Thangambere 30:1-43
30 Kinde ma Racel uneno nia enyolo ngo awiya ni Yakobo, nyeko make i kum nyamin, man ecaku yero ni Yakobo kumae: “Mii ira awiya, kan ungo abitho.”
2 E ng’eicwiny pa Yakobo ugam uopo i kum Racel man ewacu kumae: “Nyo adoko Mungu m’uceri ku nyolo awiya?”
3 Pieno, Racel uyero kumae: “Bong’ para ma Bilha ni e. Tim kude ribiri kara enyol awiya ira,* ketho nikadhu kud i bang’e an de atuc nibedo kud awiya.”
4 E Racel ugam umiyo Bilha ma bong’ pare ni dhaku ire, man Yakobo utimo kude ribiri.
5 Man Bilha ugamu iye, e i ng’ey kare enyolo nyathin ma nico ni Yakobo.
6 I ng’eye, Racel uyero kumae: “Mungu upoko lembe para pwe man ewinjo bende dwanda, uketho emiyo ira nyathin ma nico.” Pi thelembe maeno re m’ecaku nyinge Dan.*
7 Bilha ma bong’ pa Racel ugamu iye kendo, man i ng’ey kare enyolo nyathin ma nico mir arionde ni Yakobo.
8 Man Racel uwacu kumae: “Anyego anyego ma tek i dhu nyamira. Man aloye!” Pieno, ecaku nyinge Nafthali.*
9 Saa ma Leya uneno nia ejigo ninyolo nyodo, egam eting’o bong’ pare ma Zilpa man emiye ebed dhaku ni Yakobo.
10 Man Zilpa ma bong’ pa Leya unyolo nyathin ma nico ni Yakobo.
11 E Leya uyero kumae: “Mugisa ma kani maeni!” Pieno ecaku nyinge Gad.*
12 I ng’ey maeno, Zilpa ma bong’ pa Leya unyolo nyathin ma nico mir arionde ni Yakobo.
13 Man Leya uwacu kumae: “Eni anyong’a kwa ira! Andha jumanyir bilwong’a jamutoro.” E ecaku nyinge Acer.*
14 Ceng’ moko kinde ma Ruben ubino wotho i nindo mi kayu nganu, ewok enwang’u nying mandragor i lum, man ekelogi i bang’ Leya ma min. I ng’eye, Racel uwacu ni Leya kumae: “Akweyi, kemii ira nying mandragor pa wodi no moko.”
15 Leya udwoko ire kumae: “Lembe m’imayu ko cwara e de fodi uromo ngo weng’i? Kawoni ibemito imay bende nying mandragor pa woda?” Pieno, Racel udwoko kumae: “Ber dit. Ebivuto kudi diewor ma tin kawang’ nying mandragor pa wodi.”
16 Ku dhug uthieno saa ma Yakobo ubedwogo kud i lum, Leya uwok woko pi nicirombo kude man ewacu kumae: “An re m’ibivuto kuda, pilembe ang’iewo twerone ku nying mandragor pa woda.” Pieno, evuto kude diewor maeca.
17 Mungu ugam uwinjo man udwoko wang’ kwac pa Leya, e egamu iye man i ng’ey kare enyolo nyathin ma nico mir abije ni Yakobo.
18 I ng’eye, Leya uwacu kumae: “Mungu umiyo ira sukulia para, pilembe amiyo bong’ para ni cwara.” Pieno, ecaku nyinge Isakar.*
19 Man Leya ugamu iye kendo, e i ng’ey kare enyolo nyathin ma nico mir abusiende ni Yakobo.
20 Leya ugam uyero kumae: “Mungu umiyo ira giramiya ma ber, eyo, ira an. Kawoni dong’ won ot para biol yiyo nibedo kuda, kum anyolo ire awiya ma co abusiel.” Pieno, ecaku nyinge Zebulon.*
21 I ng’eye, enyolo nyathin ma nyaku man ecaku nyinge Dina.
22 Tokcenne Mungu upoy pi Racel man ewinjo kwac pare, e eketho egamu iye.*
23 Egamu iye man enyolo nyathin ma nico. E ewacu kumae: “Mungu ukabu lewic m’i wiya cen!”
24 Pieno ecaku nyinge Yozefu,* man eyero kumae: “Yehova umedo ira nyathin ma nico mange.”
25 I ng’ey ma Racel unyolo Yozefu, Yakobo uwacu ndhu ndhu ni Laban kumae: “Wek aai kara adok i pacu para man i ng’om ma thuwa.
26 Mii mon para kud awiya para m’atimo iri tic pigi, kara acidhi; kum ing’eyo cuu mandha maram atimo ko iri tic.”
27 E Laban udwoko ire kumae: “Tek anwang’u bero i weng’i, kebed asu timba, pilembe anyang’ nikum giranyutha* nia Yehova ubemiyo mugisa ira nikumi.”
28 Man emedo kumae: “Ng’ol ira cul peri, man abimiye iri.”
29 E Yakobo uyero ire kumae: “Ing’eyo maram atimo ko tic iri, man maram udul lim peri unyay ko nikuma;
30 i wang’ tundo para ibino ku lim nyanok, ento kawoni gimediri man ginyay lee, man Yehova umiyo iri mugisa niai m’atundo. Dong’ an ke abitimo piny moko pi ot para ma dhe awene?”
31 Laban upenje kumae: “Amii ang’o iri?” Yakobo udwoko kumae: “Ibimiyo ngo ira gin moko acel de! Ento abidocaku kwayu udul lim peri kendo man nikurogi, tek ibitimo ira lembe acel ma e:
32 Abikadhu i kind udul lim peri ceke tin eni. Koy kud i kindgi rombe ceke ma kumgi kwici kwici man ma jurangi, nyithi nyogi rombe ceke ma nyakwar kwar, man megi diegi ceke ma jurangi ku ma kumgi kwici kwici. Niai kawoni, eno re ma bidoko cul para.
33 Man bedopwe para* biweco pira nindo ma cen kinde m’ibibino nineno cul para. Lim ceke ma kumgi kwici kwici ngo, man ma jurangi ngo i kind megi diegi, man ma nyakwar kwar ungo i kind nyithi nyogi rombe, bibedo ni gin ma jukwalu akwala tek ginwang’iri i bang’a.”
34 Laban ugam udwoko kumae: “Ber dit! Dong’ ebed de ve m’iyero eno.”
35 E i nindo ma rom eca, ekoyo nyogi diegi ceke ma kumgi thumo man ma jurangi ku megi diegi ceke ma kumgi kwici kwici man ma jurangi, lim ceke m’ubino ku rangi ma tar man m’ubino ku rangi ma nyakwar kwar kud i kind nyithi nyogi rombe man emiyo wote ugwokgi.
36 I ng’ey lembe maeno, Laban ucidho bor i woth mi bang’ adek pi nipoko kindgi ku Yakobo, man Yakobo uwotho kwayu dong udul lim pa Laban m’udong’.
37 Man Yakobo utong’o uluth ma numu mi yend storak, mi yend amand, man mi yend platan; ealu kor uluthnegi kwici kwici ma ka moko udong’ ubenen ma tar.
38 Eketho uluth m’ealu kumgine i wang’ udul lim i tharasi ma pii mol kud i iye pi nicidho i wer, kaka m’udul lim bino madhu iye pii, kara giwoth poro i wang’ uluthnegi kinde ma gibino madhu pii.
39 Pieno udul limne ubed uporo i wang’ uluthnegi, uketho gibed ginyolo nyithindhgi ma kumgi thumo, ma kwici kwici, man ma jurangi.
40 I ng’eye Yakobo ukoyo nyithi nyogi rombe man eloko wang’ udul limne yor i bang’ lim ma kumgi thumo, man lim ceke ma nyakwar kwar m’i kind udul lim pa Laban. I ng’eye epoko kind udul lim ma pare, man ejebogi ngo kud udul lim pa Laban.
41 Man saa ceke ma ka lim ma tek gibeporo, Yakobo ketho uluth i tharasi ma pii mol kud i iye i wang’ udul lim, kara gipor ceng’ini kud uluthnegi.
42 Ento kan utie lim ma tego migi nok, eketho ngo uluthne keca. Pieno, lim ma tego migi nok zoo ubed ubedo pa Laban, ento ma tek ubed ubedo pa Yakobo.
43 Tokcenne Yakobo ulony lee mandha, man ebedo kud udul lim dupa, man jutic ma co ku ma mon, ngamia man kana.
Korolembe mi There
^ I dhu Juebrania: “enyol iwi conga.”
^ Thelembene tie “Japoklembe.”
^ Thelembene tie “Anyego para.”
^ Thelembene tie “Mugisa.”
^ Thelembene tie “Jamutoro; Mutoro.”
^ Thelembene tie “En e sukulia.”
^ Thelembene tie “Niyiyo.”
^ I dhu Juebrania: “Mungu uwinje man eyabu dhug usau nyodo pare.”
^ Eno tie nying’ ma Yosifia i adundo, ma thelembene tie “Yah medi (Enyay).”
^ Kunoke “anyang’ kamaleng’.”
^ Kunoke “andha para.”
