Yob 22:1-30
22 Elifaz ma Jatheman uloko lembe kumae:
2 “Nyo tij dhanu tie de ni Mungu?
Nyo ng’atu ma riek utie ku faida moko de ire?
3 Kadok itie won bedopwe, nyo eno dieng’o de i Jategokpo?*
Kunoke nyo enwang’u faida moko de pilembe nia ibegwoko bedocu peri?
4 Nyo ebimiyo iri matiraman ebiyabu kesi i kindwu wukude pilembe ibewore?
5 Nyo etie ngo pilembe racu peri giri re ma lee akecaman ajiki mi racu peri mbe?
6 Kum iceriri iwi mukwatu* mir umego peri ma thelembene de mbe,man iwodho bongu kud i kum dhanu, iwekogi muneru.*
7 Kum imiyo ngo pii m’amadha ni ng’atu m’uol,man itwono ng’atu ma kec ubenego ku cam.
8 Ng’om utie pa won tego,man ng’atu ma juworo re ma bedo i iye.
9 Ento iriemo montho udok ma cing’gi nanu,man ituro bot nyithikic.*
10 Eno re m’uketho uwic* utieki tingili,man ndiri ma rek unyayu lworo i ii;
11 Pieno re ma piny ucido bii ma gin m’icopo neno de mbe,man pii m’upong’ ubemwonyi.
12 Nyo Mungu ni malu ngbir i polo ngo?
Man kenen kite ma nyikaluku ceke ni malu ko.
13 Ento iwacu kumae: ‘I andha ca Mungu ung’eyo ang’o?
Nyo ecopo poko lembe kud i kind mudho m’ucido bii?
14 Afuru ugeng’o bang’e uketho eneno piny ungokinde m’ebewotho iwi twodiri mi polo.’
15 Nyo ibilubo batielo ma conma jutimrac gigam giwotho kud i iye,
16 gi dhanu ma tho ular uyakugi rek ma fodi gin aradu,man ma pii m’upong’ umolo kathere migi ceni?
17 Gibed giwacu ni Mungu mandha kumae: ‘Wek wabed giwa!’
Man ‘Jategokpo romo timo iwa ang’o?’
18 Ma ke en re m’etie Ng’atu m’upong’o udi migi ku piny ma beco.
(Paru ma rac ma kumeno ni bor ku paru para.)
19 Won bedopwe bineno gin maeno man anyong’a binege,man ng’atu ma lembe mbe i wiye bing’iero dhoggi man ebiwacu kumae:
20 ‘Junyotho judhogwa,man mac biwang’u babang’gi ceke m’udong’.’
21 Ng’eye, man ibibedo ku kwiyocwiny;e ibinwang’u piny ma beco.
22 Jol cik m’uai kud i dhoge,man gwok wec pare i adundeni.
23 Tek idwogo i bang’ Jategokpo, lembe bibedo miero iri kendo;kan ikabu racu kud i hema peri,
24 tek ibolo mola ma kwar* peri i uturman mola ma kwar mir Ofir i kind kidi mi poga,*
25 e Jategokpo bidoko mola ma kwar peri,man ebibedo mola ma tar peri m’ang’iya.
26 Kum i saa maeno, mutoro binegi nikum Jategokpo,man ibiting’o weng’i malu i bang’ Mungu.
27 Ibikwaye, e ebiwinji;man ibitimo lembe m’ing’olo ku kwong’.
28 Gin ceke m’ing’iyo nitimo birombo,man der bicaru yo peri.
29 Kum jubinyayu lewic i wii kinde m’ibeweco ku kuhaya,ento ebibodho ng’atu ma jwigere.*
30 Ebibodho ju ma lembe mbe i wigi;pieno tek in de cingi tie leng’, ibiboth andha.”
Korolembe mi There
^ Kunoke “en e mutoro ni Jategokpo?”
^ Kunoke “garanti.”
^ I dhu Juebrania: “iwanyu kendi mi ju m’ubedo muneru.”
^ Kunoke “awiya ma weggi tho.”
^ I dhu Juebrania: “uwic mi winyo.”
^ Kunoke “lungu mola ma kwar.”
^ Kunoke “ndaba.”
^ Kunoke “ng’atu ma wang’e akula.”
