Tic mi Jukwenda 25:1-27
25 Pieno, kinde ma Festo utundo i theng ng’om maeno man ecaku camu ker, nindo adek i ng’eye eai kud i Kaisaria man eidho i Yeruzalem.
2 Man judongo mi julam ku judongo mi Juyahudi gidoto Paulo i bang’e. E gicaku kwayu Festo
3 nia eyii kwac migi man eor Paulo i Yeruzalem. Ento gibino pangu nia gibikanu libo ni Paulo i gengi man gibinege.
4 Festo ulund udwoko nia Paulo bibedo i kol i Kaisaria, man nia en gire de ebedok kuca i ng’ei nindo ma nok.
5 Ewacu kumae: “Dong’ ju ma gitie ku dito i kindwu gibin walor wakugi man gidot ng’atu maeno, tek andha etimo lembe moko ma rac.”
6 E kinde m’edaru nindo ma kadhu ngo abora kunoke apar i kindgi, egam eloro edok i Kaisaria. Urwonde ebedo iwi kom mi pokolembe man eng’olo nia jukel Paulo.
7 Saa ma Paulo umondo, Juyahudi m’uloro niai kud i Yeruzalem gicungo i ng’ete man gicaku dote kud adote dupa ma dongo ma giromo miyo ngo kizibitine.
8 Ento Paulo ucero bang’e kumae: “Adubo ngo nyanok de kadok i kum Cik mi Juyahudi, kadi i kum hekalu, kadi i kum Kaisari.”
9 Calu ma Festo umito enyay anyong’a i Juyahudi, epenjo Paulo kumae: “Nyo ibemito iidh i Yeruzalem kara jupok lembe peri i wang’a iwi lembe maeni ku kuca?”
10 Ento Paulo uwacu kumae: “Acungo i wang’ kom mi pokolembe pa Kaisari, kaka m’ukwayu jupok lembe para i iye. Atimo ngo lembe moko ma rac ni Juyahudi calu ma in de ing’eyo ma ber.
11 Tek andha atie jatimrac man atimo lembe moko m’uromo ku tho, abekwero ngo tho; ento tek adote ma dhanu maeni gibedota ko ukungune mbe, ng’atu moko mbe ma tie ku twero mi miya i cing’gi pi ninyayu anyong’a i igi. Akwayu dong’ acidh apid i wang’ Kaisari!”
12 Ing’ei ma Festo uweco ku dilo mi jumii cik, edwoko kumae: “Calu m’ikwayu icidh ipid i wang’ Kaisari, ibicidho i wang’ Kaisari.”
13 Nindo moko i ng’eye, ubimo Agripa giku Bernike gitundo i Kaisaria pi niliewo Festo kara gimothe.
14 Calu ma nwang’u gibetimo nindo dupa kakeca, Festo ugam ukoro lembe pa Paulo ni ubimo, ewacu kumae:
“Ng’atu moko nuti ma Feliksi uweko i kol,
15 man saa m’abino i Yeruzalem, judongo mi julam ku judongo mi Juyahudi gidote i bang’a man gikwayu nia ang’ol lembe i wiye.
16 Ento adwoko igi nia etie ngo kura mi Juroma nimiyo ng’atu moko ma judoto i cing’ dhanu pi ninyayu anyong’a i igi, i wang’ ma fodi ng’atune urombo ngo ku ju m’udote wang’ ku wang’, man enwang’u ngo kaka mi weco pi nicero bang’e iwi lembe ma jubedote pire.
17 Pieno saa ma gitundo keni, agalu ngo, ento urwonde abedo iwi kom mi pokolembe man ang’olo nia jukel ng’atune.
18 Kinde ma weg adotene gicungo, gidote ngo ku lembe moko acel de ma rac m’abino kuro nia gibidote pire.
19 Giteliri kude kende kende iwi yic mi dini migi* man iwi ng’atu moko ma nyinge Yesu m’ugam utho, ento ma Paulo ubeyero nia utie kwo.
20 Calu m’ang’eyo ngo kite m’aromo daru ko teliri maeno, apenje ka nyo ecopo maru eidh i Yeruzalem kara jupok lembe pare iwi lembe maeno kuca.
21 Ento saa ma Paulo ukwayu nia jugwoke i kol m’ebekuro ko pokolembe pa Ogusto,* ang’olo nia jugwoke nitundo m’abiore i bang’ Kaisari.”
22 E Agripa uwacu ni Festo kumae: “Abimaru awinj ng’atu maeno an gira.” Festo uyero ire kumae: “Urwo ibiwinje.”
23 Pieno, urwonde, Agripa giku Bernike gitundo kud ayunga ma dit man gimondo i otpido karacelo ku judongo mir ungu mi juaskari man bende dhanu ma pigi yik mir adhura; e kinde ma Festo ung’olo nia jukel Paulo, jugam jukele.
24 E Festo uwacu kumae: “Ubimo Agripa man wun ceke ma watie wakudwu kakeni, wubeneno ng’atu maeni ma Juyahudi ceke gikwaya pire i Yeruzalem man kakeni bende, ma gibekok nia ukwayu ngo emedere nikwo.
25 Ento anwang’u nia ng’atu maeni utimo ngo lembe acel de m’uromo ku tho. Pieno kinde m’ekwayu en gire nia ecidh epid i wang’ Ogusto, e ang’iyo nia ukwayu aore.
26 Re gin moko mandha mbe m’aromo kiewo i wiye ni Rwoth para. Pieno akele i weng’wu wun ceke man asagane i weng’i in, ubimo Agripa; kara i ng’ei ma jubipenje ku penji, acopo nwang’u gin moko m’akiew.
27 Kum an aparu nia etie lembe m’umaku piny ungo ira nia aor ng’atu ma jutwiyo m’umbe ninyutho lembe ma judote i wiye.”
