Yob 1:1-22
1 Nwang’u ng’atu moko ubino nuti i ng’om mi Uz ma nyinge Yob.* Ebino ng’atu m’atira man ma cuu;* ebed elworo Mungu man ebed euro lembe ma reco.
2 Enyolo awiya ma co abiro man ma nyir adek.
3 Udul lim pare ubino rombe elufu abiro (7 000), ngamia* elufu adek (3 000), dhieng’ elufu acel (1 000)* man kana dak abic. Ebino bende ku jutic lee mandha uketho edoko ng’atu ma dit nisagu dhanu ceke ma yo Nyangu.
4 Wodeman ubed uyiko foc i ot pare gire, ng’atuman i nindo ma pare.* Gibed gilwong’o nyimeggi adek pi nicamu man nimadhu karacelo kugi.
5 I ng’ey ma ka gin ceke gidaru nitimo foc, Yob lwong’ogi pi nidwokogi leng’. Ebed eai pir kugweno man ethiero lam m’awang’a pi ng’atuman m’i kindgi, kum Yob ubed uwacu kumae: “Saa moko nyo wota gidubo man gilamu Mungu i adundegi.” Yob ubed utimo kumeno saa ceke.
6 E nindo ma wot Mungu mandha* gimondo i iye pi nicungo i wang’ Yehova ugam uromo, man Sitani de umondo i kindgi.
7 E Yehova upenjo Sitani kumae: “Iai kani?” Sitani udwoko ni Yehova kumae: “Aai awotho kun ku kun i ng’om man nilenjo i iye.”
8 Man Yehova wacu ni Sitani kumae: “Nyo ineno* Yob ma jatic para? Ng’atu moko mbe ma calu en iwi ng’om. En e ng’atu m’atira man ma cuu,* ma lworo Mungu man ma uro lembe ma reco.”
9 Sitani udwoko ni Yehova kumae: “Nyo Yob ubelworo Mungu mananu?
10 Igoyo gang’ i kume, i kum ot pare, man i kum piny ceke m’etie ko ngo? Imiyo mugisa iwi tic m’i cinge man lim pare unyay iwi ng’om.
11 Ento kara lembe ulokere, riey cingi man igoy piny ceke m’ebedo ko, e m’umbe jiji ebiceyi i weng’i.”
12 Yehova ugam uyero ni Sitani kumae: “Nen! gin moko ci m’ebedo ko n’i cingi.* Ento kud imul kume.” E Sitani uwok kud i wang’ Yehova.
13 Nindo moko kinde ma wote kud anyira pare gibecamu man gibemadhu pigulok i ot p’umeggi ma kayu,
14 jakwenda moko utundo i bang’ Yob man eyero ire kumae: “Dhieng’ ubino furo fur man kana ubino camu i ng’etgi,
15 e Jusabea gicoro man giyakugi; ginego bende jutic peri ku palamularu. An kenda re m’aboth pi niyero iri.”
16 Kinde ma fodi ebeweco, ng’atu mange tundo man eyero kumae: “Mac upodho kud i polo i bang’ Mungu man uopo iwi rombe ku jutic, e ewang’ugi. An kenda re m’aboth pi niyero iri.”
17 Kinde ma fodi ebeweco, ng’atu mange tundo man eyero kumae: “Jukaldayo gipokiri ni ungu adek, e gicoriri iwi ngamia man giyakugi; ginego bende jutic peri ku palamularu. An kenda re m’aboth pi niyero iri.”
18 Kinde ma fodi ebeweco, ng’atu mange utundo man uwacu kumae: “Woti kud anyira peri gibino camu man gibemadhu pigulok i ot p’umeggi ma kayu.
19 E rek kumeni, yamu ma dit uai i langa man ugoyo gund ode ang’wen ceke, e epodho iwi aradune man githo. An kenda re m’aboth pi niyero iri.”
20 Yob ugam uai malu, eyeco bongu pare man egwaru yuk wiye. I ng’eye erum piny man epodho arieba wang’e i ng’om.
21 Man eyero kumae:
“Awok kud i maa muneru,man abidok de muneru.
Yehova umiyo man Yehova ugamu.
Wek nying’ Yehova umedere ninwang’u pak.”
22 I lembe maeni ceke Yob udubo ngo, kadi edoto de ngo Mungu nia utimo gin moko ma rac.*
Korolembe mi There
^ Copere nia thelembene tie “Gin mir adegi.”
^ Kunoke “ng’atu ma lembe mbe i wiye man m’atira.”
^ I dhu Juebrania: “megi ngamia.”
^ I dhu Juebrania: “dhieng’ ma jutwiyo ario ario 500.”
^ Kunoke “ng’atuman i ng’ey wadi.”
^ Eno tie wec mi lembabola mi dhu Juebrania ma nyutho wot Mungu ma gi jumalaika.
^ I dhu Juebrania: “iketho adundeni iwi.”
^ Kunoke “ng’atu ma lembe mbe i wiye man m’atira.”
^ Kunoke “n’i the loc peri.”
^ Kunoke “eketho de ngo kosa iwi Mungu.”
