Yob 16:1-22
16 Yob udwoko kumae:
2 “Adaru winjo lembe ma kumeni dupa.
Wun ceke wu jujukcwiny mi masendi!
3 Nyo wec ma iye nanu* ajikine nuti de?
Ang’o m’ubecwayu weng’i nidwoko lembe kumeno?
4 An de nwang’u acopo weco calu ma wubeweco no.
Ka nwang’u lembe m’ubetima e utimo wun,*nwang’u aweco lembe dupa i kumwu,man abeyengo wiya i kumwu.
5 Re kakare nitimo kumeno, nwang’u an alund miyo tego i kumwu ku wec m’i dhoga,man nwang’u juk mi dend dhoga ubekwiyo wi litho mwu.
6 Kan abeweco de litho para ubekwiyo ngo,dong’ kan ajigo niweco, nyo litho parane bikwiyo andha?
7 Ento kawoni, Mungu udaru tego para,man enyotho juruot para* ceke.
8 Imaka bende kii, man makne udoko ni jamulembe,uketho mok m’amok ko uai malu man ubetuco lembe i kuma.
9 Ng’eicwiny pare uyeco iya nziki nziki, man ekayu lembe i kuma.
Ebekayu lake i kuma.
Jadegina uketho wang’e tel i kuma.
10 Dhanu giyabu dhoggi ma lac i kuma,man gipadu thenga ku cac;gicokiri dupa i wiya.
11 Mungu ubemiya i cing’ nyithindh awobi,man ebebola i cing’ jutimrac.
12 Eng’enyo iya ma an ke nwang’u abedo para gira;eng’wenyo the toka man erunga;i ng’eye ke ekila ku nying athero pare.
13 Jukil athero pare gitieka tingili;ecobo i rong’ini para m’umbe kisa;eoyo kela para i ng’om.
14 Ebetong’o lero i kuma wi wadi wi wadi,ebering’ini i wiya calu jaramony.
15 Athubo kendi mi saki pi niumo kuma,man akunyo yung* para i utur.
16 Wak ubogo wang’a ceke,man tipopiny ma pek* uumo bind wang’a,
17 ma ke cinga utimo ngo rop moko,man rwo para de tie leng’.
18 E ng’om, kud ium wi rimba!
Man kud iketh wak para unwang’ ka yom!
19 Kadok kawoni de jamulembe para n’i polo;ng’atu ma romo tuco lembe pira n’i malu lir.
20 Jurimba gibenywara,ma an ke piwang’a ubecwir* i bang’ Mungu.
21 Wek ng’atu moko ubed jakind dhanu ku Mungu,calu ma jubedo ko jakind ng’atini ku wadi.
22 Kum oro m’abikwo i iye udong’ nyanok,e abicidho cen i yo ma judwogo ngo kud i iye.
Korolembe mi There
^ Kunoke “ma ve yamu.”
^ Kunoke “ka nwang’u ng’eyong’ec mwu ni kaka ng’eyong’ec para.”
^ Kunoke “ju m’ucokiri karacelo kuda.”
^ Kunoke “tego.” I dhu Juebrania: “tung’.”
^ Kunoke “tipopiny mi tho.”
^ Kunoke nyo “abeneno piny ma nindo ukeng’ i wang’a.”
