Thangambere 42:1-38
42 Kinde ma Yakobo uwinjo nia cam* unuti i Misiri, ewacu ni wote kumae: “Pirang’o wubedo mwu abeda ma ng’atuman ubeneno wang’ wadi?”
2 Emedo kumae: “Awinjo nia cam unuti i Misiri. Dong’ wulor kuca pi nicing’iewo iwa cam moko, kara wabed kwo man kud watho.”
3 Pieno umego pa Yozefu apar giloro i Misiri pi ning’iewo cam.
4 Ento Yakobo uoro ngo Benjamin m’umin Yozefu karacelo kud umego pare mange, kum ewacu kumae: “Saa moko nyo ret ma lee copo wok nwang’e man etho.”
5 E wot Israel gibino karacelo ku dhanu mange m’ubino ng’iewo cam, pilembe ndrune utundo bir i ng’om mi Kanan.
6 Nwang’u Yozefu re m’ubino ng’atu ma tie ku dito iwi ng’ombe, man en re m’ebed elworo cam ni dhanu ceke m’i wi ng’om. E umego pa Yozefu gigam gitundo man girum ire arieba wang’gi i ng’om.
7 Kinde ma Yozefu uneno umego pare, eng’iyogi wang’ acel, ento enyuthere ngo igi. Pieno eweco igi ku kwinyo man ewacu kumae: “Wuai kani?” Gidwoko ire kumae: “Waai i ng’om mi Kanan pi nibino ng’iewo cam.”
8 E Yozefu ung’iyo umego pare, ento gin ging’iye ngo.
9 Yozefu upoy wang’ acel pi lek m’egam eleko pigi, man ewacu igi kumae: “Wu julib! Wubino kara wunen theng ng’om mwa ma tie ngo agwoka!”
10 Ento gidwoko ire kumae: “Ungo, rwoth para, jutic peri gibino pi ning’iewo cam.
11 Wan ceke wan awiya pa ng’atu acel. Wa dhanu m’atira. Jutic peri tie ngo julib.”
12 Ento ewacu igi kumae: “Eno ndra! Wubino kara wunen theng ng’om mwa ma tie ngo agwoka!”
13 Gidwoko ire kumae: “Jutic peri gin umego apar ario. Wan awiya pa ng’atu acel i ng’om mi Kanan, man kawoni nyathin ma cogo udong’ ku wegwa, ento ma kucelo re dong’ umbe.”
14 Ento Yozefu uwacu igi kumae: “Tie tap calu m’ayero iwu: ‘Wu julib!’
15 Jubimulo iwu ku lembe ma e: Tek andha fodi Farao kwo ci, wubiai ungo kud i kabedo maeni, cil ma umegwu ma cogo bibino keni.
16 Wuor ng’atu acel m’i kindwu ucidh ugam umegwu, ento wun wubidong’ atwiya keni. I ayi maeno re m’abing’eyo ka nyo lembe ma wubeyero utie lemandha. Ento kan ungo re, tek andha fodi Farao kwo ci, nwang’u wu julib.”
17 Pieno, ebologi karacelo i kol pi nindo adek.
18 I nindo mir adege, Yozefu uwacu igi kumae: “Wutim lembe ma e kara wubed kwo, kum alworo Mungu:
19 Tek wu dhanu m’atira, wuwek ng’atu acel m’i kindwu udong’ atwiya i kol keni, ento wu jumange wucopo cidho nitero cam pi nijwigo lak ndru i udi mwu.
20 I ng’eye, wukel umegwu ma cogo i bang’a, kara ang’ey ka nyo wubeyero lemandha, e wubitho ngo.” Man gitimo kumeno.
21 Ento gicaku wacu i kindgi kumae: “Eni ndhu andha wabenwang’u matira pir umegwa ba! Pilembe wanene m’ebesendere kinde m’ebepaku dhoge iwa nia wabed ku kisa i kume, ento wawinjo ngo. Eno re m’uketho wabenwang’ara ku masendi maeni.”
22 E Ruben udwoko igi kumae: “Nyo agam ayero ngo iwu nia, ‘kud wutim nyathin no raci?’ Ento wuwinja ngo. A wunen, kawoni jubekwayu rimbe andha .”
23 Ento ging’eyo ngo nia Yozefu ubenyang’ i lembe ma gibeyero, kum jalok dhok ubino nuti i kindgi.
24 Pieno Yozefu uai kud i vutgi man ecaku wak. Kinde m’edwogo man eweco i bang’gi kendo, emaku Simeon kud i kindgi man etwiye i wang’gi.
25 I ng’eye, Yozefu ung’olo nia juketh cam bik i saki migi, man nia judwok sente pa ng’atuman i saki pare, bende jumii igi cam ma gibiwok camu i yo. E jutimo igi kumeno.
26 Pieno giketho cam migi iwi kana migi man giai ku keca.
27 Saa ma gitundo i kabedo m’ukwayu givut i iye, ng’atu acel m’i kindgi ugam uyabu dhu saki pare pi nimiyo cam ni kana pare. E eneno sente pare i dhu sakine.
28 Egam eyero ni umego pare kumae: “Judwogo sente para, man en’i saki para e!” E adundegi ucaku dhongo, kumgi de ucaku miel, man giwacu i kindgi kumae: “Eni re Mungu utimo iwa lembang’o eni?”
29 Kinde ma gitundo i bang’ Yakobo ma weggi i ng’om mi Kanan, gikoro ire lembe ceke m’uwok unwang’ugi, giwacu kumae:
30 “Jalwo ma rwoth m’i ng’ombuca uweco i bang’wa ku kwinyo man eloko nia wacidho nilibo ng’om.
31 Ento wayero ire nia, ‘wa dhanu m’atira. Wa julib ungo.
32 Wan umego apar ario, wegwa acel. Nyathin acel dong’ umbe, man ma cogo ke kawoni udong’ ku wegwa i ng’om mi Kanan.’
33 Ento jalwo ma rwoth m’i ng’ombe uwacu iwa kumae: ‘Abing’eyo nia wu dhanu m’atira nikum lembe ma e: Wuwek umegwu acel udong’ kuda keni. I ng’eye, wuting’ piny moko pi nijwigo lak ndru i udi mwu man wucidhi.
34 Man wukel umegwu ma cogo i bang’a, e abing’eyo nia wu julib ungo ento wu dhanu m’atira. I ng’eye abidwogo umegwu i beng’wu, man wubimeduru nitimo kuloka i ng’ombuni.’”
35 Kinde ma gibewodho piny kud i saki migi, nen, usau sente pa ng’atuman ubino i saki pare. Saa ma gin ku weggi gineno usau sente migi, lworo ugam umakugi.
36 Yakobo ma weggi uwacu igi kumae: “Tie an re ma wubekaba kud awiya! Yozefu umbe, Simeon de mbe, meni Benjamin de wubemito wuting’! An re ma lembuni ceke ucokere i wiya!”
37 Ento Ruben uwacu ni won kumae: “Icopo nego wota ario tek adwoge ngo i beng’i. Miye i cinga, man abidwoge i beng’i.”
38 Ento ewacu kumae: “Woda biloro ngo piny kudwu, pilembe umin udaru tho man en kende re m’edong’. Tek ret ma lee uwok unwang’e man etho i yo mwu, e andha wubiloro lwar m’i wiya i Liel* ku can.”
