Tic mi Jukwenda 26:1-32
26 Agripa uwacu ni Paulo kumae: “Icopo weco piri giri.” E Paulo urieyo cinge man ecaku weco pi nicero bang’e, eyero kumae:
2 “Pi lembe ceke ma Juyahudi gidota pire, ubimo Agripa, atie kud anyong’a pilembe abeweco i weng’i tin eni pi nicero bang’a,
3 akecane pilembe ing’eyo ma ber kura ceke mi Juyahudi man lembe ma benyayu teliri i kindgi. Dong’ abekweyi nia ikewinja ku cirocir.
4 “Andha kite m’abed akwo ko niai ma fodi an aradu i kind dhanu ma thuwa* man i Yeruzalem, Juyahudi ceke ging’eyo ma ber.
5 Pieno, ging’eya niai con; tek gimaru gicopo koro iri nia abino i ungu mi dini mi Jufarisayo, man calu ma wung’eyo, ungu maeno gimoko kikiki i kum kite ma jucikiri niworo ko Cik, nisagu Juyahudi mange.
6 Ento kawoni acungo i wang’ pokolembe ni kum genogen mi lembang’ola ma Mungu ung’olo ni kwaruwa;
7 eni tie lembang’ola ma rom ma suru mwa apar ario (12) de gigeno nia gibineno nindo m’ebipong’o i iye, ma gibetimo ko tic ma leng’ m’umbe niweko, dieceng’ ku diewor. E ubimo, pi genogen maeni re ma Juyahudi gibedota.
8 “Pirang’o jumoko m’i kindwu gibenwang’u nia etie lembe ma yiyere ngo nia Mungu ucer dhanu m’utho?
9 An agam ayiyo andhandha nia ukwayu atim lembe dupa pi nijai i kum nying’ Yesu ma Janazarethi.
10 E atimo tap kumeno i Yeruzalem, atwiyo jumaleng’ dupa i kol, kum anwang’u dito i bang’ judongo mi julam; man kan ukwayu nia juneggi, abed acwaku lembene.
11 Abed amiyo igi matira wang’ ma pol i sinagog ceke pi nidiyogi kara gikwer yiyoyic migi; man calu m’abino ku kwinyo lee i kumgi, acidho kadok i adhura ma bor kara anyay ragedo i kumgi.
12 “Kinde m’abecidho i Dameski pi nitimo lembe maeni ku ng’ol man telowic m’uai i bang’ judongo mi julam,
13 E ubimo, i dieceng’ ma ling’ kinde ma an’i gengi, aneno der m’urieny m’usagu kadok rieny pa ceng’, uai kud i polo man ucarere i wiya karacelo ku ju ma wabino wotho wakugi.
14 E kinde ma wan ceke wapodho i ng’om, awinjo dwal moko m’ubeyero ira ku dhu Juebrania kumae: ‘Saul, Saul, pirang’o ibenyayu ragedo i kuma? Ibemediri nitwangu lak kenge* m’ibenyayu ko ret i kumi giri.’
15 Ento ayero kumae: ‘In i ng’a, Rwoth?’ E Rwoth udwoko ira kumae: ‘An a Yesu m’ibenyayu ragedo i kume.
16 Dong’ ai malu man icung iwi tiendi. Anyuthara iri pi lembe maeni, kara ang’iyi nibedo jatic man jamulembe mi gin m’ineno man mi gin m’abiketho ibineno pira.
17 Abibodhi kud i cing’ dhanu maeni, man kud i cing’ dhanu mi thek mange m’abeori i bang’gi
18 pi niyabu wang’gi, pi nilokogi kud i mudho gidwog i der, man kud i tego pa Sitani gidwog i bang’ Mungu, kara dubo migi uwekere man ginwang’ giralaga i kind ju ma judwoko leng’ ni kum yiyoyic migi ma giyiya ko.’
19 “Pieno ubimo Agripa, aworo ginmawokiwang’ m’uai i polo,
20 man atero rwonglembe ku kwong’a ni dhanu mi Dameski, i ng’eye ke ni dhanu mi Yeruzalem, man m’i ng’om mi Yudea ceke, man bende ni dhanu mi thek mange nia ukwayu gilok cwinygi, man gidwog i bang’ Mungu ma nwang’u gibetimo tic m’ubenyutho nia giloko cwinygi.
21 Pi lembe maeno re ma Juyahudi gimaka i hekalu man gimito ginega.
22 Ento calu m’anwang’u kony m’uai i bang’ Mungu, abemedara nimiyo lembatuca ni ju ma thindho ku ju ma dongo bende nitundo tin eni; abeyero lembe mange ngo, ndhu gin ma jubila man bende Musa gikiewo nia bitimere. Gikiewo nia
23 Kristu bisendere, man calu m’ebibedo ng’atu ma kwong’a ma bicer kud i kind ju m’utho, ebitwong’o pi der ni dhanu maeni man ni dhanu mi thek mange.”
24 Kinde ma Paulo ubeyero lembe maeno pi nicero bang’e, Festo uyero ku dwande ma tek kumae: “Paulo, abelu dhingo meki! Ng’eyong’ec ma hai ubedwoki ni abelu!”
25 Ento Paulo uwacu kumae: “Jadwong’ Festo, abelu ubemaka ngo, ento abeyero lemandha man ma kakare.
26 Kum andha ubimo m’abeweco i bang’e ku tegocwinya ung’eyo lembe maeni ma ber; ang’eyo andhandha nia gin acel de mbe i kind lembe maeni m’eng’eyo ngo, kum lembene acel de mbe m’utimere i aponda.
27 Ubimo Agripa, nyo iyiyo Jubila de? Ang’eyo nia iyiyo.”
28 E Agripa uyero ni Paulo kumae: “Edong’ nyanok, idhingo loka adok Jakristu.”
29 Paulo ugam uyero kumae: “Kadok pi saa ma nyanok kunoke pi saa ma lee, abekwayu Mungu nia kud ubed in kendi, ento bende dhanu ceke ma gibewinja tin eni gidok ve an; re ku twic mi kol ma calu maeni ngo.”
30 E ubimo giku jabim man Bernike ku jumange ma gibedo karacelo kugi de giai malu.
31 Ento saa ma gibecidho, gicaku weco i kindgi kumae: “Ng’atu maeni utimo ngo gin acel de m’uromo ku tho, kadi ku twic mi kol.”
32 Agripa ugam uyero ni Festo kumae: “Nwang’u jucopo gonyo ng’atu maeni ka nwang’u ekwayu ngo nia ecidh epid i wang’ Kaisari.”
