Thangambere 37:1-36
37 Yakobo umedere nibedo i ng’om mi Kanan, kaka ma won ubed ukwo i iye calu umondo.
2 Maeni en e kpawa pa Yakobo.
Kinde ma oro pa Yozefu udoko apar abiro, jalawobine ubed ukwayu udul lim karacelo ku wot Bilha man wot Zilpa ma gi mon pa won. Man Yozefu ubin unyutho ni weggi pi lembe ma reco ma gibed gitimo.
3 Nwang’u Israel umaru Yozefu lee nisagu wote mange ceke, pilembe ebino wode mi tiyo pare, man eketho juyiko ire kanzu moko ma segi.*
4 Saa m’umego pare gineno nia weggi umare nikadhu umego pare ceke, gigam gidage man gicopo weco ngo ma ber i bang’e.
5 I ng’ey kare, Yozefu uleko lek moko man ekoro lekne ni umego pare, eno uketho gifodage dong’ magwei.
6 Ewacu igi kumae: “Akwayuwu, wukewinj lek m’aleko e:
7 Nen, wabetwiyo cam i die podho ni kanga, e kanga para ugam uai malu man ecungo atira. Man nen, kanga mwu gibino gitieko kangane man girum ni kanga para.”
8 Umego pare gigam giyero ire kumae: “Nyo andha ibikethiri giri ni ubimo i wiwa man ibibimo wiwa?” Pieno ginwang’u thelembe mange mi dage pi lek pare man pi lembe m’eyero.
9 I ng’ey maeno, edog eleko lek mange, man ekoro lekne ni umego pare ewacu kumae: “Aleko lek mange. Ma wang’uni lundo, ceng’ ku dwi man nyikaluku apar acel girum piny ira.”
10 I ng’eye, ekoro lekne ni won man ni umego pare bende, ento won ujuke man uwacu ire kumae: “Lek m’ileko no thelembene tie ang’o? Nyo an karacelo ku meru man umego peri wabibino andha man wabirum piny i ng’om iri?”
11 E kumira ucaku nego umego pare i kume, ento won ukanu lembene i iye.
12 Umego pare gigam gicidho pi nikwayu udul lim pa weggi ceng’ini ku Cekem.
13 I ng’ey kare, Israel uwacu ni Yozefu kumae: “Umego peri gibekwayu udul lim ceng’ini ku Cekem si? Dong’ bin aori i bang’gi.” E Yozefu udwoko ire kumae: “Ber, atie ayika!”
14 Pieno ewacu ire kumae: “Akweyi, kecidh inen ka nyo umego peri gibedo ma ber man ka nyo udul lim utie nenedi. Man idwog ikor ira.” E egam eore niai kud i poga* mir Hebron, man ecidho yor i Cekem.
15 I ng’ey kare, jalwo moko unwang’e ebewotho swa i die lum. E jalwone upenje kumae: “Ibesayu ang’o?”
16 Edwoko kumae: “Abesayu umego para. Dong’ akweyi, kenyuth ira, gibekwayu udul lim kani?”
17 Jalwone udwoko kumae: “Gidaru ai ku keni, kum awinjo gibeyero nia, ‘wacidhu i Dothan.’” Pieno Yozefu ulubo tok umego pare man ewok enwang’ugi i Dothan.
18 E ginene ku bor, man ma fodi etundo de ngo i bang’gi ci gicaku pangu lembe i kume pi ninege.
19 Gicaku yero i kindgi kumae: “Nen! Jalek lek ubebino ca.
20 Dong’ kawoni wubin wanegue man wabole i vuj pii moko, e wabiyero nia yedi moko ma kwiny m’i lum ucame. I ng’eye, wabineno gin ma biwok i kum lek parene.”
21 Kinde ma Ruben uwinjo kumeno, esayu yore mi bodhe kud i cing’gi. Pieno ewacu kumae: “Kud wakebu kwo pare.”
22 Ruben uyero bende igi kumae: “Kud wucwir rimo. Wubole i vuj pii maeni mi langa, ento kud wutime rac.”* Ebino mito ebodhe kud i cing’gi kara edwoke i bang’ won.
23 Kinde ma Yozefu utundo i bang’ umego pare ci, e ndhu ndhu giwodho kanzu pare kud i kume, kanzu ma leng’ ma nwang’u ekendo,
24 man gimake gibole i vuj pii. I saa nica nwang’u vuje iye nanu; pii ubino mbe i iye.
25 I ng’eye, gibedo piny pi nicamu. Kinde ma giting’o wang’gi, gineno piro mi Juismael uai i Gilead ubebino. Ngamia migi uyeyo mo ma ng’wice ng’ar ma julwong’o labdanum, moj balsam, man apoka yen ma tie kud udoge, man gibino loro i Misiri.
26 E Yuda uyero ni umego pare kumae: “Berone ang’o tek wanego umegwa man wamung’o pi tho pare?*
27 Dong’ wubin walworue ni Juismael, man kud waketh cingwa i kume. Kum de en umegwa, ring’ kumwa.” Pieno giwinjo dwand umeggi.
28 Man kinde ma jukuloka mi Midian gibino kadhu ku keca, giwodho Yozefu kud i vuj pii man gilwore ni Juismael tongolo mi mola ma tar pier ario. Dhanu maeno gicidho ku Yozefu i Misiri.
29 I ng’eye, kinde ma Ruben udwogo i dhu vuj pii man eneno nia Yozefu umbe i vuje, eyeco bongu pare.
30 Kinde m’edwogo i bang’ umego pare, ekok kumae: “Nyathinne mbe! Man an, abitimo ang’o?”
31 E giting’o kanzu pa Yozefu, ginego nyog diel man giroyo kanzune i rimbe.
32 I ng’ey maeno, gioro kanzu ma segine i bang’ weggi ku kwenda ma e: “Eni gin ma wanwang’u. Dong’ keng’ii ka nyo e kanzu pa wodi kunoke ngo.”
33 E eng’iye man ekok kumae: “Eni kanzu pa woda! Eni paka yedi ma kwiny udaru came! Eyeco i Yozefu ndhu andha nziki nziki ba!”
34 E Yakobo uyeco bongu pare, etwiyo kendi mi saki i piere, man ewagu wode pi nindo dupa.
35 Man wote ceke ku nyige ceke gimediri nijuko cwinye, ento ewotho kwero juk m’ebewacu kumae: “Abiloro piny i Liel* m’abewagu woda!” Man won Yozefu umedere niwage.
36 Jumidian giwok gilworo Yozefu i Misiri ni Pothifar ma jatic ma dit pa Farao man jadit mi jukur kum ubimo.
Korolembe mi There
^ Kunoke “bongu ma leng’ ma bor.”
^ Kunoke “pambu mi poga.”
^ Kunoke “kud wuketh cingwu i kume.”
^ I dhu Juebrania: “waumo wi rimbe?”
^ Kunoke “Ceol,” niwacu liel mi dhanu ceke. Nen Thelembe mi wec.
