Wel 18:1-32
18 Yehova ugam uwacu ni Arun kumae: “In, woti, man thepacu pewu, wubicungo i dhu kosa moko ci m’utimere i kum kabedo ma leng’, man in ku woti, wubicungo i dhu kosa moko ci m’utimere i kum tic mwu mi lamulam.
2 Kel bende umego peri mi suru pa Lawi, niwacu suru pa kwarumiri ceng’ini, kara gidikiri kudi man gitim iri man ni woti i wang’ hema mi Lembatuca.
3 Gicikiri nitimo tic migi iri man pi hema zoo, ento kud gicor ceng’ini i kum ajeni mi kabedo ma leng’ man pemlam, kara kud githo, kadi wun bende.
4 Gibidikiri kudi man gibitimo tic migi m’ugwaku kum hema mi rombo ku tic ceke mi hema, man ng’atu m’umbe ku rusa* copo coro ngo ceng’ini kudwu.
5 Wucikuru nitimo tic ma juketho i korwu pi kabedo ma leng’ man pemlam, kara ng’eicwiny mange kud uwok i kum dhanu mir Israel.
6 An gira ating’o umego mwu ma gi Julawi kud i kind Juisrael ni giramiya iwu. Jumiyogi ni Yehova kara gitim tic mi hema mi rombo.
7 Tic mwu mi lamulam m’ugwaku kum pemlam man piny ma n’i ng’ey ridho n’i kori man woti. Man wucikuru nitimo tije. Amiyo tic mi lamulam ni giramiya iwu, man ka ng’atu moko ci m’umbe ku rusa* ucoro ceng’ini, jucikiri ninege cen.”
8 Yehova uwacu bende ni Arun kumae: “An gira aketho inen wi ajok ma jujoko ira. Amiyo kum piny ceke ma leng’ ma Juisrael gijoko ubed iri man ni woti ni makapiny ma nja.
9 Piny ma e m’uai kud i girathiera ma leng’ m’usagu ma juwang’u ku mac bibedo peri: girathiera ceke ma gimiyo, m’uketho i iye girathiera migi mi nying cam, lam migi mi dubo, man girathiera migi mi kier ma gikelo ira. Etie piny ma leng’ m’usagu iri man ni woti.
10 Icikiri nicame i kabedo ma leng’ m’usagu; jumaco ceke copo came. Ebibedo piny ma leng’ iri.
11 Ma e bende bibedo iri: giramiya ma gijoko man girathiera m’aleka ceke mi Juisrael. Amiyogi iri, ni woti, man ni nyigi ni makapiny ma nja. Ng’atu moko ci ma leng’ m’i ot peri copo came.
12 “Mo ceke ma beco, pigulok ceke ma beco ma nyen, man nying cam, niwacu landu wi mwoka migi ma gikelo ni Yehova, amiyogi iri.
13 Landu wi mwoka mi nying cam moko ci m’uai i ng’om migi ma gikelo ni Yehova, bibedo peri. Ng’atu moko ci ma leng’ m’i ot peri copo came.
14 “Piny moko ci ma judaru thiero* i Israel bibedo peri.
15 “Kayu mi piny ceke ma kwo* ma gibikelo ni Yehova, dok ebed dhanu kadi lei bidoko peri. Ento icikiri niwaru kayu mi dhanu kokoro mandha, man kayu mi lei m’ucido de icikiri niwaru.
16 Icikiri niware i bei mi jamgony ka dwi pare ucaku niai i acel niidho malu, calku valer ma jung’olo mi cekel* abic mi mola ma tar, nimakere ku cekel mi kabedo ma leng’.* Etie gera* pier ario.
17 Kayu mi thwon dhiang’ kadi kayu mi nyog urombo kunoke kayu mi diel kende re ma kud iwar. Gitie piny ma leng’. Icikiri nikiro rimbgi iwi pemlam, man iwang’ miyo migi uduny ni girathiera ma juwang’u ku mac ni piny ma ng’wice ng’ar* ni Yehova.
18 Ring’gi bibedo peri. Calu dhu kor mi girathiera m’aleka man calu bamb ma yor acwic, ebibedo peri.
19 Amiyo ajok ma leng’ ceke ma Juisrael gijoko ni Yehova iri, ni woti, man ni nyigi ni makapiny ma nja. Etie lembariba ma nja mi kadu* i wang’ Yehova piri man pi nyikweyi.”
20 Yehova umedere niyero ni Arun kumae: “Ibibedo mbe ku giralaga i ng’om migi, man ibibedo mbe ku theng ng’om i kindgi. An re m’atie makapiny peri man giralaga peri i kind Juisrael.
21 “Nen, amiyo apaje ceke mir Israel ni wot Lawi, ni giralaga kawang’ tic ma gibetimo, niwacu tic mi hema mi rombo.
22 Dhanu mir Israel romo coro ngo dong’ kendo i kum hema mi rombo, gimaru dubo man gimaru tho.
23 Julawi gibitimo gin gigi tic mi hema mi rombo, man gin re ma gibicungo i dhu kier migi. Etie cik ma nja i kind dhanu m’utuk mwu ceke nia gibinwang’u ngo giralaga i kind Juisrael.
24 Kum amiyo apaje ma dhanu mir Israel gijoko ubed ni giralaga ni Julawi, apaje ma gibijoko ni Yehova. Eno re m’uketho ayero igi kumae: ‘Gibinwang’u ngo giralaga i kind Juisrael.’”
25 I ng’eye Yehova yero ni Musa kumae:
26 “Yer ni Julawi kumae: ‘Wubinwang’u niai kud i bang’ Juisrael, apaje m’amiyo iwu niai kud i bang’gi ni giralaga mwu. Man wucikuru nimiyo kud i kum apajene, apaje ni ajok ni Yehova.
27 E jubikwane ni ajok mwu calu nying cam m’uai kud i lela mi fwodo cam, kunoke piny ma bik m’uai i vur mi biyo pigulok, kadi i vur mi biyo mo.
28 I ayi maeno, wubimiyo bende ajok ni Yehova kud i kum apaje ceke ma wunwang’u niai kud i bang’ Juisrael. Man kud i kumgi eno re ma wubimiyo ajok pa Yehova i bang’ Arun ma jalam.
29 Wubimiyo kwond ajok ceke ni Yehova niai kud i giramiya mwu ma beco ceke ma jumiyo iwu ni piny ma leng’.’
30 “Man icikiri niyero igi kumae: ‘Tekene wujoko piny ma beco beconegi, Julawi gibinene ni piny ma beco m’uai i lela mi fwodo cam, man ni piny m’uai i vur mi biyo pigulok, kunoke i vur mi biyo mo.
31 Wun ku juruot mwu wuromo came kaka moko ci, pilembe etie cul mwu pi tic ma wubetimo i hema mi rombo.
32 Wubiyeyo ngo dubo i lembuni tek wubemeduru nimiyo ajok mi piny ma beco m’uai kud i bang’gi, man kud wucid piny ma leng’ mi Juisrael, wumaru tho.’”
Korolembe mi There
^ I dhu Juebrania: “jawirok,” niwacu ng’atu ma tie ngo i kind juruot p’Arun.
^ I dhu Juebrania: “jawirok,” niwacu ng’atu ma tie ngo i kind juruot p’Arun.
^ Niwacu piny moko ci ma judwoko leng’ ni Mungu, nikum thier ma juthiere ko ni Mungu i ayi ma copo warere ngo.
^ I dhu Juebrania: “kum ceke.”
^ Cekel acel ubino grama 11,4. Nen Thenge ma jumedo B14.
^ Kunoke “cekel ma leng’.”
^ Gera acel ubino grama 0,57. Nen Thenge ma jumedo B14.
^ I dhu Juebrania: “ma ng’wice yomo cwiny.”
^ Niwacu lembariba ma nja man ma lokere ngo.
