Yob 12:1-25
12 E Yob udwoko kumae:
2 “Andhandha wun wu dhanu ma wung’eyo lembe,*man rieko bitho karacelo kudwu!
3 Ento an de anyang’ i lembe,*a nok ungo ma saguwu.
Ng’a m’ung’eyo ngo lembe ma wuyero?
4 Adoko ni jamng’iero ni jurimba,ng’atu m’ubekwayu Mungu udwok ire lembe.
Ng’atu ma pwe man ma lembe mbe i wiye udoko ni jamng’iero.
5 Ng’atu m’umbe kud adieng’a cayu can,m’eparu ko nia etie mi ju ma tiendgi cungo ngo nging’ nging’.*
6 Hema mi jukwo n’i kwiyocwiny,man ju m’ubenyayu ng’eicwiny i Mungu gibedo museme,gi dhanu ma gitie ku mungu migi i cing’gi.
7 Ento akweyi, penj lei, man gibiponji;penj bende winyo mi kor polo, man gibikoro iri lembe.
8 Kunoke nen cuu piny ma n’i wi ng’om, e gibiponji;man rec m’i nam gibinyutho iri lembene.
9 Kud i kind giracwiya maeni ceke, ma kani m’ung’eyo ngonia cing’ Yehova re m’utimo gin maeni?
10 Kwo mi gin ceke* ma kwo n’i cinge,man bende tipo* mi dhanu ceke.*
11 Nyo ith bilo ngo weccalu ma leb* bilo ko mido cami?
12 Nyo rieko nwang’ere ngo i bang’ ju m’utii,man nyo nyang’ i lembe ai ungo i bang’ ju ma gidaru kwo lee?
13 Rieko ku tego n’i bang’e;etie ku juk man nyang’ i lembe.
14 Kan eturo gin moko, ecopo dogierere ngo kendo;gin m’etwiyo dhoge, dhanu copo yabu ngo.
15 Kan etwiyo dhu pii, piny ceke thwo;kan ewekogi, gipong’o ng’om.
16 Tego ku rieko n’i bang’e.
Ng’atu m’ukier en e pare, man ng’atu m’ukiero jumange de e pare;
17 Eketho jumii juk gicidho ma tiendgi nanu,*man ebolo abelu iwi jupoklembe.
18 Egonyo twic ma jubim giketho iwi dhanu;man etwiyo mukaba i piergi.
19 Eketho julam giwotho ma tiendgi nanu,man eng’ielo judongo ma gicungo ma tek.
20 Ecero wec kud i dhu jumii juk ma jugeno,man emayu ju m’utii* cen ku ng’iyo i lembe.
21 Ekonjo cac iwi weg yung,man ekwiyo* tego mi ju ma tek.
22 Enyutho lembe ma thuc ma n’i mudho,man eloko mudho ma bii doko ni der.
23 Eketho thek doko tek kara enyothgi cen,enyayu thek, kara etergi i ng’eca.
24 Emayu nyang’ i lembe* mi jutelwic mi dhanu,man eketho giwotho swa i langa ma gengi mbe i iye.
25 Gimulo piny swa i mudho kaka ma der umbe i iye;eketho giwotho thamba thamba calu dhanu m’umer.
Korolembe mi There
^ I dhu Juebrania: “wun re ma wutie dhanu.”
^ I dhu Juebrania: “atie kud adunde.”
^ Kunoke “ma tiendgi ubekier.”
^ Kunoke “ng’eyong’ec pa ng’atuman ma kwo.”
^ Kunoke “yuyo.”
^ I dhu Juebrania: “mi kum ceke.”
^ I dhu Juebrania: “dandjo.”
^ Kunoke “ma gimbe ku gin moko acel de.”
^ Kunoke “judongo.”
^ I dhu Juebrania: “egonyo mukaba mi weg tego.”
^ I dhu Juebrania: “adunde.”
