
3 Kinde m’udul limne ceke gicoko dhoggi keca, e jukwac ging’ielo kidine kud i dhu pii m’atong’a man gimiyo pii ni udul lim, i ng’eye gidwoko kidine kakare i dhu pii m’atong’a.
4 Pieno, Yakobo upenjogi kumae: “Umego para, wu dhanu ma kani?” Gidwoko ire kumae: “Wa dhanu mir Haran.”
5 Edog epenjogi kumae: “Nyo wung’eyo Laban ma nyakwar Nahor de?” Gidwoko ire kumae: “Eyo, wang’eye.”
6 E epenjogi kendo kumae: “Nyo etie ma beri?” Gidwoko kumae: “Eyo, etie ma ber. Nen, nyare ma Racel de ubebino ku rombe ca!”
7 I ng’eye ewacu kumae: “Fodi eni tie dieceng’. Etie ngo saa mi coko dhu lim. Wuketh rombe madh pii man wucidh wukwaygi.”
8 Gilund giyero ire kumae: “Eyiyere ngo iwa nitimo kumeno ka fodi wakucoko ngo dhu lim ceke karacelo, man ka fodi wang’ielo ngo kidi kud i dhu pii m’atong’a. I ng’ey maeno ka wamiyo pii ni rombe.”
9 Kinde ma fodi ebeweco kugi, Racel ugam utundo ku rombe pa won, kum ebino jakwac.
10 Kinde ma Yakobo uneno Racel ma nyaku pa Laban ma nerumire, man rombe pa Laban, e wang’ acel Yakobo ucoro i dhu pii m’atong’ane man eng’ielo kidi ma n’i dhoge, man eketho rombe pa Laban ma nerumire umadhu pii.
11 I ng’eye, Yakobo ucwiyo limb Racel man eting’o dwande ecaku wak.
12 E Yakobo ucaku koro ni Racel nia etie wat pa won,* man nia etie wod Rebeka. Man Racel uringo ucidh uyero ni won.
13 Kinde ma Laban uwinjo lembe ma judwoko ire pi Yakobo ma wod nyamin ci, eringo ndhu ndhu pi nicirombo kude. Ewok egwake, ecwiyo limbe, man edok kude yo pare. Yakobo ucaku koro lembe maeno ceke ni Laban.
14 E Laban ugam uyero ire kumae: “Itie andha cogona man ring’ kuma.”* E ebedo i bang’e dwi acel zoo.
15 I ng’eye, Laban uyero ni Yakobo kumae: “Eni nia pilembe itie wat para* ci dong’ ukwayu itim ira mi mananu? Yer ira nia cul peri bibedo ang’o?”
16 Nwang’u Laban ubino ku jumanyir ario. Ma ditne nyinge ubino Leya, man ma nokne ke nyinge ubino Racel.
17 Wang’ Leya ubino leng’ ungo, ento nwang’u Racel lundo udoko nyaku ma leng’ magwei.
18 Yakobo ke nwang’u dong’ umaru pare Racel lee, pieno eyero kumae: “Atie ayika nitimo iri pi nyaku peri ma nok ma Racel no pi oro abiro.”
19 E Laban uwacu kumae: “Etie ber nia amiye iri kakare nimiye ni nico mange. Dong’ bed asu i bang’a.”
20 Man Yakobo utimo tic oro abiro pi Racel, ento i wang’e udog ubedo ve etimo nindo moko kende nikum mer m’emare ko.
21 I ng’eye, Yakobo uyero ni Laban kumae: “Mii dhaku para kum nindo mi tic para udaru thum, kara atim kude ribiri.”
22 E Laban ucoko dhanu ceke mi kabedone man etimo foc.
23 Ento kud uthieno, Laban ulund uting’o nyare ma Leya re m’etero i bang’ Yakobo kara etim kude ribiri.
24 Laban uting’o bende bong’ pare ma Zilpa man emiye ebed ni bong’ pa nyare ma Leya.
25 Kugweno Yakobo uneno nia karaman utie Leya! Pieno eyero ni Laban kumae: “Itimo ira ang’o eni? Nyo utie ngo pi Racel re m’atimo iri? Pirang’o ke iwonda?”
26 E Laban udwoko ire kumae: “I bang’wa keni jular jumiyo ngo nyaku ma nok i wang’ ma kayu.
27 Kedar yenga acel mir ambadha pa dhaku maeno. I ng’ey maeno, wabimiyo iri bende dhaku mucelo pi tic m’ibitimo ira oro abiro mange.”
28 Yakobo utimo kumeno man etimo yenga mir ambadha pa dhakune, i ng’eye Laban umiyo ire nyare ma Racel ni dhaku.
29 Bende, Laban umiyo bong’ pare ma Bilha ubed ni bong’ pa nyare ma Racel.
30 I ng’eye, Yakobo utimo ribiri ku Racel bende, man emaru Racel lee nisagu Leya, e etimo tic oro abiro mange ni Laban.
31 Kinde ma Yehova uneno nia jumaru ngo Leya, eketho egamu iye,* ento Racel ubino jamugumba.
32 Pieno, Leya ugamu iye man enyolo nyathin ma nico; ecaku nyinge Ruben,* kum eyero kumae: “Tie pilembe Yehova uneno can para, kum kawoni cwara bicaku mara.”
33 Egamu iye kendo man enyolo nyathin ma nico, e ewacu kumae: “Tie pilembe Yehova uwinjo nia jumara ngo, uketho emiyo ira maeni bende.” E ecaku nyinge Simeon.*
34 Kendo de egamu iye man enyolo nyathin ma nico, ewacu kumae: “Kawoni dong’ cwara bimoko en gire i kuma, pilembe anyolo ire awiya adek ma co.” Pieno jucaku nyinge Lawi.*
35 Edog egamu iye kendo man enyolo nyathin ma nico, e ewacu kumae: “Ma wang’uni abipaku Yehova.” Pieno, ecaku nyinge Yuda.* I ng’ey maeno nyodo ukang’ ire.
Korolembe mi There
^ I dhu Juebrania: “umin won.”
^ Kunoke “watie rimo acel.”
^ I dhu Juebrania: “umira.”
^ I dhu Juebrania: “eyabu dhug usau nyodo pare.”
^ Thelembene tie “Nen, nyathin ma nico!”
^ Thelembene tie “Niwinjo.”
^ Thelembene tie “Nidikiri; Nimoko.”
^ Thelembene tie “Pak; Jampak.”
