Wer pa Suleman 5:1-16
5 “Amondo i podho para,E nyamira, nyamugole* para.
Acoko mira* para man ajaku ith lum para ma ng’wice ng’ar.
Acamu pedo kic para man anang’u miyokic para;amadhu pigulok para man cak para.”
“Wucam, jurimo!
Wumadhi man wuwek mer umerwu!”
2 “Anindo, ento adundena ubekiyo.
Awinjo dwand jamerna m’ubedwong’o dhugola!”
‘Yab ira, E nyamira, nyaramara para,akuru para, nyagin para ma mulima mbe i kume!
Kum thoi utobo wiya,man mwomo mi diewor utobo yukwiya.’
3 Adaru wodho robe para,ndhu adok akende kendo?
Adaru lwoko tienda,adok anyothe kendo?
4 Jamerna uwodho cinge kud i wang’ dhugola,e avane umaka.
5 Aai malu pi niyabu dhugola ni ng’atu m’amaru,ma cinga ubecwir lot lot ku mira,*nyig cinga ku mira m’ubetoni kum cing dhugola.
6 Ayabu dhugola ni jamerna,ento jamerna ulokere cen man ecidho.
E kero thum kud i kuma* saa m’ecidho.*
Asaye kpe, ento anwang’e ngo.
Alwong’e, ento egamu dhoga ngo.
7 Jukur ma gibedhoko adhura ginwang’a.
Gigoya, man ginyayu ret i kuma.
Jukur gang’kidi gimayu bongu para mi umo wang’.
8 Abekwayuwu, E nyi Yeruzalem, nia wukwong’ ira:
ka wunwang’u jamerna,wuyer ire nia abetwoyo twoyo mi mer.”
9 “Jamernine eloyo jumer mi jumange kud ang’o,e in m’i leng’ lee nisagu mon mange ceke?
Jamernine eloyo jumer mi jumange kud ang’o,m’iketho wakwong’ ko kit kwong’ ma kumeni ngi e?”
10 “Jamerna uberiang’ini ariang’a man e landu;jung’iye kud i kind dhanu elufu apar (10 000).
11 Wiye tie mola ma kwar, mola ma kwar m’alili.
Yuk wiye tie calu ith ngasi* ma yamu ubeleko,gi col calu ungoro.
12 Wang’e calu akuru i dhu kulo m’umol,ma gibejom i cak,ma gibedo i dhu kut m’upong’ ku pii i iye.*
13 Limbe calu ungu mi lum ma ng’wice ng’ar ma jupidho,ungulu got* m’upong’ ku lum ma ng’wice ng’ar i wiye.
Dend dhoge tie thiwe m’ubemolo udok mira* ma liw.
14 Nyig cinge tie mola ma kwar, lwet cinge ke tie calu krizolith.*
Iye tie lak liec ma jurudo kume ma fwoth, man ma juruko ku safir.*
15 Tiende tie mbegi mi kidi ma tar ma jugiero iwi kathere mi mola ma kwar m’alili.
E leng’ calu Lebanon, man e calu tido ma ng’atu ma cungo i wang’e mbe.
16 Dhoge tie mido ku kume,man lembe ceke m’uneno en telo nen.
Ng’atu m’amaru tie kumeni, jamerna e kumeni, E nyi Yeruzalem.”
Korolembe mi There
^ Kunoke “arusi.”
^ Nen Thelembe mi wec.
^ Nen Thelembe mi wec.
^ Kunoke “ng’eyong’ec para ugam uringo.”
^ Kunoke nyo “ng’eyong’ec para ugam uweka kinde m’eweco.”
^ Kunoke nyo “wic ngasi.”
^ Kunoke nyo “i dhu kulo m’udenyini.”
^ Kunoke “nyithi gudi.”
^ Nen Thelembe mi wec.
^ Nen Thelembe mi wec iwi “Kidi ma pigi tek.”
^ Nen Thelembe mi wec iwi “Kidi ma pigi tek.”
