Wel 23:1-30
23 E Balam uyero ni Balak kumae: “Gier pemlam abiro keni, man iyik ira thwoni dhieng’ abiro man nyogi rombe abiro.”
2 Ndhu ndhu nica, Balak utimo tap calu ma Balam uyero. Man Balak giku Balam githiero thwon dhiang’ ku nyog urombo acel acel iwi pemlamman.
3 I ng’eye, Balam uyero ni Balak kumae: “Dong’ keni i vut lam peri m’awang’a, man an abicidho. Saa moko nyo Yehova biweco kuda. Abidonyutho iri gin moko ci m’eyero ira.” Pieno eidho iwi ungulu got moko m’uthwo.
4 I ng’eye Mungu ucaku weco ku Balam, m’uwacu ire kumae: “Aguro pemlam abiro i leni, man athiero thwon dhiang’ ku nyog urombo acel acel iwi pemlamneman.”
5 Yehova uketho wec i dhu Balam man ewacu kumae: “Dok i bang’ Balak, man iyer ire lembuni.”
6 E edok man eneno Balak ku judongo ma wijo ceke mi Moab gicungo i vut lam m’awang’a pare.
7 E eyero lembabola ma e:
“Balak m’ubimo mi Moab ugama niai kud i Aram,niai kud i gudi ma yo nyangu, ewacu kumae:
‘Bin ilam ira Yakobo.
Eyo, bin inywar Israel.’
8 Aromo lamu nenedi ju ma Mungu ulamu ngo?
Man aromo nywaru nenedi ju ma Yehova unywaru ngo?
9 Anenogi niai kud i die wi cana,man anenogi niai kud i die wi ungulu gudi.*
Gitie dhanu ma gibedo keca kendgi;gikwaniri ngo i kind thek mange.
10 Ng’a ma copo kwanu nying’ ng’ili utur pa Yakobokunoke nikwanu thenge acel wi ang’wende mir Israeli?
Wek atho* tho mi dhanu m’atira,man ajiki para ubed calu migi.”
11 Balak ugam uwacu ni Balam kumae: “Itimo ang’o ira eni? Akeli kara ilam jukwor para, man gin m’itimo atima kae de mbe, ilund imiyo igi mugisa re.”
12 Edwoko kumae: “Nyo acikara ngo niyero lembe moko ci ma Yehova uketho i dhoga?”
13 Balak uyero ire kumae: “Akweyi, bin wacidh ku kaka mange, kaka m’iromo wonenogi i iye. Ibineno jumoko kende m’i kindgi, ibinenogi zoo ngo. Wok ilamgi ira ku keca.”
14 Pieno etere i podho pa Zofim i die wi Pisga, egiero pemlam abiro man ethiero thwon dhiang’ ku nyog urombo acel acel iwi pemlamneman.
15 E Balam uyero ni Balak kumae: “Dong’ keni i vut lam m’awang’a peri kinde m’abeweco kude ku kuca.”
16 Yehova ucaku weco ku Balam man eketho wec i dhoge, e eyero kumae: “Dok i bang’ Balak, man iyer ire lembuni.”
17 E edok i bang’e man ewok enwang’u ebekure i vut lam pare m’awang’a, man judongo ma wijo mi Moab ubino karacelo kude. Balak ugam upenje kumae: “Yehova uwacu ang’o?”
18 E eyero lembabola ma e:
“Ai malu Balak, man winji.
Winja, E wod Zipor.
19 Mungu en e dhanu ma swa e ngo ma cwayu ndra,kadi wod dhanu de ngo ma loko paru pare.*
Kan eyero lembe moko, nyo ebitime ngo?
Tek eweco, nyo ebipong’o ngo lembene?
20 Nen! jukela pi nimiyo mugisa;dong’ edaru miyo mugisa, man an acopo loko ngo mugisane.
21 Eweko ngo lembajoga moko ci i kum Yakobo,man eyiyo ngo masendi moko ci i kum Israel.
Yehova Mungu pare ni kugiman jupake ku dwal ma tek i kindgi calu ubimo.
22 Mungu ubewodhogi kud i Misiri.
Etie igi calu tung jobi.
23 Kum kuroga maku ngo Yakobo,kadi lamu bila moko ci kum Israel.
Kawoni jucopo yero pi Yakobo man Israel kumae:
‘Kenen gin ma Mungu utimo.’
24 Eni tie dhanu ma biai malu calu umvor,man calu umvor, ebiting’ere gire malu.
Ebivuto ngo piny ka fodi ecamu ngo lei m’emakuman ka fodi emadhu ngo rimb ju ma junego.”
25 E Balak uwacu ni Balam kumae: “Tek icopo lamugi ngo nyanok de, mugisa de dong’ kud imii igi do.”
26 Balam udwoko ni Balak kumae: “Nyo ayero ngo iri nia, ‘abitimo lembe ceke ma Yehova uyero’?”
27 E Balak uwacu ni Balam kumae: “Akweyi, bin, man wek ateri kendo kaka mange. Saa moko nyo ebibedo ber i wang’ Mungu mandha nia ilamgi ira ku keca.”
28 Pieno Balak utero Balam i die wi Peor m’ubeneno yor i bang’ Yecimon.*
29 I ng’eye, Balam uyero ni Balak kumae: “Gier pemlam abiro keni, man iyik ira thwoni dhieng’ abiro man nyogi rombe abiro.
30 E Balak utimo tap calu ma Balam uyero, man ethiero thwon dhiang’ ku nyog urombo acel acel iwi pemlamneman.
Korolembe mi There
^ Kunoke “nyithi gudi.”
^ Kunoke “ng’eyong’ec para utho.”
^ Kunoke “m’ang’eyang’o mondo i iye.”
^ Kunoke nyo “hanga; langa.”
