Yob 2:1-13
2 I ng’eye nindo ma wot Mungu mandha* gimondo i iye pi nicungo i wang’ Yehova ugam uromo, man Sitani de umondo i kindgi pi nicungo i wang’ Yehova.
2 E Yehova upenjo Sitani kumae: “Iai kani?” Sitani udwoko ni Yehova kumae: “Aai awotho kun ku kun i ng’om man nilenjo i iye.”
3 Man Yehova wacu ni Sitani kumae: “Nyo ineno* Yob ma jatic para? Ng’atu moko mbe ma calu en iwi ng’om. En e ng’atu m’atira man ma cuu,* ma lworo Mungu man ma uro lembe ma reco. Ebemoko asu i kum bedocu pare kadok nwang’u ibecwala ninyothe* m’umbe thelembe moko de.”
4 Ento Sitani udwoko ni Yehova kumae: “Dendkum kawang’ dendkum. Ng’atini bimiyo gin ceke m’etie ko pi kwo* pare.
5 Ento kara lembe ulokere, riey cingi igoy cogone man ring’ kume, e m’umbe jiji ebiceyi i weng’i.”
6 Yehova ugam uyero ni Sitani kumae: “Nen! en’i cingi.* Ento kud ikab kwo* pare.”
7 E Sitani ugam uwok kud i wang’ Yehova man egoyo Yob ku vur ma rac niai i the tiende nitundo i tatu wiye.
8 Yob uting’o adekle mir agulu m’ung’eny man ecaku gwenyo ko kume; bende, ebedo i vuru.
9 Tokcenne dhaku pare uwacu ire kumae: “Ndhu fodi ibemoko kii asu i kum bedocu peri? Lam Mungu man itho.”
10 Ento Yob udwoko ire kumae: “Ibeweco calu dhaku ma jakasegu. Nyo wabijolo gin ma ber kende kud i cing’ Mungu mandha? Ukwayu ngo wajol bende gin ma raci?” I lembe maeni ceke, Yob udubo ngo ku dend dhoge.
11 Jurimo pa* Yob adek giwinjo pi peko ceke m’uwok i wiye, e ng’atuman uai ku kaka m’ebedo i iye: Elifaz ma Jatheman, Bildad ma Jacuwa, man Zofar ma Janaamathi. Gigam giwinjiri nirombo karacelo pi niciwagu Yob man nijuko cwinye.
12 Kinde ma ginene ku bor, ging’iye ngo; e gicaku wak ma tek man giyeco bongu migi. Bende, gidhenyo utur i yamu man i wigi.
13 I ng’eye gibedo i ng’om karacelo ku Yob pi dieceng’ abiro man pi diewor abiro. Ng’atu moko acel de mbe m’uyero lembe moko ire, pilembe gineno nia ebino nwang’ere ku litho lee dit.
Korolembe mi There
^ Eno tie wec mi lembabola mi dhu Juebrania ma nyutho wot Mungu ma gi jumalaika.
^ I dhu Juebrania: “iketho adundeni iwi.”
^ Kunoke “ng’atu ma lembe mbe i wiye man m’atira.”
^ I dhu Juebrania: “nimwonye.”
^ Kunoke “ng’eyong’ec.”
^ Kunoke “en’i the loc peri.”
^ Kunoke “ng’eyong’ec.”
^ Kunoke “ju ma ging’eyiri kude.”
