Tic mi Jukwenda 13:1-52
13 Nwang’u jubila ku juponji de ubino nuti i cokiri mir Antiokia: Ubino Barnaba, Simeon ma jubed julwong’o Niger, Lukio mi Kurene, Manaen ma giponjiri karacelo kud Herode ma jabim, man Saul.
2 Kinde ma gibetimo* ni Yehova man gibekwiro cam, tipo ma leng’ uwacu kumae: “Wukoy ira Barnaba giku Saul ang’et pi tic m’alwong’ogi pire.”
3 E i ng’ei ma gikwiro cam man girwo, giketho cing’gi i wigi man giweko gicidho.
4 Pieno, dhanu maeno ma tipo uoro giloro piny i Selukia, man ku keca gicidho i Kupro ku yo mi pii.
5 Kinde ma gitundo i Salamis, gicaku twong’o lembe pa Mungu i sinagog mi Juyahudi. Yohana ke ubino jakony migi.
6 Saa ma gidaru wotho i cula ceke nitundo i Pafo, giwok girombo ku Jayahudi moko ma nyinge Bar-Yesu m’ubino ajoga man jabila mi ndra.
7 Ebino karacelo ku Sergio Paulo ma jabim man ma ng’atu ma riek. Ng’atu maeni ubino kud ava ma lee mi winjo lembe pa Mungu, uketho elwong’o Barnaba giku Saul i bang’e.
8 Ento Elimas m’ajoga (kum ka juloko nyinge, thelembene ni eno) ucaku jai igi m’ebemito elok jabim cen kud i kum yiyoyic.
9 Tipo ma leng’ ugam uromo Saul ma julwong’o bende Paulo man eneno bang’e tel,
10 e ewacu kumae: “E in i ng’atu m’ipong’ ku kwond ndra ceke man ku kit lembe ma reco zoo, in m’i wod Wonabali man jadhu gin ceke ma pwe, ibiweko nyotho yo m’atira pa Yehova ngo?
11 Nen! Cing’ Yehova n’i wii, man ibibedo abinga, ibineno ngo der pa ceng’ pi saa moko.” E ndhundhu utor ma dit ku mudho upodho i wiye, man ecaku wirere m’ebeyenyo ng’atu moko m’umak cinge kara upeye.
12 I ng’eye, kinde ma jabim uneno lembe m’utimere, edoko jayic, kum iye uwang’ lii i kum ponji pa Yehova.
13 Paulo karacelo ku juwagi gicoko woth kud i Pafo ku yo mi pii man gitundo i Perga i Pamfilia. Re Yohana uwok uwekogi man edok i Yeruzalem.
14 Ento kinde ma giai kud i Perga, gitundo i Antiokia mi Pisidia. Man i ceng’ Sabatu gimondo i sinagog, e gibedo.
15 I ng’ei ma jusomo Cik ku buku mi Jubila i wang’ dhanu ceke, judongo mi sinagog gioro lembe i bang’gi, giwacu kumae: “Umego, tek wutie ku wec moko mi tielocwiny dhanu, wuyer wecne.”
16 Pieno Paulo uai malu man eting’o cinge ekwayu nia gikegibed ling’, ewacu kumae:
“Wu dhanu mir Israel ku jumange de ma wulworo Mungu, wuwinji.
17 Mungu mi dhanu maeni mir Israel ung’iyo kwaruwa, man edodo dhanune kinde ma gibekwo ni umondo i ng’om mi Misiri, man ewodhogi ku kuca ku bote ma tek.
18 Pi oro ma romo pier ang’wen (40) ecirogi i langa.
19 I ng’ei m’enyotho thek abiro i ng’om mi Kanan, emiyo ng’om mi thekne ubed igi ni giralaga.
20 Lembe maeno zoo utimere pi oro ma romo dak ang’wen pier abic (450).
“I ng’ei lembe maeni, emiyo igi jupoklembe nitundo i kum jabila Samwel.
21 Ento i ng’eye gikwayu ubimo, e Mungu umiyo igi Saul ma wod Kic ma tie ng’atu mi suru pa Benjamin, m’ubimo i wigi pi oro pier ang’wen (40).
22 I ng’ei m’ekabe, eng’iyo Daudi ni ubimo igi, m’emiyo lembatuca pire kumae: ‘Anwang’u Daudi ma wod Yese ma tie ng’atu ma kacwinya; ebitimo gin ceke ma iya yenyo.’
23 Calku lembang’ola pare, Mungu uwodho Yesu ni jalar ni Israel kud i kind nyikway* ng’atu maeno.
24 I wang’ tundo pa ng’atu maeni, Yohana ular urweyo kamaleng’ ni dhanu ceke mir Israel nia gilim batizo pi ninyutho nia giloko cwinygi.
25 Re kinde ma Yohana ubedaru tic pare, ewacu kumae: ‘Wubeparu nia atie ng’a? An a en ungo. Ento nen! Ng’atu moko ubebino i ng’eya m’aromo ngo nia agony wara mi tiende.’
26 “Umego, wun ma wu nyikway juruot p’Abraham ku jumange m’i kindwu ma gilworo Mungu, juoro lembe mi both maeni iwa.
27 Kum dhanu mi Yeruzalem ku jubim migi giyiyo ngo ng’atu maeni, ento kinde ma gibepoko lembe i wiye, gipong’o lembe ma Jubila gilar giyero ma jubed jusomo ku dwal ma tek kubang’ sabatu.
28 Kadok ginwang’u ngo thelembe mi nege de, re gikwayu Pilatho uketh junege.
29 Man kinde ma gidaru timo lembe ceke ma jukiewo pire, gilore kud iwi yen man giroye i kabuli.
30 Ento Mungu uketho ecer kud i kind ju m’utho,
31 man pi nindo ma dupa enyuthere ni ju ma giai kugi kud i Galilaya giidho i Yeruzalem. Kawoni ju maeno re ma gitie jumulembe pare ni dhanu.
32 “Pieno wabetwong’o iwu pi lembanyong’a iwi lembang’ola ma jutimo ni kwaruwa.
33 Mungu uketho lembene upong’o kakare iwa, wan awiya pare kinde m’eketho Yesu ucer; tap calu ma jukiewo i zaburi mir ario kumae: ‘Itie woda; tin adoko wuru.’
34 Man pi lembe ma nia eketho ecer kud i kind ju m’utho ma dong’ ebibedo ngo kendo ku kum ma nyothere, elar eyero kumae: ‘Abimaruwu ku mer mandha m’ang’olo ni Daudi, ma tie lembang’ola ma jugeno.’
35 Pieno i zaburi mange de eyero kumae: ‘Ibiyiyo ngo kum ng’atu ma leng’ peri utopi.’
36 Ento Daudi utimo tic ma leng’ ni Mungu* i kind dhanu m’utuk pare, enindo i tho, jukunye karacelo ku kwaru pare, man kume utop.
37 Re ng’atu ma Mungu uketho ucer kume ulund utop ungo.
38 “Umego, dong’ wung’ey nia ni kum ng’atu maeni, jubetwong’o iwu pi weko dubo.
39 Calku Cik pa Musa, nwang’u jucopo nenowu ngo nia dubo mbe i wiwu i gin ceke, ento ni kume dhanu ceke m’uyiyo junenogi nia dubo mbe i wigi.
40 Pieno, wubed ku weng’wu kara lembe ma e ma juyero i buku mi Jubila kud ubin i wiwu:
41 ‘Wunen, wun ma wu jucac, wuzungi man wurwiny de, kum abetimo tic i nindo mwu, en e tic ma wubiyiyo ngo nyanok de, kadok ng’atu moko ukoro pire iwu cuu.’”
42 Kinde ma gibewok woko, dhanu ukwayugi nia giwec iwi lembe maeno kendo i ceng’ Sabatu m’ulubo.
43 Pieno saa ma coko mi sinagog uthum, Juyahudi dupa karacelo ku ju ma gijolo yiyoyic mi Juyahudi man ma gitimo ni Mungu gilubo tok Paulo giku Barnaba; ju maeni giweco kugi man gikwayugi nia gibed asu i bero ma yawe mbe pa Mungu.
44 I Sabatu m’ulubo, kago adhura ceke ucokiri karacelo niwinjo lembe pa Yehova.
45 Kinde ma Juyahudi gineno udul dhanu, kumira ma lee umondo i igi man gicaku jai ku wec ma rac i kum lembe ma Paulo ubeyero.
46 E Paulo giku Barnaba giyero igi ku tegocwinygi kumae: “Ebino lembe ma pire tek nia jular juyer lembe pa Mungu iwu. Ento calu ma wubekwere man wubenyuthuru giwu nia wuromo ngo ku kwo ma rondo ku rondo, nen! Wan wabelokara i bang’ dhanu mi thek mange.
47 Kum Yehova ung’olo iwa ku wec ma e: ‘Aketho ibed ni der ni dhanu mi thek mange, kara ibed ni both nitundo i tung’ ng’om ma bor.’”
48 Kinde ma dhanu mi thek mange giwinjo lembe maeni, anyong’a ucaku negogi lee man giyungo lembe pa Yehova, e dhanu ceke m’adundegi ubedo ayika pi kwo ma rondo ku rondo gidoko juyic.
49 Bende, lembe pa Yehova umedere nimew i ng’ombuca ceke.
50 Ento Juyahudi gicung’o lembe i jumamon ma pigi yik ma gilworo Mungu man i judongo mir adhura, e gicaku nyayu ragedo i kum Paulo giku Barnaba man gibayugi woko kud i kieu migi.
51 Pieno gigam giteng’o utur m’i the tiendgi i kumgi man gicidho i Ikonio.
52 E julub gimediri nipong’ kud anyong’a man tipo ma leng’.
Korolembe mi There
^ Kunoke “gibetimo tic m’i wang’ dhanu ceke.”
^ I dhu Jugiriki: “kodhi.”
^ Kunoke “utimo yeny pa Mungu.”
