Yob 15:1-35
15 Elifaz ma Jatheman uloko lembe kumae:
2 “Nyo ng’atu ma riek bidwoko lembe ku wec ma iye nanu,*kunoke nyo ebipong’o iye ku yamu ma yo nyangu?
3 Nijuko dhanu ku lembayera tije mbe,man niweco aweca kende de konyne mbe.
4 Kum ikabu lworo ma julworo ko Mungu cen,man icero jumange kud gipar pi Mungu.
5 Kum kosa peri re m’ubecwayu weng’i niweco,*man ibeng’iyo wec mir awondi.
6 Dhogi giri re m’ubepoko lembe rac i wii, an ungo.
Dend dhogi re m’ubetuco wii.
7 Nyo in re m’ibino ng’atu ma kwong’a ma jular junyolo,kunoke nyo in re ma jular junyoli i wang’ ungulu gudi?*
8 Nyo ibewinjo wec mir amung’ pa Mungu,kunoke nyo in kendi re m’itie ku rieko?
9 Ing’eyo ang’o ma wan wang’eyo ngo?
Ang’o m’ibenyang’ i iye ma wan wabenyang’ i iye ngo?
10 Wic ma ju lwar ku dhanu m’utii ceke n’i kindwa,dhanu ma oro migi sagu pa wuru.
11 Nyo juk pa Mungu uromo weng’i ngo,kadi wec ma juweco ku yoo iri de uromi ngo?
12 Pirang’o adundeni uteri bor,man pirang’o ng’eicwiny ubogo weng’i?
13 Kum ng’eicwiny umeki* i kum Mungu ku kumeman iweko wec ma kumeno uwok kud i dhogi.
14 Dhanu ma tho e en e ang’o ma nia ebed leng’,kadi ng’atu moko ci ma dhaku unyolo ma nia ebed pwe?
15 Nen! egeno ngo ju ma leng’ pare,man kadok polo de leng’ ungo i wang’e.
16 Ka dong’ ng’atu ma judagu man m’unyothere,ng’atu ma madhu racu ve pii e copo bedo nenedi i wang’e!
17 Kewinja! Abinyutho iri lembe!
Abikoro iri gin m’aneno,
18 gin ma jurieko gikanu ngo, ento gikoro;lembe ma weggi ukoro igi.
19 Jumiyo ng’om igi gin kendgi,man jawirok moko mbe m’ukadhu i kindgi.
20 Jatimrac neno can i nindo mi kwo pare ceke,i kind oro ceke ma juketho ni jasend.
21 Ithe winjo dwal ma ng’oyo ndiri;i nindo mi kwiyocwiny, weg ayeki gicoro i wiye.
22 Egeno ngo nia ebiboth kud i mudho,tho ma ku palamularu ubekure.
23 Ewotho rr pi niyenyo cam,* ewacu kumae: ‘Cam ni kani?’
Eng’eyo ma ber nia nindo mi mudho ni ceng’ini.*
24 Masendi kud ang’abacwiny nyayu ndiri i iye;gidiye calu ubimo ma tie ayika nitugo lwiny.
25 Kum erieyo cinge malu pi nikethere i dhu Mungu,man ebeng’ap nipiemere* ku Jategokpo;
26 Ecorere i kume ku tegowic,ku ban* pare ma dhoge thuthuru man ma tek.
27 Miyo uumo wang’e,man miyo ucokere bik i piere;
28 ekwo i adhura ma jubirwombo cen,i udi ma ng’atu moko mbe ma bibedo i igi,ma bidoko ni kidi ma judhuro.
29 Ebilony ungo man lim pare bimedere ngo,kadi jamcinge de bilal ungo i wang’ ng’om.
30 Ebiboth ungo kud i mudho;lebmac bithwoyo nyathi jange* cen,man yuyo mi dhu Mungu* biketho ebirwinyo.
31 Kud ewondere man kud egen gin ma tije mbe,kum adwogi m’ebinwang’u konyne bibedo mbe;
32 lembene bitimere ire kago eni,man jange bilepini tak de ngo.
33 Ebibedo calu yend ulok ma oyo nyinge ma numu,man calu yend oliv ma oyo thiwene.
34 Kum cokiri mi ju ma lworo Mungu ngo* bimedere ngo,man mac biwang’u hema mi weg kanyaka.*
35 Gigamu ic mi masendi, man ginyolo lembe ma rac,man usau nyodo migi nyolo ndra.”
Korolembe mi There
^ Kunoke “ng’eyong’ec ma ve yamu.”
^ Kunoke “kosa peri ubeponjo dhogi.”
^ Kunoke “nyithi gudi.”
^ I dhu Juebrania “iloko tiponi.”
^ I dhu Juebrania: “mukathi.”
^ I dhu Juebrania: “n’i cing’.”
^ Kunoke “nivoyo.”
^ I dhu Juebrania: “ng’ey ban pare m’ucudo ma dhoge thuthuru.”
^ Niwacu genogen moko ci mi key.
^ I dhu Juebrania: “pare.”
^ Kunoke “mi jujai.”
^ Kunoke “akumu.”
