Wel 28:1-31

NG'II DHOK M'IMARU

Telowic pi girathiera ma tung’ tung’ (1-31)
- Girathiera ma kubang’ ceng’ (1-8)
- Pi ceng’ Sabatu (9, 10)
- Girathiera ma kubang’ dwi (11-15)
- Pi Kadhukuwijo (16-25)
- Pi Foc ma kubang’ yenga (26-31)

28 I ng’eye, Yehova uyero ni Musa kumae: ² “Ng’ol ni Juisrael man iwac igi kumae: ‘Wucikuru nikelo ira girathiera para, mukathi para. Girathiera para ma juwang’u ku mac ma ng’wice ng’ar* ira jucikiri nithiero i saane.’ ³ “Man yer igi kumae: ‘Maeni tie girathiera ma juwang’u ku mac ma wubikelo ni Yehova kubang’ ceng’: nyithi nyogi rombe ario ma mulima mbe i kumgi ma oro migi acel acel ni lam m’awang’a ma thiri thiri. ⁴ Wubithiero nyathi nyog urombo acel kugweno, man ma kucelo ke wubithiero saa ma piny ubegamere,* ⁵ karacelo kud apaje mir efa* mi mogo ma yom ma jujebo ku mo m’aoda nusu pa nusu mi hin* ni girathiera mi nying cam. ⁶ Etie lam m’awang’a ma thiri thiri ma jucaku there i kum Got Sinai ni piny ma ng’wice ng’ar,* girathiera ma juwang’u ku mac ni Yehova, ⁷ ku girathiera pare mi pigulok, nusu pa nusu mi hin pi nyathi nyog uromboman. Konj giramadha ma lake tek i kabedo ma leng’ ni girathiera mi pigulok ni Yehova. ⁸ Man ibithiero nyathi nyog urombo ma kucelo saa ma piny ubegamere.* Ibikele ni girathiera ma juwang’u ku mac, ni piny ma ng’wice ng’ar* ni Yehova, karacelo ku girathiera mi nying cam ma rom ma juthiero kugweno man ku girathiera mi pigulokne de ma rom. ⁹ “‘Ento i ceng’ Sabatu, jucikiri nithiero nyithi nyogi rombe ario ma oro migi acel acel, man mogo ma yom thenge ario wi apar mir efa ma jujebo ku mo ni girathiera mi nying cam karacelo ku girathierane mi pigulok. ¹⁰ Eno tie lam m’awang’a pi Sabatu karacelo ku lam m’awang’a ma thiri thiri man girathierane mi pigulok. ¹¹ “‘I caku pa dwiman,* wubithiero nyithi thwoni dhieng’ ario, nyog urombo acel, man nyithi nyogi rombe abiro ma oro migi acel acel ma mulima mbe i kumgi ni lam m’awang’a ni Yehova, ¹² man mukero adek wi apar mi mogo ma yom ma jujebo ku mo ni girathiera mi nying cam pi thwon dhiang’man, man mukero ario wi apar mi mogo ma yom ma jujebo ku mo ni girathiera mi nying cam pi nyog urombo, ¹³ man apaje mi mukero mi mogo ma yom ma jujebo ku mo ni girathiera mi nying cam pi nyog uromboman ni lam m’awang’a ma ng’wice ng’ar,* girathiera ma juwang’u ku mac ni Yehova. ¹⁴ Man girathiera migi mi pigulok ucikere nibedo pigulok nusu pa hin pi thwon dhiang’, man thenge acel wi adek mi hin pi nyog urombo, man thenge acel wi ang’wen mi hin pi nyathi nyog urombo. Eno tie lam m’awang’a ma kubang’ dwi, i dwi acel acel i kind oro. ¹⁵ Bende, jucikiri nithiero nyathi nyog diel acel ni lam mi dubo ni Yehova pi nimedo kum lam m’awang’a ma thiri thiri karacelo ku girathierane mi pigulok. ¹⁶ “‘I dwi ma kwong’a, i nindo apar ang’wen mi dwije, bibedo Kadhukuwijo pa Yehova. ¹⁷ Man i nindo apar abic mi dwije, foc bibedo tie. Jubicamu mukathi ma thobi mbe i iye pi nindo abiro. ¹⁸ Coko ma leng’ bibedo tie i nindo ma kwong’a. Kud wutim tic moko ci ma tek. ¹⁹ Man wubikelo nyithi thwoni dhieng’ ario, nyog urombo acel, man nyithi nyogi rombe abiro ma oro migi acel acel ni lam m’awang’a ma juwang’u ku mac ni Yehova. Wucikuru nithiero leya ma mulima mbe i kumgi. ²⁰ Wucikuru nithierogi karacelo ku girathiera migi mi nying cam, mi mogo ma yom ma jujebo ku mo: mukero adek wi apar pi thwon dhiang’ man mukero ario wi apar pi nyog urombo. ²¹ Wubithiero mukero acel wi apar pi nyathi nyog urombo acel acel m’i kind nyithi nyogi rombe abirone, ²² man bende diel acel ni lam mi dubo pi nitimo adunya piwu. ²³ M’uweko lam m’awang’a mi kugweno, ma pi lam m’awang’a ma thiri thiri, wubithiero bende piny maeno. ²⁴ Wubithiero piny maeno i ayi ma rom kubang’ ceng’ pi nindo abiro ni cam,* girathiera ma juwang’u ku mac, ni piny ma ng’wice ng’ar* ni Yehova. Jucikiri nithiere karacelo ku lam m’awang’a ma thiri thiri man girathierane mi pigulok. ²⁵ I nindo mir abirone, wucikuru nitimo coko ma leng’. Kud wutim tic moko ci ma tek. ²⁶ “I nindo mi landu wi mwoka, kinde ma wubekelo girathiera mwu mi nying cam ma nyen ni Yehova, wucikuru nitimo coko ma leng’ i foc mwu mi yenga. Kud wutim tic moko ci ma tek. ²⁷ Wubikelo nyithi thwoni dhieng’ ario, nyog urombo acel, nyithi nyog urombo abiro ma oro migi acel acel ni lam m’awang’a, ni piny ma ng’wice ng’ar* ni Yehova, ²⁸ man pi girathiera migi mi nying cam mi mogo ma yom ma jujebo ku mo, mukero adek wi apar pi thwon dhiang’man, mukero ario wi apar pi nyog urombo, ²⁹ mukero acel wi apar pi nyathi nyog urombo acel acel m’i kind nyithi nyogi rombe abirone; ³⁰ man bende nyathi diel acel pi nitimo adunya piwu. ³¹ Wubithierogi pi nimedo lam m’awang’a ma thiri thiri man girathieranegi mi nying cam. Gicikiri nibedo leya ma mulima mbe i kumgi, karacelo ku girathiera migi mi pigulok.